ବଲାଙ୍ଗୀର ଅଫିସ, ୭ା୧୧: ବଲାଙ୍ଗୀର ଜିଲାରେ ଲୋୟର ସୁକ୍ତେଲ ବୃହତ୍ ଜଳସେଚନ ପ୍ରକଳ୍ପ ନିର୍ମାଣ କାମ ଜୋରସୋରରେ ଚାଲିଛି। ଏହି ପ୍ରକଳ୍ପରେ ୨୯ଟି ଗାଁ ପ୍ରଭାବିତ ହେବ। ସେଥିରୁ କେତେକ ଗାଁ ସମ୍ପୂର୍ଣ୍ଣ ଜଳମଗ୍ନ ହେବ ଏବଂ କିଛି ଗାଁ ଆଂଶିକ ଜଳମଗ୍ନ ହେବ। ତେବେ ଏହି ପ୍ରକଳ୍ପ ଦ୍ୱାରା ପ୍ରଭାବିତ ଲୋକଙ୍କୁ ଅନ୍ୟତ୍ର ଥଇଥାନ ପ୍ରକ୍ରିୟା ଜାରି ରହିଛି। ଏଭଳି ସମୟରେ ଯେଉଁ ସବୁ ଗାଁ ଜଳମଗ୍ନ ହେବ ସେଇ ଗାଁ ଅଙ୍ଗନୱାଡି କର୍ମୀମାନେ ଚାକିରି ହରାଇବା ଆଶଙ୍କା କରି ସୋମବାର ଜିଲାପାଳଙ୍କୁ ଭେଟି ଅଭିଯୋଗ କରିଛନ୍ତି। ସେମାନଙ୍କୁ ଉଚିତ୍ ଥଇଥାନ କରିବା ଦାବି ନେଇ ଦାବିପତ୍ର ପ୍ରଦାନ କରିଛନ୍ତି। ଲୋୟର ସୁକ୍ତେଲ ପ୍ରକଳ୍ପ ପାଇଁ ବିଭିନ୍ନ ପ୍ରଭାବିତ ଗାଁରେ ଏବେ ବିସ୍ଥାପନ ପ୍ରକ୍ରିୟା ଜାରି ରହିଛି। ଏଭଳି ସମୟରେ ଏହି ଗଁାଗୁଡିକର ଅଙ୍ଗନୱାଡି କର୍ମୀମାନେ ଚାକିରି ହରାଇବା ଆଶଙ୍କା କରିଛନ୍ତି। ପ୍ରକଳ୍ପ ପ୍ରଭାବିତ ଖୁଣ୍ଟପାଲି, ଢ଼ୁଲୁସର, ଚୁଡାପାଲି, ଖଗସାବାହାଲ, ବଡତେଲେନପାଲି, ସାନତେନେପାଲି, ଗର୍ଜନ, ବରପିଟା, କୁଟେନସିଲେଟ, କଙ୍କରା, କୁମିଆପାଲି, କବିଲବାହାଲ, ଧରୁଆପାଲି, ବୁଡାବାହାଲ, ଅନ୍ତପାଲି, ବୁଢ଼ାବାହାଲ, ଡୁଙ୍ଗୁରିପାଲି, ବନଛୋରପାଲି, ବରପିଟା, ବିଜାପାଟି ଗାଁ ଅଙ୍ଗନୱାଡି କର୍ମୀମାନେ ଚାକିରି ହରାଇବା ଆଶଙ୍କା ବୃଦ୍ଧି ପାଇଛି। ଅଙ୍ଗନୱାଡିମାନେ କହିଛନ୍ତି ଯେ, ସେମାନଙ୍କ ଗାଁ ଗୁଡିକ ବୁଡିଯିବା ପରେ ସେମାନେ କେଉଁଠି କାର୍ଯ୍ୟ କରିବେ। ଏଦିଗରେ ପ୍ରଶାସନ ବିଚାର କରି ଉଚିତ୍ ପଦକ୍ଷେପ ନେବାକୁ ଜିଲାପାଳଙ୍କୁ ନିବେଦନ କରିଛନ୍ତି। ଉଚିତ୍ ଥଇଥାନ କରା ନ ଗଲେ ଏହି ଅଙ୍ଗନୱାଡି କର୍ମୀଙ୍କ ପରିବାରଗୁଡିକ ଅସୁବିଧାର ସମ୍ମୁଖୀନ ହେବେ ବୋଲି ଅଭିଯୋଗ କରିଛନ୍ତି। ଏଦିଗରେ ସହୃଦୟତାର ସହ ବିଚାର କରିବା ଉଚିତ୍ ବୋଲି ସେମାନେ ଅନୁରୋଧ ଜଣାଇଛନ୍ତି।
