ଭୁବନେଶ୍ୱର,୧୮ା୬(ବ୍ୟୁରୋ): ବିଶ୍ୱ ପ୍ରସିଦ୍ଧ ରଥଯାତ୍ରା ପାଇଁ ଶନିବାର ସ୍ବତନ୍ତ୍ର ସମୀକ୍ଷା ବୈଠକ ଅନୁଷ୍ଠିତ ହୋଇଯାଇଛି। ବୈଠକ ପରେ ଉନ୍ନୟନ କମିଶନର ପ୍ରଦୀପ ଜେନା କରୋନା ଲକ୍ଷଣ ଥିଲେ କେହି ରଥଯାତ୍ରା ଦେଖିବାକୁ ଆସନ୍ତୁ ନାହିଁ ନିବେଦନ କରିଛନ୍ତି।
ଆଜି ପୁରୀ ଟାଉନ ହଲ୍ରେ ମହାପ୍ରଭୁଙ୍କ ରଥଯାତ୍ରା ପାଇଁ ଅନୁଷ୍ଠିତ ସମନ୍ବୟ ବୈଠକରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭର୍ଚୁଆଲ ଅଧ୍ୟକ୍ଷତା କରିଥିଲେ। ବୈଠକ ପରେ ଉନ୍ନୟନ କମିଶନର କହିଛନ୍ତି, ଆଲୋଚନା ବେଳେ ମୁଖ୍ୟମନ୍ତ୍ରୀ କହିଛନ୍ତି, କରୋନା ଭୟ ସମ୍ପୂର୍ଣ୍ଣ ଭାବେ ଦୂର ହୋଇନାହିଁ। ବର୍ତ୍ତମାନ ସୁଦ୍ଧା ରାଜ୍ୟରେ କରୋନା ମାମଲା ବାହାରୁଛି। ମାତ୍ରା ଟିକେ କମ୍ ଥିବାରୁ ଚଳିତବର୍ଷ ପୂଜା ପର୍ବ ପାଳନ ପାଇଁ ଅନୁମତି ଦିଆଯାଇଛି। ଚଳିତବର୍ଷ ଭକ୍ତଙ୍କ ଗହଣରେ ମହାପ୍ରଭୁଙ୍କ ରଥଯାତ୍ରା କରାଯିବାକୁ ନିଷ୍ପତ୍ତି ନିଆଯାଇଛି। ତେଣୁ ସମସ୍ତେ ସତର୍କ ରୁହନ୍ତୁ। ମାସ୍କ ପିନ୍ଧନ୍ତୁ। ପାଖରେ ସାନିଟାଇଜର ରଖନ୍ତୁ। ମଝିରେ ମଝିରେ ହାତ ସାନିଟାଇଜ୍ କରନ୍ତୁ। କରୋନା ଲକ୍ଷଣ (ଜ୍ୱର, ଥଣ୍ଡା, କାଶ) ହେଉଥିଲେ ମହାପ୍ରଭୁଙ୍କ ଯାତ୍ରାକୁ ନ ଆସିବାକୁ ରାଜ୍ୟବାସୀଙ୍କୁ ସେ ଅନୁରୋଧ କରିଛନ୍ତି।
