ଇସଲାମାବାଦ,୪।୩ : ଦୁଇ ପ୍ରଦେଶରେ ନିର୍ବାଚନ ପ୍ରସଙ୍ଗରେ ସୁପ୍ରିମକୋର୍ଟଙ୍କ ନିଷ୍ପତ୍ତି ପରେ ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନ ବର୍ତ୍ତମାନ ସେନା ସହ ବନ୍ଧୁତା କରିବାର ପଦକ୍ଷେପ ନେଇଛନ୍ତି। କିନ୍ତୁ ଏହା ସହିତ ସେ ପୂର୍ବତନ ସେନା ମୁଖ୍ୟ ଜେନେରାଲ କମର ଜାଭେଦ ବାଜୱାଙ୍କ ବିରୋଧରେ କୋର୍ଟ ମାର୍ଶଲ ଦାବି କରି ଏକ ନୂଆ ବିବାଦ ସୃଷ୍ଟି କରିଛନ୍ତି।
ପର୍ଯ୍ୟବେକ୍ଷକଙ୍କ ଅନୁଯାୟୀ, ବାଜୱାଙ୍କ ବିରୋଧରେ ଇମ୍ରାନଙ୍କ ବିବୃତ୍ତି ଏଷ୍ଟାବ୍ଲିସମେଣ୍ଟ ପସନ୍ଦ କରିବ ନାହିଁ। ପାକିସ୍ତାନରେ ସାମରିକ ଏବଂ ଗୁପ୍ତଚର ଉପକରଣର ନେତୃତ୍ୱ ଏଷ୍ଟାବ୍ଲିସମେଣ୍ଟ ଭାବରେ ଜଣାଶୁଣା । ପାକିସ୍ତାନର ଦୁଇଟି ପ୍ରଦେଶ, ପଞ୍ଜାବ ଏବଂ ଖାଇବର ପସ୍ତୁନଖ୍ବାରେ ନିର୍ବାଚନ ତାରିଖ ଘୋଷଣା ହେବା ପରେ ଇମ୍ରାନ ଗଣମାଧ୍ୟମ ସହ କଥା ହୋଇଥିଲେ। ଏହି ସମୟରେ, ଏକ ପ୍ରଶ୍ନ ଉପରେ ସେ ଦେଶର ଉନ୍ନତି ପାଇଁ ସେନା ମୁଖ୍ୟ ଜେନେରାଲ ଅସୀମ ମୁନିରଙ୍କ ସହ କଥା ହେବାକୁ ପ୍ରସ୍ତାବ ଦେଇଥିଲେ। ଇମ୍ରାନ କହିଥିଲେ ଯେ ଏଷ୍ଟାବ୍ଲିସମେଣ୍ଟ ସହିତ ତାଙ୍କର କୌଣସି ବିବାଦ ନାହିଁ ଏବଂ ସେ ଆର୍ମି ମୁଖ୍ୟ ଜେନେରାଲ ମୁନିରଙ୍କ ସହ ଆଲୋଚନା ପାଇଁ ପ୍ରସ୍ତୁତ ଅଛନ୍ତି।
ଏଥିସହ ସେ କହିଥିଲେ ଯେ ରୁଷିଆ ବିରୋଧୀ ଭାଷଣ ଦେଇଥିବାରୁ ଜେନେରାଲ ବାଜୱାଙ୍କୁ କୋର୍ଟ ମାର୍ଶଲ କରାଯିବା ଉଚିତ। ୟୁକ୍ରେନ ଉପରେ ହୋଇଥିବା ଆକ୍ରମଣ ପରେ ରୁଷିଆକୁ ନିନ୍ଦା କରି ଜେନେରାଲ ବାଜୱା ଇମ୍ରାନ୍ଙ୍କ ପାଇଁ ସମସ୍ୟା ସୃଷ୍ଟି କରିଥିଲେ। ଇମ୍ରାନ ଏହା ମଧ୍ୟ କହିଥିଲେ ଯେ ରୁଷିଆ ସହିତ ତାଙ୍କ ଦେଶର ଏକ ଚୁକ୍ତିନାମା ରହିଛି, ଯାହା ଅନ୍ତର୍ଗତ ରୁଷିଆ ପାକିସ୍ତାନକୁ ରିହାତି ମୂଲ୍ୟରେ ଅଶୋଧିତତୈଳ ଦେବାକୁ ରାଜି ହୋଇଛି। କିନ୍ତୁ ରୁଷିଆକୁ ଖୋଲାଖୋଲି ସମାଲୋଚନା କରି ତାଙ୍କ ସରକାରକୁ କ୍ଷମତାଚ୍ୟୁତ ଉଦ୍ୟମରେ ଅଂଶଗ୍ରହଣ କରି ଏଷ୍ଟାବ୍ଲିସମେଣ୍ଟ ତାଙ୍କ ଯୋଜନାକୁ ବିଫଳ କରିଥିଲା।
