ଦିଗପହଣ୍ଡି୩।୯(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ଅବକାରୀ ବିଭାଗ ପକ୍ଷରୁ ଚଢ଼ାଉ କରାଯାଇ ନକଲି ବିଦେଶୀ ମଦ, ଖାଲି ବୋତଲ, ଦେଶୀ ମଦ ପାଉଚ୍ ଏବଂ ଦୁଇଟି ବଟଲିଂ ମେସିନ୍ ଜବତ କରାଯାଇଛି। ଏହି ବେଆଇନ କାରବାରରେ ସଂପୃକ୍ତ ଥିବା ବ୍ୟବସାୟୀଙ୍କୁ ଗିରଫ କରାଯିବା ପରେ କୋର୍ଟ ଚାଲାଣ କରାଯାଇଛି।
ମିଳିଥିବା ସୂଚନା ଅନୁଯାୟୀ, ଗୁରୁବାର ଦିନ ଗୁପ୍ତ ସୂଚନାକୁ ଭିତ୍ତି କରି ଦିଗପହଣ୍ଡି ଅବକାରୀ ଥାନା ଓଆଇସି ସସ୍ମିତା ମଲ୍ଲିକଙ୍କ ନେତୃତ୍ୱରେ ଅବକାରୀ ଟିମ୍ ସାନଖେମୁଣ୍ଡି ବ୍ଲକ୍ କଂସାମାରି ଗ୍ରାମର ବ୍ୟବସାୟୀ ଶାନ୍ତନୁ ବିଷୋୟୀଙ୍କ ଘରେ ଚଢ଼ାଉ କରିଥିଲେ। ଖାନତଲାସୀ ସମୟରେ ଘର ଭିତରୁ ବିକ୍ରି ପାଇଁ ମହଜୁଦ ଥିବା ନକଲି ବିଦେଶୀ ମଦ, ବିଭିନ୍ନ ନାମୀଦାମୀ କମ୍ପାନୀର ଲେବୁଲ୍, ଖାଲି ବୋତଲ, ବଟଲିଂ ମେସିନ୍ ଏବଂ ଜରି ଅଖାରେ ରଖାଯାଇଥିବା ବିପୁଳ ପରିମାଣର ଦେଶୀ ମଦ ପାଉଚ୍ ଜବତ ହୋଇଥିଲା।
ଏହି ଚଢ଼ାଉ ସମୟରେ ଅବକାରୀ ବିଭାଗ ପକ୍ଷରୁ ୨୨ ଲିଟର୍ ୫୦୦ ମିଲିଲିଟର୍ ନକଲି ବିଦେଶୀ ମଦ, ୨୦ ଲିଟର୍ ୭୦୦ ମିଲିଲିଟର୍ ବିଦେଶୀ ମଦ, ୪୪.୨ ଲିଟର୍ ବିୟର, ୮ ଲିଟର୍ ସରକାରୀ ଦେଶୀ ମଦ ସମେତ ୭୫୦ ମିଲିଲିଟର୍ ବିଶିଷ୍ଟ ୩୦ ଟି ଖାଲି ବୋତଲ, ୧୮୦ ମିଲିଲିଟର୍ ବିଶିଷ୍ଟ ୫୦ ବୋତଲ, ୧୭ ଖାଲି ପେପର କାର୍ଟୁନ୍, ୨ ବଟଲିଂ ମେସିନ୍ ଏବଂ ମଦ ପ୍ରସ୍ତୁତି ସରଞ୍ଜାମ ଜବତ କରାଯାଇଛି।
ସାକ୍ଷୀମାନଙ୍କ ଉପସ୍ଥିତିରେ ଜବତ ତାଲିକା ପ୍ରସ୍ତୁତ କରାଯିବା ସହ କେମିକାଲ୍ ପରୀକ୍ଷା ପାଇଁ ନମୂନା ସଂଗ୍ରହ କରାଯାଇ ସିଲ୍ କରାଯାଇଥିଲା। ପରେ ଅଭିଯୁକ୍ତ ଶାନ୍ତନୁ ବିଷୋୟୀଙ୍କୁ ଗିରଫ କରି ଅବକାରୀ ଥାନା ମାମଲା ନଂ. ୧୦୩/୨୬-୨୭ ଅନୁଯାୟୀ କୋର୍ଟ ଚାଲାଣ କରାଯାଇଥିଲା। ଜାମିନ୍ ଆବେଦନ ଖାରଜ ହେବାରୁ ତାଙ୍କୁ ଦିଗପହଣ୍ଡି ସବ୍-ଜେଲ୍ ହାଜତକୁ ପଠାଇ ଦିଆଯାଇଛି। ଶାନ୍ତନୁ ନିଜ ଘରେ ନକଲି ବିଦେଶୀ ମଦ ପ୍ରସ୍ତୁତ କରି ବିଭିନ୍ନ ଗ୍ରାମାଞ୍ଚଳକୁ ଚୋରା ଚାଲାଣ କରୁଥିବା ନେଇ ପ୍ରାଥମିକ ତଦନ୍ତରୁ ଜଣାପଡ଼ିଥିବା ଅବକାରୀ ଓଆଇସି ସୂଚନା ଦେଇଛନ୍ତି। ଏହି ଚଢ଼ାଉରେ ଏଏସ୍ଆଇ ଏନ୍. ତ୍ରିପତି, କନେଷ୍ଟବଳ ରାଜେଶ ଜେନା, ବଳରାମ ପାତ୍ର, ଏସ୍.କେ. ରାଜେଶ ଉଦ୍ଦିନ୍ ଏବଂ ଆଲଫ ଲତା ସାହୁ ପ୍ରମୁଖ ସାମିଲ ଥିଲେ।
