ହମିରପୁର, ୨୯।୬- ମାଟି ତଳେ ୩ ଘଣ୍ଟା ପାଇଁ ଜୀବନ୍ତ ସମାଧି ନେଲେ ସାଧୁ। କିନ୍ତୁ ୩ ଘଣ୍ଟା ପରେ ଯେତେବେଳେ ସାଧୁ ମାଟି ତଳୁ ବାହାରିଲେ ପୋଲିସ ତାଙ୍କୁ ଗିରଫ କରିଛି। କରୋନା ନିୟମ ଉଲ୍ଲଘଂନ କରିଥିବା ଅଭିଯୋଗରେ ପୋଲିସ ଏହି ସାଧୁଙ୍କୁ ଗିରଫ କରିଥିବା ଜଣାପଡ଼ିଛି। ଏମିତି ଏକ ଘଟଣା ଉତ୍ତର ପ୍ରଦେଶ ହମିରପୁର ଜିଲା ମାଉଦା କୋଟଓ୍ବାଲୀ ଅଞ୍ଚଳରେ। ସୋମବାର ଦ୍ୱିପହର ସମୟରେ ଜୁନା ଆଖଡ଼ାର ଜଣେ ସାଧୁ ଗୋବିନ୍ଦ ଗିରିଜ ମହାରାଜ ମାଟି ତଳେ ଜୀବନ୍ତ ସମାଧି ନେବାକୁ ପ୍ରସ୍ତୁତ ହେଉଥିଲେ। ସାମାଧି ପାଇଁ ମାଟି ଖୋଳାଯାଇ ବିରାଟ ଗାତ ସୃଷ୍ଟି କରାଯାଇଥିଲା। ସାଧୁ ଗାତ ମଧ୍ୟକୁ ପ୍ରବେଶ କରିବା ପରେ ଭକ୍ତମାନେ ଗାତ ଉପରେ ପଟା ଥୋଇ ପରେ ମାଟି ପକାଇ ପୋତି ଦେଇଥିଲେ। ୩ ଘଣ୍ଟା ପରେ ସାଧୁଙ୍କୁ ମାଟି ଉଠାଇ ଉଦ୍ଧାର କରାଯାଇଥିଲା। ସାଧୁ ବାହାରକୁ ଆସିବା ପରେ ଚାରିଆଡ଼େ ତାଙ୍କର ଜୟ ଜୟକାର ଗାନ କରାଯାଇଥିଲା। ତେବେ ସାଧୁଙ୍କ ସମାଧି ଦେଖିବା ପାଇଁ ଆଖପାଖରେ ଅନେକ ଲୋକ ସେଠାରେ ରୁଣ୍ଡ ହୋଇଥିଲେ। ଏହି ସମୟରେ ଲୋକମାନେ ମୁହଁରେ ମାକ୍ସ ପିନ୍ଧି ନ ଥିଲେ କି ସାମାଜିକ ଦୂରତା ନିୟମକୁ ପାଳନ କରି ନ ଥିଲେ। ଏକାଠି ହୋଇ ସମସ୍ତେ ସାଧୁଙ୍କ ଜୀବନ୍ତ ସମାଧି ଦୃଶ୍ୟକୁ ଉପଭୋଗ କରିବା ସହ ମୋବାଇଲରେ ଏହାର ଭିଡିଓ ବନାଇଥିଲେ। ପୋଲିସ ଏହା ଜାଣିବା ପରେ ଘଟଣାସ୍ଥଳକୁ ଯାଇ ସାଧୁଙ୍କୁ ଗିରଫ କରିଥିବା ଜଣାପଡ଼ିଛି।
