ବାଙ୍ଗାଲୋର: ୨୦୧୯-୨୦ ବର୍ଷ ଲାଗି ପ୍ରକାଶିତ ଭାରତୀର ଫିଲାନଥ୍ରୋପି ବା ବଦାନ୍ୟତା ତାଲିକାରେ ଓ୍ବିପ୍ରୋର ଅଜିମ ପ୍ରେମ୍ଜୀ ସମସ୍ତଙ୍କ ପଛରେ ପକାଇ ଦେଇଛନ୍ତି। ସେ ଦୈନିକ ୨୨ କୋଟି ଏବଂ ବାର୍ଷିକ ମୋଟ ୭୯୦୪ କୋଟି ଟଙ୍କା ଦାନ କରିଛନ୍ତି। ହୁରୁନ ରିପୋର୍ଟ ଇଣ୍ଡିଆ ଏବଂ ଏଡେଲ ଗିଭ୍ ଫାଉଣ୍ଡେଶନ ପକ୍ଷରୁ ଭାରତୀୟ ବଦାନ୍ୟ ବ୍ୟକ୍ତିଙ୍କର ତାଲିକା ପ୍ରକାଶ ପାଇଛି। ଏହି ତାଲିକାରେ ଏଚ୍ସିଏଲ୍ ଟେକ୍ନୋଲୋଜିର ଶିବ ନାଦାର ଶୀର୍ଷରେ ରହି ଆସୁଥିଲେ। ହେଲେ ପ୍ରେମ୍ଜୀ ତାଙ୍କୁ ପଛରେ ପକାଇ ଦେଇଛନ୍ତି। ଆର୍ଥତ୍କ ବର୍ଷ ୨୦୧୯-୨୦ରେ ନାଦାର ୭୯୫ କୋଟି ଟଙ୍କା ଦାନ କରିଥିବା ବେଳେ ଏହାର ପୂର୍ବବର୍ଷ ୮୨୬ କୋଟି ଟଙ୍କା ଦାନ କରିଥିଲେ। ତାଲିକାର ତୃତୀୟ ସ୍ଥାନରେ ରିଲାଏନ୍ସ ଇଣ୍ଡଷ୍ଟ୍ରିଜର ଅଧ୍ୟକ୍ଷ ମୁକେଶ ଅମ୍ବାନୀ ରହିଛନ୍ତି। ମୁକେଶ ୪୫୮ କୋଟି ଟଙ୍କା ଦାନ କରିଛନ୍ତି। ଏହାର ପୂର୍ବ ବର୍ଷରେ ସେ ୪୦୨ ଟଙ୍କା ଦାନ କରିଥିଲେ। କୋଭିଡ୍ରେ ଲୋକଙ୍କ ସହାୟତା ଲାଗି ଟାଟାସନ୍ସ ୧୫୦୦ କୋଟି ଦେବାକୁ କହିଛି। ପ୍ରେମ୍ଜୀ ୧୧୨୫ କୋଟି, ଅମ୍ବାନୀ ୫୧୦ କୋଟି ଘୋଷଣା କରିଛନ୍ତି। ସେହିଭଳି ପିଏମ୍ କେୟାର ପାଣ୍ଠିକୁ ବଡ ବଡ କର୍ପୋରେଟ ଦାନ କରିଛନ୍ତି।
ରିଲାଏନ୍ସ ଇଣ୍ଡଷ୍ଟ୍ରିଜ ୫୦୦ କୋଟି, ଆଦିତ୍ୟ ବିର୍ଲା ଗ୍ରୁପ୍ ୪୦୦ କୋଟି ଏବଂ ଟାଟା ୫୦୦ କୋଟି ଦେବାକୁ ଘୋଷଣା କରିଛି। ପ୍ରେମ୍ଜୀଙ୍କ ମୋଟ ଦାନ ୧୭୫% ବୃଦ୍ଧି ପାଇ ଗତ ଆର୍ଥତ୍କ ବର୍ଷରେ ୧୨,୦୫୦ କୋଟି ଟଙ୍କା ଛୁଇଁଛି। ଏଟିଇ ଚନ୍ଦ୍ରା ଫାଉଣ୍ଡେଶନର ଅମିତ ଚନ୍ଦ୍ରା ଏବଂ ଅର୍ଚ୍ଚନା ଚନ୍ଦ୍ରା ୨୭ କୋଟି, ନନ୍ଦନ ନିଲେକାନି ୧୫୯ କୋଟି, ଏସ୍.ଗୋପାଳକୃଷ୍ଣ ୫୦ କୋଟି, ଏସ୍ଡି ସବୁଲାଲ ୫୦ କୋଟି ଦାନ କରିଥିବା ଜଣାପଡିଛି। ଶିକ୍ଷା କ୍ଷେତ୍ରର ବିକାଶ ଲାଗି ପ୍ରାୟ ୯୦ଫିଲାନଥ୍ରୋପିଷ୍ଟ ଦାନ କରିଛନ୍ତି। ପ୍ରେମ୍ଜୀ ଏବଂ ନାଦାର ଏ କ୍ଷେତ୍ରରେ ଆଗୁଆ ରହିଥିବା ବେଳେ ସ୍ବାସ୍ଥ୍ୟ କ୍ଷେତ୍ରକୁ ୮୪ ଏବଂ ପୁନର୍ବାସ ଲାଗି ୪୭ ଜଣ ଦାନ କରିଛନ୍ତି। ମୁମ୍ବାଇରୁ ୩୬ ଜଣ ଦାନ କରିଥିବା ବେଳେ ନୂଆଦିଲ୍ଲୀରୁ ୨୦ ଏବଂ ବାଙ୍ଗାଲୋରରୁ ୧୦ ଜଣ ଦାନ କରିଛନ୍ତି। ସେହିଭଳି ଫ୍ଲିପ୍କାର୍ଟର ସହପ୍ରତିଷ୍ଠାତା ବିନି ବଂଶଲ ୫ କୋଟି ଟଙ୍କା ଦାନ ସହ ଏହି ତାଲିକାରେ ସ୍ଥାନିତ ହୋଇଛନ୍ତି।
