କେନ୍ଦୁଝର, ୨୭।୭ (ସ୍ବ.ପ୍ର.) – କେନ୍ଦୁଝର ସରକାରୀ ଇଞ୍ଜିନିୟରିଂ କଲେଜ ପରିସରରେ ଓମ୍ବାଡସି ଅର୍ଥରେ ହେଉଥିବା କୋଠା ନିର୍ମାଣରେ ବ୍ୟାପକ ଅନିୟମିତତା ହେଉଥିବା ଅଭିଯୋଗ ହୋଇଛି। ପାହାଡ଼କୁ ତାଡ଼ି କୋଠା ନିର୍ମାଣ କରାଯାଉଥିଲେ ହେଁ ରାଜସ୍ବ ବିଭାଗ ପକ୍ଷରୁ କାୈଣସି ପଦକ୍ଷେପ ଗ୍ରହଣ କରାଯାଉ ନ ଥିବାରୁ ବ୍ୟାପକ ରାଜସ୍ବ ହାନୀ ଘଟୁଛି। ଅନ୍ୟପକ୍ଷରେ ଇଡ୍କୋ ପକ୍ଷରୁ କାମ ଚାଲୁଥିବା ବେଳେ ତଦାରଖ ପାଇଁ ସଂସ୍ଥାର କେହି ଉପସ୍ଥିତ ରହୁ ନ ଥିବା ଅଭିଯୋଗ ହେଉଛି।
ପ୍ରକାଶ ଯେ, ସଦର ତହସିଲ ଅନ୍ତର୍ଗତ ଗୋପୀନାଥ ପଞ୍ଚାୟତ ଅନ୍ତର୍ଗତ ଜାମୁନାଳିଆଠାରେ ସରକାରୀ ଇଞ୍ଜିନିୟରିଂ କଲେଜ ପରିସରରେ ଓମ୍ବାଡସି ଅର୍ଥରେ ପାଖାପାଖି ୨୦କୋଟି ଟଙ୍କା ବ୍ୟୟରେ ଏକାଡେମିକ୍ ବିଲ୍ଡିଂ, ସେଣ୍ଟ୍ରାଲ ଲାଇବ୍ରେରୀ, କାଫେ ଏରିଆ ନିର୍ମାଣ ଚାଲିଛି। ବ୍ୟୟ ଅଟକଳ, କାର୍ଯ୍ୟାରମ୍ଭ ଓ ଶେଷ ଆଦି ସୂଚନା ଫଳକ ଲଗାଯାଇ ନ ଥିବାରୁ ଠିକ ଖର୍ଚ୍ଚ ଜଣାପଡୁନାହିଁ। ପଥର ହୁଡ଼ିକୁ କାଟି ଏହି ନିର୍ମାଣ କାର୍ଯ୍ୟ ଚାଲିଛି। ଏଣୁ ଏଥିରୁ ବାହାରୁ ଥିବା ପଥରର ଠିକ ପରିଚାଳନା କରାଯାଉ ନ ଥିବାରୁ ଏଣେତେଣେ ବିପଦପୂର୍ଣ୍ଣ ଅବସ୍ଥାରେ ପଡ଼ିରହିଛି। ନିୟମ ଅନୁଯାୟୀ କାମ ପୂର୍ବରୁ ଉକ୍ତ ସ୍ଥାନରେ ଗଚ୍ଛିତ ପଥର ପରିମାଣ ଯାଞ୍ଚ କରିବା ପରେ ଏହାର ମୂଲ୍ୟ ଆକଳନ କରାଯାଇଥାଏ। ଉକ୍ତ ପଥର ବ୍ୟବହାର କରାଗଲେ ସେ ନେଇ ତହସିଲ ପକ୍ଷରୁ ଧାର୍ଯ୍ୟ କରାଯାଇଥିବା ରାଜସ୍ବ ଜମା କରିବାକୁ ପଡ଼ିଥାଏ। ଏହାପରେ ତହସିଲ ଅନୁମତି କ୍ରମେ ପଥର ଖନନ କରାଯାଇ ନିର୍ମାଣ କାର୍ଯ୍ୟ ଆରମ୍ଭ ହେବା କଥା। ତା’ପରେ ପଥର ଏବଂ ମାଟି ବ୍ୟବହାର କରିବା କଥା। କିନ୍ତୁ ତହସିଲରୁ ଅନୁମତି ନ ନେଇ ତରବରିଆ ଭାବରେ ଉକ୍ତ ସ୍ଥାନରେ ଖନନ କରାଯାଉଛି। ସେହିପରି ତଦାରଖ କରୁଥିବା ସଂସ୍ଥାର ଯନ୍ତ୍ରୀମାନେ ସବୁବେଳେ ରହୁ ନ ଥିବାରୁ ଏହାର ସୁଯୋଗ ନେଇ ଠିକାଦାର ଖନନ ପରେ ଉକ୍ତ ସ୍ଥାନରେ ପିଲାର ନିର୍ମାଣ କରିବା ସହ ଉକ୍ତ ପଥର ଓ ମାଟି ଫିଲିଂ କରୁଛନ୍ତି। ଏହିପରି କାମ ଆରମ୍ଭ କେବେ ହେଲା ଏବଂ କେବେ ସରିବ ତାହାର ସୂଚନା ମଧ୍ୟ ଦିଆଯାଇନାହିଁ। ଏସମ୍ପର୍କରେ ଇଡ୍କୋର ଯନ୍ତ୍ରୀ ଗୌତମ ଜେନା କହିଛନ୍ତି, କାମର ତଦାରଖ କରାଯାଉଛି। ସେଠାରୁ ବାହାରୁଥିବା ପଥର ରଖିବା ପାଇଁ ଜାଗା ନ ଥିବାରୁ ନିୟମ ଅନୁଯାୟୀ ଫିଲିଂ କରାଯାଉଛି। ଅନ୍ୟପକ୍ଷରେ ସଦର ତହସିଲଦାର ଆଶିଷ ମହାପାତ୍ରଙ୍କୁ ପଚାରିବାରୁ ଉକ୍ତ ସ୍ଥାନରୁ ବାହାରୁଥିବା ପଥର ଆକଳନ କରାଯାଇ ରଖାଯାଇଛି। ଉକ୍ତ ପଥରକୁ ନିଲାମ କରାଯାଇ ବିକ୍ରୀ ହେବ। ସେହିପରି ଇଡ୍କୋ ଆଞ୍ଚଳିକ ମୁଖ୍ୟ ଭି.ଏସ.ଗିରି କହିଛନ୍ତି, ଇଡ୍କୋ ପକ୍ଷରୁ ଏକାଧିକ ସ୍ଥାନରେ କାମ ଚାଲିଥିବାରୁ ସବୁବେଳେ ଯନ୍ତ୍ରୀମାନେ ତଦାରଖ କରିବା ସମ୍ଭବ ନୁହେଁ ା ଉକ୍ତ ସ୍ଥାନରୁ ବାହାରୁଥିବା ପଥରକୁ ସେଠାରେ ପୋତି ତା ଉପରେ ବାଲି ଦେଇ ନିର୍ମାଣ କାମ କରାଯାଉଛି ।
