ନୀଳଗିରି,୨୯।୪:(ସ୍ବ.ପ୍ର) ବାଲେଶ୍ୱର ଜିଲା ନୀଳଗିରି ବ୍ଲକ ଅଧୀନ ଛତ୍ରପୁରରୁ ପିଠାହତା ପଞ୍ଚାୟତକୁ ସଂଯୋଗ କରୁଥିବା ନିର୍ମାଣାଧିନ ଏକ ପୋଲ ପାଇଁ ବାଧକ ସାଜିଛି ବେଆଇନ ଇଟାଭାଟି। ଅଞ୍ଚଳବାସୀ ଏହାକୁ ବିରୋଧ କରିବା ସହ ଉପ ଜିଲାପାଳଙ୍କୁ ଲିଖିତ ଭାବେ ଜଣାଇଛନ୍ତି। ସୂଚନା ଅନୁଯାୟୀ, ଖୁଁଟାଡିହା ଓ ପିଠାହତାକୁ ସଂଯୋଗ କରୁଥିବା ତରତରି ନାଳ ନିକଟରେ ବେଆଇନ ଭାବେ ଜଣେ ବ୍ୟକ୍ତି ଚଦର ଇଟାଭାଟି କରି ପ୍ରଶାସନ ଆଖିରେ ଧୂଳି ଦେଇ ଲକ୍ଷାଧିକ ଟଙ୍କାର ରାଜସ୍ବ ଫାଙ୍କି ଚାଲିଛନ୍ତି। ଏବେ ୨ଟି ଇଟାଭାଟି କରିଥିବା ଦେଖିବାକୁ ମିଳିଛି। ଏପଟେ ଉଭୟ ପଞ୍ଚାୟତକୁ ଯାତାୟାତ ପାଇଁ ବାଲେଶ୍ୱର ଡ୍ରେନେଜ ବିଭାଗ ପକ୍ଷରୁ ୫ ବର୍ଷ ପୂର୍ବରୁ ଦେଢ଼ କୋଟିରୁ ଉଦ୍ଧର୍ବ ଟଙ୍କା ବ୍ୟୟରେ ଏକ ପୋଲ ନିର୍ମାଣ ସମ୍ପୂର୍ଣ୍ଣ ହୋଇଥିବା ବେଳେ ଇଟାଭାଟି ମାଲିକ ପୋଲର ଶେଷମୁଣ୍ଡରେ ଇଟାଭାଟି କରି ଯାତାୟତ କରୁଥିବା ରାସ୍ତାକୁ ଅବରୋଧ କରିଥିବା ଅଭିଯୋଗ ଆଣିଛନ୍ତି ଅଞ୍ଚଳବାସୀ। ଫଳରେ ଉଭୟ ଛତ୍ରପୁର ଓ ପିଠାହତା ପଞ୍ଚାୟତର ଅଧିବାସୀମାନଙ୍କ ଯାତାୟତରେ ବାଧା ସୃଷ୍ଟି ହେଉଛି। ସମ୍ପୃକ୍ତ ଇଟାଭାଟି ମାଲିକ ନିଜସ୍ବ ଜାଗା କହୁଥିବା ବେଳେ ଡ୍ରେନେଜ୍ ବିଭାଗ ପୋଲ ନିର୍ମାଣ କରିବା ପୂର୍ବରୁ ସରଜମିନ ତଦନ୍ତ କରିଥିଲା କି, ଯଦି ବିଭାଗୀୟ ଅଧିକାରୀମାନେ ସରଜମିନ ତଦନ୍ତ ଠିକ୍ ଭାବେ କରିଥିଲେ ତେବେ ବ୍ୟକ୍ତିିଗତ ଜାଗା ଆସିଲା କିପରି ବୋଲି ପ୍ରଶ୍ନ ଉଠିଛି। ପୋଲ ନିର୍ମାଣର ଦିଗ ଯଦି ପରିବର୍ତ୍ତନ କରାଯାଇଥାନ୍ତା ତାହେଲେ ଏହି ସମସ୍ୟା ଉପୁଜି ନ ଥାନ୍ତା ବୋଲି ସାଧାରଣରେ ମତ ପ୍ରକାଶ ପାଇଛି। ଏନେଇ ଉପ-ଜିଲାପାଳ ଉଭୟ ପଞ୍ଚାୟତବାସୀଙ୍କ ସମୂହ ସ୍ବାର୍ଥକୁ ଦୃଷ୍ଟିରଖି ଉପଯୁକ୍ତ ପଦକ୍ଷେପ ନେବାକୁ ଦାବି ହୋଇଛି।
