କୋରାପୁଟ,୧୬/୧(ସ୍ବ.ପ୍ର) କୋରନା ବିରୋଧରେ ବିଶ୍ୱରେ ଆରମ୍ଭ ହୋଇଛି ସର୍ବ ବୃହତ ଲଢେଇ । ହାରିବ କୋରନା, ଜିତିବ ଜୀବନର ଲକ୍ଷ୍ୟ ନେଇ ଶନିବାରଠାରୁ ସାରା ଦେଶରେ ପ୍ରାଥମିକ ପର୍ଯ୍ୟାୟ ଟିକାକରଣ ଆରମ୍ଭ ହୋଇଛି । ପ୍ରଧାନମନ୍ତ୍ରୀ ଭିଡିଓ କନଫରେନ୍ସିଂ ଜରିଆରେ ଟିକାକରଣର ଶୁଭାରମ୍ଭ କରିବା ପରେ ଜିଲାର ସଦର ମହକୁମ୍ମାର ଗାନ୍ଧୀନଗର ନିକଟରେ ଥିବା ସହରାଞ୍ଚଳ ସ୍ବାସ୍ଥ୍ୟକେନ୍ଦ୍ରରେ ଶୁଭାରମ୍ଭ ହୋଇଛି କୋରନା ଟିକାକରଣ । ପ୍ରଥମେ କୋରାପୁଟ ସହରାଞ୍ଚଳ ସ୍ବାସ୍ଥ୍ୟକେନ୍ଦ୍ରର ସଫେଇ କର୍ମଚାରୀ ପଦ୍ମନ ହରିଜନ ପ୍ରଥମେ ଟିକା ନେଇଛନ୍ତି। ଦି୍ବତୀୟରେ ଆଶା କର୍ମୀ ସୁଶିଳା ଦାସ ଏବଂ ତୃତୀୟରେ ଅଙ୍ଗନବାଡି କର୍ମୀ ଲଳିତା ସୁନାନୀ ଟିକା ନେଇଛନ୍ତି। ଟିକାନେବା ପରେ ସମସ୍ତେ ସୁସ୍ଥ ରହିଥିବା ଜଣାପଡ଼ିଛି। ଏହି କେନ୍ଦ୍ରରେ ଶନିବାର ୧୦୦ ଜଣଙ୍କୁ ଟିକା ଦେବାର ରହିଛି। ଯଦି ଉପରୋକ୍ତ ୧୦୦ ଜଣରୁ କିଏ ଅନୁପସ୍ଥିତ ରୁହନ୍ତି ତେବେ ବଳକା ୨୫ ଜଣଙ୍କୁ ଦିଆଯିବ ବୋଲି ସିଡିଏମଓ ସୂଚନା ଦେଇଛନ୍ତି। ଶନିବାର ସ୍ଥାନୀୟ ଗାନ୍ଧୀନଗରସ୍ଥିତ ସହରାଞ୍ଚଳ ସ୍ବାସ୍ଥ୍ୟ କେନ୍ଦ୍ରଠାରେ ଜିଲାପାଳ ମଧୁସୁଧନ ମିଶ୍ର, ସିଡିଏମ୍ଓ ଡାକ୍ତର ମକରନ୍ଦ ବେଉରା, ଜିଲା ସୂଚନା ଓ ଲୋକ ସମ୍ପର୍କ ଅଧିକାରୀ ଜଗନ୍ନାଥ ପ୍ରସାଦ ରାୟଗୁରୁ, କୋରାପୁଟ ମ୍ୟୁନିସପାଲଟିର ନିର୍ବାହୀ ଅଧିକାରୀ ଆଲୋକ ରଞ୍ଜନ ସାମନ୍ତରାୟ ପ୍ରମୁଖ ଉପସ୍ଥିତ ଥିଲେ।
ଶନିବାର ଜିଲାର କୋରାପୁଟ ମେଡିକାଲ କଲେଜ, ଜୟପୁରସ୍ଥିତ ଜିଲା ମୁଖ୍ୟ ଚିକିସତ୍ାଳୟ, ବୋରିଗୁମ୍ମା ଓ ମାଥାଲପୁଟ ସିଏଚ୍ସି ଆଦି ଅନ୍ୟ ୪ଟି ସ୍ଥାନରେ ମଧ୍ୟ ଟିକାକରଣ କାର୍ଯ୍ୟକ୍ରମର ଶୁଭାରମ୍ଭ ହୋଇଛି ।
ବର୍ତ୍ତମାନ ଜିଲାକୁ ୮ ହଜାର ୩୦୦ କୋଭିସିଲ୍ଡ ଟିକା ଆସିଥିବାବେଳେ ଆସନ୍ତା ଫେବୃଆରୀ ୧ ସୁଧା ସମସ୍ତ ଟିକା ସ୍ବାସ୍ଥ୍ୟକର୍ମଚାରୀ ଓ ଅଙ୍ଗନବାଡି କର୍ମୀଙ୍କୁ ଦିଆଯିବ ବୋଲି ସିଡିଏମ୍ଓ ସୂଚନା ଦେଇଛନ୍ତି।
