ଛତ୍ରପୁର,୨୧ା୯(ସନ୍ତୋଷ ପାଢୀ)ଗଞ୍ଜାମ ଜିଲାରେ ଗତ ୨ଦିନ ହେଲା ବର୍ଷା ଲାଗି ରହିଥିବାରୁ ଜନଜୀବନ ଅସ୍ତବ୍ୟସ୍ତ ହୋଇଛି। ଚାଷକାର୍ଯ୍ୟ ପାଇଁ ଏହା ଭଲ ବୋଲି ଚାଷୀମାନେ କହୁଛନ୍ତି। ମାତ୍ର ଧାନଚାଷ ପାଇଁ ଯେଉଁ ସମୟରେ ବର୍ଷା ଓ ଜଳସେଚନର ଆବଶ୍ୟକତା ଥିଲା ତାହା ଅଭାବ ଦେଖାଦେଇଥିଲା। ଫଳରେ ଧାନଚାଷ ଜିଲାରେ ବାଧାପ୍ରାପ୍ତ ହୋଇଛି। ବିଶେଷକରି ଧାନରୁଆ ପାଇଁ ଶ୍ରାବଣ ମାସରେ ବର୍ଷା ଆବଶ୍ୟକ ଥାଏ। ହେଲେ ଭାଦ୍ରବରେ ଏହି ବର୍ଷା ହେଉଛି। ବର୍ଷା ଓ ଜଳସଚେନ ଅଭାବରୁ ଜିଲାର ୩୦ ପ୍ରତିଶତ ଜମିରେ ଧାନରୁଆ ହୋଇ ନ ଥିବା ଋଷିକୁଲ୍ୟା ରୟତ ମହାସଭାର ସମ୍ପାଦକ ସୀମାଞ୍ଚଳ ନାହାକ କହିଛନ୍ତି।
ଜିଲାର ଛତ୍ରପୁର, ଦିଗପହଣ୍ଡି, ଚିକିଟି, ସୋରଡା, ଭଞ୍ଜନଗର, ପାତ୍ରପୁର, ଶେରଗଡ ବ୍ଲକର କେତେକ ଅଞ୍ଚଳରେ ଏବେ ଚାଷ ଜମି ପଡିଆ ପଡିଥିବା କୁହାଯାଇଛି। ୧୫ ନଂ କେନାଲରେ ବର୍ଷାପାଣି ଆସିଲେ ଛତ୍ରପୁର ବ୍ଲକର ଚିକଲଖଣ୍ଡି, ଭିକାରୀପଲ୍ଳୀ ଓ ପୋଡାପଦର ପଞ୍ଚାୟତରେ ଧାନରୁଆ କାର୍ଯ୍ୟ ହୋଇଥାଏ। ଚଳିତବର୍ଷ ଗତ ମାସରେ ବର୍ଷା ଅଭାବ କାରଣରୁ ଉକ୍ତ କେନାଲରେ ପାଣି ଆସି ନଥିଲା। ତେଣୁ ଉକ୍ତ ଅଞ୍ଚଳରେ ହଜାର ହଜାର ଏକର ଜମି ପଡିଆ ପଡିଥିବା ଦେଖିବାକୁ ମିଳିଛି। ବର୍ଷା ଓ ଜଳସେଚନ ଅଭାବ ଲାଗି ଚଳିତବର୍ଷ ଜିଲାରେ ଧାନ ଉପତ୍ାଦନ କମିବା ନେଇ ଋଷିକୁଲ୍ୟା ରୟତ ମହାସଭା ପକ୍ଷରୁ ଆଶଙ୍କା ପ୍ରକାଶ କରାଯାଇଛି। ଧାନଚାଷ କମିବା ଜଳବାୟୁ ପରିବର୍ତ୍ତନର ମୁଖ୍ୟ କାରଣ ବୋଲି କୁହାଯାଇଛି। ଚଳିତବର୍ଷ ଧାନ ବିକିବା ପାଇଁ ଜିଲାର ୧ ଲକ୍ଷ ୪୬ ହଜାର ୫୪୧ ଜଣ ଚାଷୀ ଅନଲାଇନ୍ରେ ପଞ୍ଜୀକରଣ କରିଛନ୍ତି। ଜିଲାର ୧୦୩ ପ୍ରାଥମିକ ସମବାୟ ସମିତି, ୧୦୩ ମହିଳା ସ୍ବଂୟ ସହାୟିକା ଗୋଷ୍ଠୀ ଓ ଗୋଟିଏ ପାଣି ପଞ୍ଚାୟତ ଏହି ପଞ୍ଜୀକରଣ କରାଇଛନ୍ତି। ଏବେ ପଞ୍ଜୀକୃତ ଚାଷୀମାନଙ୍କ ଯାଞ୍ଚ ପ୍ରକ୍ରିୟା ଚାଲିଛି। ଗତବର୍ଷ ତୁଳନାରେ ଚଳିତ ବର୍ଷ ଅଧିକ ଚାଷୀ ପଞ୍ଜୀକରଣ କରିଥିବା ଜଣାଯାଇଛି। ମିଳିଥିବା ସୂଚନା ଅନୁସାରେ, ଗତବର୍ଷ ଖରିଫ୍ ଧାନ ବିକିବା ପାଇଁ ଜିଲାର ୧ ଲକ୍ଷ ୩୧ ହଜାର ଚାଷୀ ପଞ୍ଜୀକୃତ ହୋଇଥିଲେ। ସେଥିରୁ ୨୦ ହଜାର ଚାଷୀ ଧାନ ବିକି ପାରି ନ ଥିଲେ। ଠିକ୍ ସମୟରେ ସମିତିଗୁଡିକ ଧାନ କିଣି ନଥିବାରୁ ଏପରି ସମସ୍ୟା ସୃଷ୍ଟି ହୋଇଥିଲା। ଧାନକିଣା ପ୍ରକ୍ରିୟାକୁ ଶୃଙ୍ଖଳିତ କରିବା ଉପରେ ଋଷିକୁଲ୍ୟା ରୟତ ମହାସଭା ପକ୍ଷରୁ ଗୁରୁତ୍ୱାରୋପ କରାଯାଇଛି। ଚଳିତ ବର୍ଷ ଜୁଲାଇ ୧୫ରୁ ଅଗଷ୍ଟ ୨୩ ତାରିଖ ପର୍ଯ୍ୟନ୍ତ ଧାନ ବିକିବା ପାଇଁ ଚାଷୀ ପଞ୍ଜୀକରଣ ଚାଲିଥିଲା। ଅନ୍ୟପକ୍ଷରେ ଗତବର୍ଷ ଧାନ ବିିକିଥିବା ଆହୁରି ୩୪ ଜଣଙ୍କୁ ତାଙ୍କର ପ୍ରାପ୍ୟ ମିଳି ନ ଥିବା ମହାସଭା ପକ୍ଷରୁ ଅଭିଯୋଗ ହୋଇଛି।
