ଇସଲାମାବାଦ,୨୦।୬ : କରାଚି ବନ୍ଦର ଟର୍ମିନାଲକୁ ହସ୍ତାନ୍ତର କରିବା ପାଇଁ ସଂଯୁକ୍ତ ଆରବ ଏମିରେଟ୍ସ (ୟୁଏଇ) ସହିତ ଚୁକ୍ତି ଶେଷ କରିବାକୁ ପାକିସ୍ତାନ ଏକ ବୁଝାମଣା କମିଟି ଗଠନ କରିଛି। ଏକ୍ସପ୍ରେସ ଟ୍ରିବ୍ୟୁନ ରିପୋର୍ଟ କରିଛି ଜରୁରୀକାଳୀନ ପାଣ୍ଠି ସଂଗ୍ରହ ପାଇଁ ଗତ ବର୍ଷ ପ୍ରଣୟନ ହୋଇଥିବା ଆଇନ ଅନୁଯାୟୀ ଏହି ପଦକ୍ଷେପ ପ୍ରଥମ ଆନ୍ତଃ- ସରକାରୀ କାରବାର ହୋଇପାରେ।
ଆନ୍ତଃt-ସରକାରୀ ବାଣିଜ୍ୟ କାରବାର ଉପରେ କ୍ୟାବିନେଟ କମିଟିର ଏକ ବୈଠକରେ ଅର୍ଥମନ୍ତ୍ରୀ ଇଶାକ ଦାର୍ ଅଧ୍ୟକ୍ଷତା କରିଥିଲେ। ନିଷ୍ପତ୍ତି ଅନୁଯାୟୀ, କରାଚି ବନ୍ଦର ଟ୍ରଷ୍ଟ (କେପିଟି) ଏବଂ ୟୁଏଇ ସରକାରଙ୍କ ମଧ୍ୟରେ ବାଣିଜି୍ୟକ ଚୁକ୍ତିନାମା ପାଇଁ ଏକ କମିଟି ଗଠନ କରିବାକୁ କ୍ୟାବିନେଟ ନିଷ୍ପତ୍ତି ନେଇଛି। କରାଚି ବନ୍ଦର ଟର୍ମିନାଲକୁ ହସ୍ତାନ୍ତର କରିବା ପାଇଁ ଏକ ନିର୍ଦ୍ଦିଷ୍ଟ ୟୁଏଇ ଏଜେନ୍ସି ସହିତ ସରକାରଙ୍କ ବ୍ୟବସ୍ଥା ଅନୁଯାୟୀ ଏକ ଡ୍ରାଫ୍ଟ ଅପରେଶନ, ରକ୍ଷଣାବେକ୍ଷଣ, ପୁଞ୍ଜି ବିନିଯୋଗ ଏବଂ ବିକାଶ ଚୁକ୍ତିନାମାକୁ ଚୂଡ଼ାନ୍ତ କରିବାକୁ ବୁଝାମଣା କମିଟିକୁ ଅନୁମତି ଦିଆଯାଇଛି। ଗଠିତ ବୁଝାମଣା କମିଟି ସାମୁଦ୍ରିକ ବ୍ୟାପାର ମନ୍ତ୍ରୀ ଫୈସଲ ସାବଜୱାରୀଙ୍କ ଦ୍ୱାରା ପରିଚାଳିତ ହେବ।
କମିଟିର ସଦସ୍ୟମାନେ ଅର୍ଥ ଏବଂ ବୈଦେଶିକ ବ୍ୟାପାର ବିଭାଗର ଅତିରିକ୍ତ ସଚିବ, କରାଚି ବନ୍ଦର ଟର୍ମିନାଲ (କେପିଟି) ର ଚେୟାରମ୍ୟାନ ତଥା କେପିଟିର ଜେନେରାଲ ମ୍ୟାନେଜର ଅଛନ୍ତି। ଟର୍ମିନାଲଗୁଡିକୁ ଆବୁଧାବି ବନ୍ଦର ଗ୍ରୁପର ଏକ ସହାୟକ କମ୍ପାନୀ ଆବୁଧାବି ବନ୍ଦର (ଏଡିପି)କୁ ହସ୍ତାନ୍ତର କରିବାକୁ ଏକ ଚୁକ୍ତିନାମା କରିବାକୁ ପାକିସ୍ତାନ ଲକ୍ଷ୍ୟ ରଖିଛି।
ଏକ୍ସପ୍ରେସ ଟ୍ରିବ୍ୟୁନ ରିପୋର୍ଟ କରିଛି ୟୁଏଇ ସରକାର ଗତ ବର୍ଷ ପାକିସ୍ତାନ ଇଣ୍ଟରନ୍ୟାଶନାଲ କଣ୍ଟେନର ଟର୍ମିନାଲର ପ୍ରଶାସନିକ ନିୟନ୍ତ୍ରଣରେ କରାଚି ବନ୍ଦର ଟର୍ମିନାଲ ହାସଲ କରିବାକୁ ଆଗ୍ରହ ଦେଖାଇଥିଲେ।
