ଇସଲାମାବାଦ୍, ୧।୭: ଆତଙ୍କବାଦୀଙ୍କୁ ଆଶ୍ରୟ ଦେଇଥିବା ପାକିସ୍ତାନ ଉପରେ ଆକ୍ରମଣ ହେବାପରେ ସରକାରଙ୍କ ବୁଦ୍ଧି ହଜି ଯାଇଛି। ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ୍ ଖାଁ ଭାରତ ଉପରେ ମିଥ୍ୟା ଅଭିଯୋଗ ଲଗାଇଛନ୍ତି। ସେ କହିଛନ୍ତି ଯେ, କରାଚି ଷ୍ଟକ୍ ଏକ୍ସଚେଞ୍ଜରେ ହୋଇଥିବା ବିସ୍ଫୋରଣ ପାଇଁ ଭାରତ ଦାୟୀ। ଏହି ଘଟଣାରେ ୯ ଜଣଙ୍କ ମୃତ୍ୟୁ ଘଟିଥିବାବେଳେ ୭ ଜଣ ଆହତ ହୋଇଥିଲେ। ଏହି ଘଟଣାରେ ୪ ଆତଙ୍କବାଦୀଙ୍କ ମୃତ୍ୟୁ ଘଟିଥିଲା। ଏଥି ଲାଗି ବଲୁଚି ଲିବରେଶନ୍ ଆର୍ମି ନିଜକୁ ଦାୟୀ କରିସାରିଛି। ତେବେ ଇମ୍ରାନ୍ ପାକିସ୍ତାନ ସଂସଦରେ ଏଭଳି ମିଥ୍ୟା ଅଭିଯୋଗ ଆଣିଛନ୍ତି। ଗତବର୍ଷ ମଧ୍ୟ କରାଚିରେ ବଲୁଚି ଲିବରେଶନ୍ ଆର୍ମି ଚାଇନା ଦୂତାବାସ ଉପରେ ଆକ୍ରମଣ କରିଥିଲା। ଆକ୍ରମଣ ପାଇଁ ୪ ଆତଙ୍କବାଦୀ ଆସିଥିଲେ ସେମାନଙ୍କ ପାଖରେ ବିପୁଳ ପରିମାଣର ବିସ୍ଫୋରକ ଏବଂ ଏକେ-୪୭ ରାଇଫଲ ଥିଲା। ପାକିସ୍ତାନ ଆତଙ୍କବାଦୀଙ୍କ ଆଶ୍ରୟସ୍ଥଳ ପାଲଟିଛି। ଏଥି ଲାଗି ଇମ୍ରାନ୍ ସରକାରଙ୍କ ଉପରେ ଲଗାତାର ଅନ୍ତର୍ଜାତୀୟ ଚାପ ମଧ୍ୟ ପଡ଼ିବାରେ ଲାଗିଛି। ଏଥିରୁ ଦୃଷ୍ଟି ହଟାଇବା ପାଇଁ ଇମ୍ରାନ୍ ଏଭଳି କହିଥିବା କୁହାଯାଉଛି।
