ଭୁବନେଶ୍ୱର,୧୭।୧୦(ବ୍ୟୁରୋ): ଦାଦାବଟି ବା ବଳପୂର୍ବକ ଚାନ୍ଦା ମାଗିଲେ କଡ଼ା କାର୍ଯ୍ୟାନୁଷ୍ଠାନ ହେବ। ଏପରି କି ଜାତୀୟ ନିରାପତ୍ତା ଆଇନ(ଏନ୍ଏସ୍ଏ) ଲଗାଯିବା ସହ ଆବଶ୍ୟକ ପଡିଲେ ତଡ଼ିପାର କରାଯିବ। ଦାଦାବଟି ମାଗୁଥିବା ବ୍ୟକ୍ତିଙ୍କୁ ଏପରି କଡା ଚେତାବନୀ ଦେଇଛନ୍ତି ପୋଲିସ କମିଶନର ସୁଧାଂଶୁ ଷଡ଼ଙ୍ଗୀ। ଏମାନଙ୍କ ଉପରେ ନଜର ରଖିବା ସହ ଦାଦା ବଟି ଆଦାୟ ରୋକିବାକୁ ଅତିରିକ୍ତ ପୋଲିସ କମିଶନର ରେଖା ଲୋହାନୀଙ୍କ ନେତୃତ୍ୱରେ ଆଣ୍ଟି-ଏକଷ୍ଟର୍ନଶନ ଟାସ୍କ ଫୋର୍ସ ଗଠନ ହୋଇଛି। ଏହି ଟାସ୍କ ଫୋର୍ସକୁ କ୍ୟୁଏଟି ସହାୟତା କରିବ ବୋଲି ଷଡ଼ଙ୍ଗୀ ସୂଚନା ଦେଇଛନ୍ତି।
ସେ କହିଛନ୍ତି, ଅନେକ ସମୟରେ ଦାଦାବଟି ଦେଉଥିବା ଲୋକେ ପୋଲିସର ସହାୟତା ନେବାକୁ ଡରୁଛନ୍ତି। ତେଣୁ ଏହି ଟାସ୍କ ଫୋର୍ସକୁ ଲୋକେ ସୂଚନା ଦେଲେ ସେମାନଙ୍କ ନାମ ଗୋପନ ରଖାଯାଇ କାର୍ଯ୍ୟାନୁଷ୍ଠାନ ନିଅଯିବ। ଲୋକଙ୍କୁ ପ୍ରୋତ୍ସାହିତ କରିବା ସହ ଆବଶ୍ୟକ ସୁରକ୍ଷା ଯୋଗାଇ ଦେବାକୁ ପ୍ରତି ଥାନା ସ୍ତରରେ ଓ ଡିସିପିଙ୍କ ସ୍ତରରେ ବିଭିନ୍ନ ବର୍ଗଙ୍କ ସହ ବୈଠକ କରାଯାଇ ଆବଶ୍ୟକ ପଦକ୍ଷେପ ନିଆଯିବ। ଆସନ୍ତା ସୋମବାରଠାରୁ ଗୋଟିଏ ଆଣ୍ଟି-ଏକଷ୍ଟର୍ନଶନ ବା ଦାଦାବଟି ବିରୋଧରେ ହେଲ୍ପଲାଇନ୍ ଜାରି କରାଯିବ। ଲୋକେ ଏହାମାଧ୍ୟମରେ ଦାଦାବଟି ସମ୍ପର୍କିତ ସୂଚନା ଗୋପନୀୟ ଭାବେ ଫୋନ୍, ଏସ୍ଏମ୍ଏସ୍, ହ୍ବାଟ୍ସଆପ୍, ଟେଲିଗ୍ରାମ ଦ୍ୱାରା ଦେଇପାରିବେ। ଯେଉଁମାନଙ୍କ ଖବର ଉପରେ ପୋଲିସ କାର୍ଯ୍ୟାନୁଷ୍ଠାନ ଗ୍ରହଣ କରିବାରେ ସଫଳ ହେବ ସେମାନଙ୍କ ନାମ ଗୋପନ ରଖାଯିବା ସହ ସେମାନଙ୍କୁ ପୁରସ୍କୃତ କରାଯିବ। ଏହାସହ ଏହା ବିରୋଧରେ ଯେଉଁ ଥାନା ଅଧିକାରୀ ଭଲ କାର୍ଯ୍ୟାନୁଷ୍ଠାନ ନେବେ ତାଙ୍କୁ ମଧ୍ୟ ପୁରସ୍କୃତ କରାଯିବ ବୋଲି ପୋଲିସ କମିଶନର ସୁଧାଂଶୁ ଷଡ଼ଙ୍ଗୀ କହିଛନ୍ତି।
