ନନ୍ଦପୁର, ୧୧/୫(ତୁଷାର କାନ୍ତ ମହାନ୍ତି): କୋରାପୁଟ ଜିଲା ନନ୍ଦପୁର ବ୍ଲକ ଖିର୍ଜୀ ପଞ୍ଚାୟତର ନନ୍ଦୀଗାଁ ଗ୍ରାମରେ ଜଣେ ୧୭ ବର୍ଷୀୟା ନାବାଳିକା ବଧୂର ମୃତ୍ୟୁକୁ ନେଇ ଉତ୍ତେଜନା ପ୍ରକାଶ ପାଇଛି। ଶାଶୁ ଘର ଲୋକେ ବୋହୂ ବେକରେ ଦଉଡ଼ି ଦେଇ ଆତ୍ମହତ୍ୟା କରିଥିବା କହୁଥିବାବେଳେ ଝିଅର ବାପ ଘର ଲୋକେ ଝିଅକୁ ଯୌତୁକଜନିତ ନିର୍ଯାତନା ଦେଇ ହତ୍ୟା କରାଯାଇଥିବା ଅଭିଯୋଗ କରି ନନ୍ଦପୁର ଥାନାରେ ଏତଲା ଦେଇଥିଲେ।
ନନ୍ଦପୁର ପୋଲିସ ଏସଡିପିଓ ଦେବେନ୍ଦ୍ର ମାଲିକ, ମାଜିଷ୍ଟ୍ରେଟ ଅତିରିକ୍ତ ତହସିଲଦାର ମାଧବ ପାଙ୍ଗି, ସୁଶୀଳା ଖରାଙ୍କ ନେତୃତ୍ୱଧୀନ କୋରାପୁଟ ପୋଲିସର ବୈଷୟିକ ଦଳ ଘଟଣାସ୍ଥଳରେ ପହଞ୍ଚି ମୃତଦେହ ଉଦ୍ଧାର କରିବା ସହ ଶବ ବ୍ୟବଚ୍ଛେଦ କରି ପରିବାରକୁ ହସ୍ତାନ୍ତର କରିଛନ୍ତି। ଧାରା ୮୫, ୧୦୩ (୧), ୮୦(୨) ୩(୫) ବିଏନଏସ ଓ ଆରଡବ୍ଲୁ ସେକ୍ସନ ୪ ଡିପି ନନ୍ଦପୁର ଥାନା କେସ ନ ୬୬/୨୦୨୬ ପ୍ରକାରେ ମାମଲା ରୁଜୁ କରାଯାଇଛି। ମୃତକ ନାବାଳିକାଙ୍କ ସ୍ବାମୀ ଶାଶୁ ଶ୍ୱଶୁରଙ୍କୁ ଅଟକ ରଖି ଥାନାଧିକାରୀ ତ୍ରିନାଥ ତୋଟାପାଡିଆ ତଦନ୍ତ କରୁଥିବା ଏସଡିପିଓ ଦେବେନ୍ଦ୍ର ମଲ୍ଲିକ ସୂଚନା ଦେଇଛନ୍ତି।
ସୂଚନା ମୁତାବକ, ନନ୍ଦିଗାଁ ଗ୍ରାମର ମନୋଜ ଚମ୍ପି (୨୦) ବର୍ଷକ ତଳେ ବାଲଡ଼ା ଗ୍ରାମର ୧୬ ବର୍ଷୀୟ ନାବାଳିକା ଝିଅ (ଈଶ୍ୱରୀ)ଙ୍କୁ ଭଲ ପାଉଥିବା ଓ ବିବାହ କରିବାକୁ କହି ଉଦୁଲିଆ ନେଇ ଯାଇଥିଲେ। ପରିବାର ଲୋକେ ସେତେବେଳେ ଝିଅର ଇଚ୍ଛାକୁ ସମ୍ମାନ ଦେଇ ନୀରବ ରହିଥିଲେ। କିନ୍ତୁ କିଛିଦିନ ପରେ ଝିଅ ଯୌତୁକ ବାବଦକୁ କିଛି ଆଣି ନ ଥିବାରୁ ଶାଶୁ ଘର ଲୋକେ ନିର୍ଯାତନା ଦେଉଥିବା ଓ ଝିଅକୁ ମାରି ଆତ୍ମହତ୍ୟାର ରୂପ ଦେଉଥିବା ପରିବାର ଲୋକେ ଏତଲାରେ ଉଲ୍ଲେଖ କରିଥିଲେ। ଯାହା ଆଧାରରେ ପୋଲିସ ମାମଲା ରୁଜୁ କରି ତଦନ୍ତ କରୁଛି। ମାଜିଷ୍ଟ୍ରେଟଙ୍କ ଉପସ୍ଥିତିରେ ବୈଷୟିକ ଦଳ ଓ ତଦନ୍ତ କରୁଥିବା ନନ୍ଦପୁର ପୋଲିସ ଦଳ ତଦନ୍ତ କରୁଛି।
ସ୍ବାମୀ ମନୋଜ ଚମ୍ପୀ, ଶାଶୁ ଜମ୍ବୁବତୀ ଚମ୍ପୀ ଓ ଶ୍ୱଶୁର କୁଶ ଚମ୍ପୀ ତିନିଜଣଙ୍କୁ ଥାନାରେ ଅଟକ ରଖାଯାଇ ପଚରାଉଚରା କରାଯାଉଛି। ତଦନ୍ତରେ ନନ୍ଦପୁର ଥାନାଧିକାରୀଙ୍କୁ ଏସଆଇ ବେଦୋବର୍ ସାହୁ, ଏସଆଇ ଜ୍ୟୋର୍ତିମୟୀ ଶବର, ଏଏସଆଇ ଗୁପ୍ତେଶ୍ୱର ଗୌଡ ପ୍ରମୁଖ ସହଯୋଗ କରୁଥିବା ଏସଡିପିଓ ମଲ୍ଲିକ ସୂଚନା ଦେଇଛନ୍ତି।
ଅନ୍ୟପଟେ ରାଜ୍ୟ ଓ କେନ୍ଦ୍ର ସରକାର ବାଲ୍ୟବିବାହ ରୋକିବାକୁ ଏକାଧିକ ଯୋଜନା, ବ୍ଲକ ଓ ଜିଲ୍ଲା ସ୍ତରୀୟ ଟାସ୍କଫୋର୍ସ, ସଚେତନାବର୍ତ୍ତୀ କାର୍ଯ୍ୟକ୍ରମ, ଧାରା ଓ ଆଇନ ପ୍ରଣୟନ କରିଥିବା ବେଳେ ଜଣେ ୧୬ ବର୍ଷୀୟ ନାବାଳିକା ଝିଅ କିଭଳି ବିବାହ କରିଥିଲେ ଓ ଯୌତୁକ ଜନିତ ର୍ନିଯାତନାର ଶିକାର ହେଲେ ବୋଲି ସାଧାରଣରେ ଚର୍ଚ୍ଚା ହେଉଛି।
Dharitri – Odisha’s No.1 Odia Daily
