ହାଇଦ୍ରାବାଦ୍,୨୭।୨: ଆନ୍ଧ୍ରପ୍ରଦେଶରେ ଗଧବଂଶ ଲୋପ ପାଇବା ଆଶଙ୍କା ସୃଷ୍ଟି ହୋଇଛି। ରାଜ୍ୟରେ ମାଂସ ପାଇଁ ଗଧହତ୍ୟା କରାଯାଉଛି। ଭାରତୀୟ ଖାଦ୍ୟ ଏବଂ ମାନକ ପ୍ରାଧିକରଣ ଅନୁସାରେ ଗଧ ପ୍ରଜାତିଙ୍କୁ ଖାଦ୍ୟ ପ୍ରାଣୀ ଅନ୍ତର୍ଗତ ପଞ୍ଜିକୃତ କରାଯାଇ ନାହିଁ। ତେଣୁ ଗଧ ହତ୍ୟା ସମ୍ପୂର୍ଣ୍ଣ ବେଆଇନ। ରାଜ୍ୟରେ ପ୍ରାଣୀ କ୍ରୁରତା ନିବାରଣ ଆକ୍ଟ-୧୯୬୦ର ଉଲ୍ଲଂଘନ କରି ଗଧଙ୍କୁ ହତ୍ୟା କରାଯାଉଛି। ଆନ୍ଧ୍ରପ୍ରଦେଶରେ ଗଧଙ୍କୁ ମାଂସ ପାଇଁ ହତ୍ୟା କରିବା ପରେ ଅବଶେଷକୁ ନାଳରେ ଫିଙ୍ଗାଯାଉଛି। ଯୌନଶକ୍ତି ବୃଦ୍ଧି ଲାଗି ଲୋକେ ଗଧ ମାଂସ ଖାଉଛନ୍ତି। କିଲୋପିଛା ଏହା ୬୦୦ଟଙ୍କାରେ ବିକ୍ରି ହେଉଛି। ମାଂସ ବ୍ୟବସାୟୀ ଗୋଟିଏ ଗଧ ୧୫ରୁ ୨୦ ହଜାର ଟଙ୍କାରେ ପାଳକଙ୍କଠାରୁ କିଣୁଛନ୍ତି। ଗଧଙ୍କ ହତ୍ୟା ସଂଖ୍ୟା ବୃଦ୍ଧି ପାଇବା ନେଇ ରାଜ୍ୟ ସରକାର ଚିନ୍ତାରେ ପଡ଼ିଛନ୍ତି। ରାଜ୍ୟର ପଶ୍ଚିମ ଗୋଦାବରୀ ଜିଲା ସମେତ ଅନ୍ୟ କେତେକ ଜିଲାରେ ମାଂସ ପାଇଁ ଗଧଙ୍କୁ ବେଧଡ଼କ ହତ୍ୟା କରାଯାଉଛି। କୃଷ୍ଣା, ପ୍ରକାଶମ୍ ଏବଂ ଗୁଣ୍ଟୁର ଆଦି ଅଞ୍ଚଳରେ ଏଭଳି ଘଟଣା ଲଗାତାର ଘଟିଚାଲିଛି। ୨୦୧୯ରେ ରାଜ୍ୟରେ ଗଧଙ୍କ ସଂଖ୍ୟା ମାତ୍ର ୫ ହଜାର ଥିଲା। ଏବେ ସେମାନଙ୍କ ସଂଖ୍ୟା କମିବାରେ ଲାଗିଛି। ମହାରାଷ୍ଟ୍ର ସମେତ ଦେଶର ଅନ୍ୟ କେତେକ ରାଜ୍ୟରେ ମଧ୍ୟ ସ୍ଥିତି ଦେଖିବାକୁ ମିଳୁଛି।
