ଜମନକିରା,୧୭ା୧(ଡି.ଏନ.ଏ.): ଜମନକିରା ବ୍ଲକ ଭୋଜପୁର ପଞ୍ଚାୟତ କୁଇଲାରିଯୋର ପଥର ଖଣିରେ ଗତ କିଛିମାସ ହେବ ବେଆଇନ ଭାବେ ପଥର ବ୍ଲାଷ୍ଟିଂ ଓ କ୍ରଶିଂ ଚାଲିଛି। ପ୍ରଶାସନ ଏ ଦିଗରେ ପଦକ୍ଷେପ ନ ନେଲେ ଅଞ୍ଚଳବାସୀ ଆନ୍ଦୋଳନାତ୍ମକ ପନ୍ଥା ଗ୍ରହଣ କରିବେ ବୋଲି ଚେତାବନୀ ଦେଇଛନ୍ତି।
ସୂଚନା ଅନୁଯାୟୀ, କୁଇଲାରିଜୋର ଗାଁ ନିକଟରେ ଅନେକ ପଥରଖଣି ରହିଛି। ୨୦୨୧ ମସିହାରେ ଜଣେ ବ୍ୟକ୍ତି ଏହାକୁ ୩ ବର୍ଷ ଲାଗି ଲିଜ୍ ନେଇଛନ୍ତି। ନିୟମ ଅନୁସାରେ ବ୍ଲାଷ୍ଟିଂ ପାଇଁ ପରିବେଶ ପ୍ରଦୂଷଣ ବୋର୍ଡର ସ୍ବତନ୍ତ୍ର ଅନୁମତି ଦରକାର। ପଥର କ୍ରଶିଂ ହେଉଥିବା ଅଞ୍ଚଳରେ ପରିବେଶ ସନ୍ତୁଳନ ପାଇଁ ପାଣି ସିଞ୍ଚନ, ବୃକ୍ଷ ରୋପଣ କରିବା, ଗାଁ ଓ ବସ୍ତିଠାରୁ ଅଧାକିଲୋମିଟର ଦୂରରେ ଖନନ, ରାଜରାସ୍ତାଠାରୁ ଅତି କମରେ ୫ଶହ ମିଟର ଦୂରତାରେ ପଥର କ୍ରଶିଂ କରିବା କଥା। କିନ୍ତୁ ଏଠାରେ ଏହାର ବ୍ୟତିକ୍ରମ ପରିଲକ୍ଷିତ ହେଉଛି। କେତେଜଣ ପ୍ରଶାସନିକ ଅଧିକାରୀଙ୍କୁ ହାତବାରିଶି କରି କିମ୍ବା ସେମାନଙ୍କୁ ସୁହାଇଲା ଭଳି ସମ୍ପୃକ୍ତ ବ୍ୟକ୍ତିମାନେ ଏଭଳି ବେଆଇନ କାମ କରିଚାଲିଛନ୍ତି। ଏହାଦ୍ବାରା ଖଣି ଚାରିପଟେ ଥିବା ଏକର ଏକର ଜମି ପ୍ରଭାବିତ ହେଉଛି। ଲୋକଙ୍କ କଷ୍ଟୋପାର୍ଜିତ ଅମଳ ଜମିରେ ହିଁ ନଷ୍ଟ ହୋଇଯାଉଛି। କୁଇଲାରିଯୋର ଗାଁ ଲୋକେ ଏ ନେଇ ଜିଲା ପ୍ରଶାସନର ଦୃଷ୍ଟି ଆକର୍ଷଣ କରିଥିଲେ ମଧ୍ୟ କୌଣସି ସୁଫଳ ମିଳୁ ନ ଥିବା ଅଭିଯୋଗ କରିଛନ୍ତି। ତୁରନ୍ତ ଏହାକୁ ବନ୍ଦ ନ କଲେ ଆନ୍ଦୋଳନ କରାଯିବ ବୋଲି ଅଞ୍ଚଳବାସୀ ପ୍ରକାଶ କରିଛନ୍ତି। ଏ ସମ୍ପର୍କରେ ଜମନକିରା ତହସିଲଦାର ବ୍ରଜ କିଶୋର ସାହୁଙ୍କୁ ପଚାରିବାରୁ ସେ ଲିଜ୍ରେ ନେଇଥିବା କଥାକୁ ସ୍ବୀକାର କରିଥିଲେ ମଧ୍ୟ ପଥର ବ୍ଲାଷ୍ଟିଂ ଓ କ୍ରଶିଂ ହେଉଥିବା ବିଷୟରେ ଧାରଣା ନାହିଁ ବୋଲି କହିଥିଲେ।
