ନୂଆଦିଲ୍ଲୀ,୨୧।୧: ,୨୧।୧: ମହାକାଶରେ ମହାଜାଗତିକ ଦୃଶ୍ୟ । ଗତ କିଛି ଦିନ ହେବ ଆମ ସୌରମଣ୍ଡଳର ୪ଟି ଗ୍ରହ ଶୁକ୍ର, ଶନି, ବୃହସ୍ପତି ଓ ମଙ୍ଗଳ ଗ୍ରହ ରାତି ଆକାଶରେ ଖାଲି ଆଖିରେ ଦୃଶ୍ୟମାନ ହେଉଛି। ଏହି ଗ୍ରହମାନଙ୍କ ସହିତ ୟୁରେନସ ଏବଂ ନେପଚୁନ ମଧ୍ୟ ଦେଖିବାକୁ ମିଳୁଛି। ଏହି ଛଅଟି ଗ୍ରହ ରାତି ଆକାଶରେ ଏକ ର୍ନିଦ୍ଦିଷ୍ଟ ସୀମାରେଖା ମଧ୍ୟରେ ଦୃଶ୍ୟମାନ ହେଉଥିବାରୁ, ତାହାକୁ ପ୍ଲାନେଟ ପ୍ୟାରେଡ କୁହାଯାଏ।
‘ପ୍ଲାନେଟ ପ୍ୟାରେଡ’ ଅର୍ଥ ହେଉଛି ସେହି ପରିସ୍ଥିତି ଯେତେବେଳେ ଆମ ସୌରମଣ୍ଡଳର ଅନେକ ଗ୍ରହ ରାତି ଆକାଶରେ ଏକ ସାଙ୍ଗରେ ଦୃଶ୍ୟମାନ ହୁଅନ୍ତି। ଆକାଶରେ ଗ୍ରହମାନଙ୍କର ଗତି ଭିନ୍ନ ଭିନ୍ନ ହୋଇଥାଏ। ସେମାନେ ଅନ୍ୟ ନକ୍ଷତ୍ରମାନଙ୍କ ତୁଳନାରେ ଭିନ୍ନ ହାରରେ ଗତି କରନ୍ତି। ଏଗୁଡ଼ିକ ସମସ୍ତେ ପ୍ରତିଦିନ ଆକାଶରେ ଦୃଶ୍ୟମାନ ହୁଅନ୍ତି ନାହିଁ, କିନ୍ତୁ ବେଳେବେଳେ ଏପରି ସ୍ଥିତି ଉପୁଜିଥାଏ ଯେ ଅନେକ ବା ସମସ୍ତ ଗ୍ରହ ଏକାସାଙ୍ଗରେ କିମ୍ବା ପରସ୍ପରର କିଛି ଘଣ୍ଟା ମଧ୍ୟରେ ଦୃଶ୍ୟମାନ ହୁଅନ୍ତି।
ନାସା ୱେବସାଇଟ ଅନୁଯାୟୀ, ଏହି ମଲ୍ଟି-ପ୍ଲାନେଟ ଦେଖିବାର ସୁଯୋଗ ଅତ୍ୟନ୍ତ ବିରଳ। ଶେଷ ଥର ପାଇଁ ୨୦୨୪ ମେ-ଜୁନ ମାସରେ ସୌରମଣ୍ଡଳର ସମସ୍ତ ଗ୍ରହ ସକାଳ ଆକାଶରେ ଦୃଶ୍ୟମାନ ହୋଇଥିଲା। ସୂଚନା ଅନୁଯାୟୀ, ଖାଲି ଆଖିରେ ଦୃଶ୍ୟମାନ ହେଉଥିବା ପଞ୍ଚମ ଗ୍ରହ ବୁଧ ଫେବୃଆରୀ ୨୦ ପରେ ସଂଧ୍ୟା ଆକାଶରେ ଦେଖାଯିବ।
ସୌରମଣ୍ଡଳରେ ୮ଟି ଗ୍ରହ ରହିଛି: ବୁଧ, ଶୁକ୍ର, ପୃଥିବୀ, ମଙ୍ଗଳ, ବୃହସ୍ପତି, ଶନି, ନେପଚୁନ ଏବଂ ୟୁରେନସ । ସାତଟି ଗ୍ରହ ମଧ୍ୟରୁ ପାଞ୍ଚଟି ଗ୍ରହ ଖାଲି ଆଖିରେ ଦୃଶ୍ୟମାନ ହୁଏ। ସୂର୍ଯ୍ୟ ଓ ପୃଥିବୀଠାରୁ ସେମାନେ ଯେତିକି ଦୂରରେ ଅଛନ୍ତି, ସେଥିପାଇଁ ଅନ୍ୟ ଦୁଇଟିକୁ ଦେଖିବା ପାଇଁ କିଛି ମାତ୍ରାରେ ମାଗ୍ନିଫିକେସନର ଆବଶ୍ୟକତା ରହିଛି।
