ନ୍ୟୁୟର୍କ, ୪।୯: ସାମୁଦ୍ରିକ ଝଡ଼ ଇଦା ପ୍ରଭାବରେ ଆମେରିକାର ୬ଟି ରାଜ୍ୟ କ୍ଷତିଗ୍ରସ୍ତ ହେବା ସହ ୫୦ ଜଣଙ୍କର ମୃତ୍ୟୁ ଘଟିଛି। ବାତ୍ୟା ପ୍ରଭାବରେ ପ୍ରବଳ ବର୍ଷା ହେବାରୁ କନେକ୍ଟିକଟ, ମେରିଲାଣ୍ଡ, ନ୍ୟୁଜର୍ସି, ନ୍ୟୁୟର୍କ, ପେନ୍ସିଲ୍ଭାନିଆ ଏବଂ ଭର୍ଜିନିଆର ରାଜ୍ୟର ଅନେକ ଅଞ୍ଚଳ ଜଳମଗ୍ନ ହୋଇଛି। ନ୍ୟୁୟର୍କରେ ଏଭଳି ବର୍ଷା କେବେ ହୋଇ ନ ଥିଲା। ବର୍ଷାରେ ବହୁ ଆପାର୍ଟମେଣ୍ଟର ତଳମହଲା ବୁଡ଼ିଯାଇଛି ଏବଂ ସହରରେ ନଦୀର ଭ୍ରମ ସୃଷ୍ଟି ହୋଇଛି। ଅନେକ କାର ପାଣିରେ ବୁଡ଼ିଯାଇଥିବା ଦେଖାଯାଇଛି। ନ୍ୟୁଜର୍ସିରେ ସର୍ବାଧିକ ୨୩ ଜଣଙ୍କ ମୃତ୍ୟୁ ହୋଇଛି। ବର୍ଷାପାଣିରେ ଗାଡ଼ି ବୁଡ଼ିଯିବା ଯୋଗୁ ଅଧିକାଂଶଙ୍କର ମୃତ୍ୟୁ ଘଟିଥିବା କୁହାଯାଉଛି। ଅନେକ ଲୋକ ନିଖୋଜ ଥିବା ଜଣେ ଅଧିକାରୀ କହିଛନ୍ତି। ନ୍ୟୁୟର୍କରେ ଜରୁରୀ ସ୍ଥିତି ଘୋଷଣା କରାଯାଇଛି। ଫିଲାଡେଲ୍ଫିଆରେ ରାସ୍ତା ପାଣିରେ ବୁଡ଼ି ରହିଥିବାରୁ ଟ୍ରେନ୍ ଓ ବସ୍ ସେବା ବିଳମ୍ବିତ ହୋଇଛି। ବିଭିନ୍ନ ସ୍ଥାନରେ ଯାତ୍ରୀମାନେ ଅଟକି ରହି ନାହିଁ ନ ଥିବା ଅସୁବିଧାର ସମ୍ମୁଖୀନ ହୋଇଛନ୍ତି। କର୍ମଚାରୀମାନଙ୍କୁ ଘରୁ କାମ କରିବା ପାଇଁ କୁହାଯାଇଛି।
