ଯାଜପୁର ଅଫିସ,୧୦ା୯: ଯାଜପୁର ଜିଲାର ଧର୍ମଶାଳା ଥାନା ଅନ୍ତର୍ଗତ ଜାରକା କଲେଜ ରୋଡ୍ ନିକଟରେ ଶୁକ୍ରବାର ଓଡ଼ିଶା ଭିଜିଲାନ୍ସ ଫରେଷ୍ଟ ୱିଙ୍ଗ୍ ପକ୍ଷରୁ ଚଢ଼ାଉ କରାଯାଇ ୨୫ ଲକ୍ଷ ୨୪ ହଜାର ଟଙ୍କାର କଳାପଥର ସମେତ ଏକ ହାଇୱା ଜବତ ହୋଇଛି। କଳାପଥର ଜଙ୍ଗଲ ଜମିରୁ ଉତ୍ତୋଳନ ହୋଇ ଚୋରାଚାଲାଣ ହୋଇଥିବା ସୂଚନା ମିଳିଛି। ଏହାବାଦ୍ କେନ୍ଦ୍ରାପଡ଼ା ଜିଲା ପାଟକୁରା ଥାନା ଅନ୍ତର୍ଗତ ଜୟପୁର ଗ୍ରାମରୁ ୧ ଲକ୍ଷ ୨୯ ହଜାର ୫୦୦ ଟଙ୍କାର ୨୪ ସିଏଫ୍ଟି ଶାଗୁଆନ କାଠ ଜବତ କରାଯାଇଛି। ତେବେ ଏଥିରେ ସମ୍ପୃକ୍ତ କାଠମିଲ୍ ମାଲିକ ସୁରେନ୍ଦ୍ର କୁମାର ମହାରଣାଙ୍କୁ ଗିରଫ କରାଯାଇଛି। ଏହି କ୍ରମରେ କଟକ ଫରେଷ୍ଟ ଡିିଭିଜନ ଅଧୀନ ଡାଳିଯୋଡ଼ା ରେଞ୍ଜରେ ଲଘୁ ଖଣିଜ ଦ୍ରବ୍ୟ ସଂଶୋଧନ ଆଇନ ୨୦୦୪ ଓ ୨୦୧୬ର ଧାରା-୪ ଅନୁଯାୟୀ ୧୭ ନମ୍ବରରେ ଏକ ମାମଲା ରୁଜୁ ହୋଇଛି। ସେହିପରି କେନ୍ଦ୍ରାପଡ଼ା ରେଞ୍ଜରେ ଓଟିଟି ଆଇନ-୧୯୮୦ର ଉଲ୍ଲଂଘନରେ ୧୧/୨୦୨୨-୨୩ରେ ମାମଲା ରୁଜୁ କରି ଉଭୟ ମାମଲାର ଅଧିକ ତଦନ୍ତ ଜାରି ରହିଛି ବୋଲି କଟକ ଭିଜିଲାନ୍ସ ନିର୍ଦ୍ଦେଶାଳୟ ପକ୍ଷରୁ ଏକ ବିଜ୍ଞପ୍ତିରେ ସୂଚନା ଦିଆଯାଇଛି।
ସୂଚନାଯୋଗ୍ୟ, ଯାଜପୁର ଜିଲା ଡାଳିଯୋଡ଼ା ରେଞ୍ଜ ଅଧୀନ କୁସୁନପୁର, ବଳରାମପୁର ଆଦି ଜଙ୍ଗଲ ଜମିରୁ ବିପୁଳ ପରିମାଣରେ ବେଆଇନ ଭାବେ କଳାପଥର ଉତ୍ତୋଳନ ହେଉଛି। ଏହି ଜଙ୍ଗଲ ଜମିରୁ ଦୈନିକ ପ୍ରାୟ ୨୦୦ରୁ ଊର୍ଦ୍ଧ୍ୱ ଗାଡିରେ ୫୩ ନମ୍ବର ଜାତୀୟ ରାଜପଥ ଦେଇ ବିନା ଟ୍ରାନ୍ଜିଟ୍ ପାସ୍ କିମ୍ବା ନକଲି ଟ୍ରାନ୍ଜିଟ୍ ପାସ୍ରେ ଜଗତସିଂହପୁର, କେନ୍ଦ୍ରାପଡ଼ା, କଳିଙ୍ଗନଗର, ସୁକିନ୍ଦା, କେନ୍ଦୁଝର ଆଦି ଅଞ୍ଚଳକୁ ପରିବହନ ହେଉଛି। ଏପରିକି ଓଭରଲୋଡିଂ ପରିବହନ ହେଉଥିଲେ ହେଁ ଚଣ୍ଡିଖୋଲ ପରିବହନ ବିଭାଗ ମାସିକ ଚାନ୍ଦା ନେଇ ଆଖି ବୁଜିଦେଉଛି। ଏହି ବେଆଇନ କାରବାରରେ ଜଙ୍ଗଲ, ପୋଲିସ, ପରିବହନ ଓ ରାଜସ୍ବ ବିଭାଗର କେତେଜଣ ଅଧିକାରୀ, କର୍ମଚାରୀ ସହଯୋଗ କରି ଆସୁଛନ୍ତି। ପୂର୍ବରୁ ଏହା ବିରୋଧରେ ବଳରାମପୁରଗଡ଼ ବାସିନ୍ଦା ପ୍ରାକୃତିକ ସୌନ୍ଦର୍ଯ୍ୟ ନଷ୍ଟ ହେବା ସହ ଲୋକଙ୍କ ଜୀବନଚର୍ଯ୍ୟା ପ୍ରଭାବିତ ହେଉଥିବା ଦଶର୍ର୍ାଇ ହାଇକୋର୍ଟଙ୍କ ଦ୍ୱାରସ୍ଥ ହୋଇଛନ୍ତି। ହେଲେ କଳେବଳେ କୌଶଳେ ଜଙ୍ଗଲ ଜମିରୁ ବେଆଇନ କଳାପଥର ଉତ୍ତୋଳନ ହେବା ସହ ତାହା ଅଣାୟତ୍ତ ହେବାରେ ଲାଗିଛି। କଟକ ଭିଜିଲାନ୍ସ ବିଭାଗର ଏହି ପଦକ୍ଷେପକୁ ପ୍ରଶଂସା କରିବା ସହ ଆଗକୁ ଏହା ଜାରି ରହିଲେ ଅଞ୍ଚଳର ସବୁଜିମା ସୁରକ୍ଷିତ ରହି ପାରିବ ବୋଲି ଅଞ୍ଚଳବାସୀ ଦାବି କରିଛନ୍ତି।