କଟକ ଅଫିସ,୧୭।୧୦: ଦୋକାନବଜାରଠାରୁ ଆରମ୍ଭ କରି ଶପିଂ ମଲ୍ରୁ ଆଦାୟ ହେଉଛି ଦାଦାବଟି। ପାର୍ବଣ ସମୟରେ ଏହି ବେଆଇନ କାର୍ଯ୍ୟ ଅଧିକମାତ୍ରାରେ ହୋଇଥାଏ। କରୋନା କଟକଣା ଯୋଗୁ ପାର୍ବଣ ଆୟୋଜନ ବଡ଼ଧରଣରେ ହେଉ ନ ଥିଲେ ସୁଦ୍ଧା ଆପରାଧିକ ବ୍ୟକ୍ତିମାନଙ୍କର ଦାଦାବଟି ଆଦାୟ ବନ୍ଦ ହୋଇ ନ ପାରେ। ଏହାକୁ ଦୃଷ୍ଟିରେ ରଖି ଦାଦାବଟି ଆଦାୟକାରୀଙ୍କ ଉପରେ ତୀକ୍ଷ୍ଣ ଦୃଷ୍ଟି ରଖିବାକୁ ନିର୍ଦ୍ଦେଶ ଦେଇଛନ୍ତି ଡିଜିପି ଅଭୟ। କଟକ ପୋଲିସ ମୁଖ୍ୟାଳୟରେ ଶୁକ୍ରବାର ଅପରାହ୍ନରେ ଏ ନେଇ ଏକ ସମୀକ୍ଷା ବୈଠକ ଅନୁଷ୍ଠିତ ହୋଇଥିଲା। ବଳପୂର୍ବକ ଚାନ୍ଦା ଆଦାୟ କରୁଥିବା ବ୍ୟକ୍ତିଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ବୈଠକରେ ନିର୍ଦ୍ଦେଶ ଦିଆଯାଇଛି। ଏହାଛଡ଼ା କଟକ-ଭୁବନେଶ୍ୱରରେ ସଙ୍ଗଠିତ ଅପରାଧକୁ ହ୍ରାସ କରିବା ପାଇଁ ଆଲୋଚନା ହୋଇଛି। ଏହି ଦୁଇଟି ସହରରେ ଶାନ୍ତିଶୃଙ୍ଖଳାରେ କିପରି ଦଶହରା ସମାପନ ହେବ ସେ ପ୍ରସଙ୍ଗ ମଧ୍ୟ ଉପସ୍ଥାପନ କରାଯାଇଥିଲା। ବୈଠକରେ ପୋଲିସ କମିଶନର ସୁଧାଂଶୁ ଷଡ଼ଙ୍ଗୀ, ଅତିରିକ୍ତ ଆରକ୍ଷୀ ମହାନିର୍ଦ୍ଦେଶକ (କ୍ରାଇମ୍), ଗୋଇନ୍ଦା ନିର୍ଦ୍ଦେଶକ, ଅତିରିକ୍ତ ଆରକ୍ଷୀ ମହାନିର୍ଦ୍ଦେଶକ (ଆଇନ୍ଶୃଙ୍ଖଳା), ଆଇଜି (ଆଇନଶୃଙ୍ଖଳା) ଓ ଉଭୟ କଟକ, ଭୁବନେଶ୍ୱରର ଡିସିପି ଉପସ୍ଥିତ ଥିଲେ।
