ଭୁବନେଶ୍ୱର,୩୧ା୩(ବ୍ୟୁରୋ):ଓଡ଼ିଶା ରାଜ୍ୟ ସଡ଼କ ପରିବହନ ନିଗମ (ଓଏସ୍ଆର୍ଟିସି)ର ବହୁମୂଲ୍ୟ ସମ୍ପତ୍ତି ଜବରଦଖଲକାରୀଙ୍କ କବ୍ଜାରେ ରହିଛି। ଦୀର୍ଘ ବର୍ଷ ହେବ ସେଗୁଡ଼ିକ ମୁକ୍ତ ହୋଇ ପାରୁନାହିଁ। ଏହାକୁ ନେଇ ବିଧାନସଭା ଗୃହ କମିଟି ଉଦ୍ବେଗ ପ୍ରକାଶ କରିଛନ୍ତି। ତୁରନ୍ତ ଜବରଦଖଲ ଜମିକୁ ପରିବହନ ବିଭାଗ ନିଜ ଅକ୍ତିଆରକୁ ନେବା ଲାଗି କମିଟି ସୁପାରିସ କରିଛନ୍ତି। ଜମିଗୁଡ଼ିକୁ ଓଏସ୍ଆର୍ଟିସି ନିଜ ଅଧୀନକୁ ଆଣି ବାଉଣ୍ଡାରି ଓ୍ବାଲ ନିର୍ମାଣ କରିବାକୁ ପ୍ରଥମ ପର୍ଯ୍ୟାୟରେ ୬.୧୦ କୋଟି ଟଙ୍କା ଓ ଦ୍ୱିତୀୟ ପର୍ଯ୍ୟାୟରେ ୧୫ କୋଟି ଟଙ୍କାର ବଜେଟ ବ୍ୟବସ୍ଥା କରିବାକୁ କମିଟି ତାଙ୍କ ରିପୋର୍ଟରେ ବିଭାଗକୁ ସୁପାରିସ କରିଛନ୍ତି। ସେହିପରି କମିଟି ଗମନାଗମନକୁ ତ୍ୱରାନ୍ବିତ କରିବାକୁ ୪୧୦ ନୂଆ ବସ୍ କିଣିବାକୁ ୨୧୩ କୋଟି ଟଙ୍କା ବ୍ୟୟ ବରାଦ କରିବାକୁ ପରାମର୍ଶ ଦେଇଛନ୍ତି। ରାଜ୍ୟର ବିିଭିନ୍ନ ସ୍ଥାନରେ ଡ୍ରାଇଭର ଓ ପାସେଞ୍ଜରମାନଙ୍କ ବିଶ୍ରାମ ସ୍ଥଳ ନିର୍ମାଣ କରିବା ସହ ଦୁର୍ଘଟଣାକୁ ଦୂର କରିବା ଲାଗି ଜାତୀୟ ରାଜପଥ କଡ଼ରୁ ଅଣଯୋଜନାରେ ନିର୍ମିିତ ମାର୍କେଟଗୁଡ଼ିକୁ ହଟାଇବାକୁ କମିଟି ପରାମର୍ଶ ଦେଇଛି। ଏଥିସହିତ ଯୁବପିଢ଼ିଙ୍କୁ ଡ୍ରାଇଭିଂ ଲାଇସେନ୍ସ ଦେବା ବ୍ୟବସ୍ଥାକୁ ତ୍ୱରାନ୍ବିତ କରିବା ଏବଂ ପରିବହନ ବିଭାଗର ଖାଲି ସ୍ଥାନରେ ବସଷ୍ଟାଣ୍ଡ ନିର୍ମାଣ କରିବାକୁ କମିଟି ବିଭାଗକୁ ସୁପାରିସ କରିଛନ୍ତି। ରାଜ୍ୟରେ ପର୍ଯ୍ୟଟନ ସ୍ଥଳକୁ ବସ ଚଳାଚଳ ପର୍ଯ୍ୟାପ୍ତ ନାହିଁ। ଫଳରେ ପର୍ଯ୍ୟଟକମାନଙ୍କର ଆଗମନ ହ୍ରାସ ପାଉଛି। ଏହାକୁ ଦୃଷ୍ଟିରେ ରଖି ପର୍ଯ୍ୟଟନ ସ୍ଥଳଗୁଡ଼ିକୁ ବସ ଚଳାଇବା ପାଇଁ କମିଟି ପରାମର୍ଶ ଦେଇଛି। ପରିବହନ ବିଭାଗ ଅଧୀନରେ ଥିବା ସମସ୍ତ ବସ୍କୁ ରାଜ୍ୟର ସବୁ ରୁଟ୍ରେ ଯିବାକୁ ଅନୁମତି ଦେବା ପାଇଁ କମିଟି ସୁପାରିସ କରିଛନ୍ତି। ରାଜ୍ୟରେ ଯୁବ ପାଇଲଟ୍ଙ୍କ ସଂଖ୍ୟା ବଢ଼ାଇବା ସକାଶେ ଭୁବନେଶ୍ୱର ବିମାନ ମନ୍ଦରରେ ପ୍ରଶିକ୍ଷଣ କାର୍ଯ୍ୟକ୍ରମକୁ ତ୍ୱରାନ୍ବିତ କରିବାକୁ କମିଟି ସରକାରଙ୍କୁ ପରାମର୍ଶ ଦେଇଛନ୍ତି। ଏଥିସହିତ ପ୍ରଥମ ପର୍ଯ୍ୟାୟରେ ୨୪ଟି ଜିଲାରେ ନିର୍ମାଣ ହେଉଥିବା ୫୫ଟି ବସ୍ଷ୍ଟାଣ୍ଡ କାର୍ଯ୍ୟକୁ ତ୍ୱରାନ୍ବିତ କରିବା ସହ ଦ୍ୱିତୀୟ ପର୍ଯ୍ୟାୟରେ ୧୦୦ଟି ବସଷ୍ଟାଣ୍ଟ ନିର୍ମାଣ ନିର୍ଦ୍ଧାରିତ ସମୟରେ ଶେଷ କରିବାକୁ କମିଟି ସୁପାରିଶ କରିଛନ୍ତି। ଏଥିସହିତ ପରିବହନ ବିଭାଗର ସମ୍ପତ୍ତିକୁ ଜିଆଇଏସ୍ ଆଧାରିତ ପରିଚାଳନା ବ୍ୟବସ୍ଥା କରିବାକୁ ସୁପାରିସ କରାଯାଇଛି। ଦୁର୍ଘଟଣାରେ ମୃତାହତଙ୍କ କ୍ଷତିପୂରଣ ପାଇଁ ଜନସାଧାରଣଙ୍କ ମଧ୍ୟରେ ସଚେତନତା ସୃଷ୍ଟି କରିବାକୁ ପଞ୍ଚାୟତ, ପଞ୍ଚାୟତ ସମିତି ଓ ପୌର ପରିଷଦଗୁଡ଼ିକୁ ପ୍ରଚାର ପ୍ରସାର ଜୋରଦାର କରିବାକୁ ବିଧାନସଭା ଗୃହ କମିଟି ସୁପାରିସ କରିଛନ୍ତି।
