ବ୍ରହ୍ମପୁର ଅଫିସ,୭ା୩: ବ୍ରହ୍ମପୁର ମହାନଗର ନିଗମ (ବିଏମ୍ସି) ପାଇଁ ଭାଜପାର ମେୟର ପ୍ରାର୍ଥୀ ହେଲେ ଡ.ସବିତା ସୁଆର। ରାଜ୍ୟ କାର୍ଯ୍ୟାଳୟରୁ ତାଙ୍କ ନାମ ରବିବାର ଘୋଷଣା କରାଯାଇଛି। କାହାକୁ ପ୍ରାର୍ଥୀ ଚୟନ କରାଯିବ, ସେନେଇ ଭାଜପାରେ ଯେଉଁ କଳ୍ପନା ଜଳ୍ପନା ଚାଲିଥିଲା ଶେଷ ମୁହୂର୍ତ୍ତରେ ତା’ର ଅନ୍ତ ଘଟିଛି। ସୋମବାର ସେ ନାମାଙ୍କନ ଦାଖଲ କରିବାର କାର୍ଯ୍ୟକ୍ରମ ରହିଛି। ଅପରପକ୍ଷରେ ବିଜେଡି ପରେ ଭାଜପାର ନାମ ଘୋଷଣା ହୋଇଥିବା ବେଳେ ରବିବାର ସୁଦ୍ଧା କଂଗ୍ରେସରୁ କାହାକୁ ପ୍ରାର୍ଥୀ କରାଯିବ ତାହା ଅସ୍ପଷ୍ଟ ରହିଛି। ୩ ଜଣଙ୍କ ନାମ ପ୍ରଦେଶ କଂଗ୍ରେସକୁ ପଠାଯାଇଛି ଏବଂ ରାତିସୁଦ୍ଧା ଜଣଙ୍କ ନାମ ଅନୁମୋଦିତ ହେବାର ଜିଲା କଂଗ୍ରେସ କାର୍ଯ୍ୟାଳୟ ପକ୍ଷରୁ କୁହାଯାଇଛି।
ଭାଜପାର ପ୍ରାର୍ଥୀ ଘୋଷଣା ପରେ ଯୋଗାଯୋଗ ବେଳେ ଧରିତ୍ରୀକୁ ସୁଆର କହିଛନ୍ତି, ଦୀର୍ଘ ଦୁଇ ଦଶନ୍ଧି ହେବ ସେ ଭାଜପାରେ ସକ୍ରିୟ ଅଛନ୍ତି ଏବଂ କେନ୍ଦ୍ରରେ ଦଳ ସରକାର ଗଠନ ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଆଦର୍ଶରେ ଅନୁପ୍ରାଣିତ ହୋଇ ବିଭିନ୍ନ ସେବା ଓ ଶିକ୍ଷାର ବିସ୍ତାର ନିମନ୍ତେ କାର୍ଯ୍ୟ କରୁଛନ୍ତି। ସୁଆର ବ୍ରହ୍ମପୁରରେ ଥିବା ଏକ ଘରୋଇ କଲେଜର ଅଧ୍ୟକ୍ଷା ଅଛନ୍ତି। ମେୟର ଭାବେ ମହାନଗରବାସୀ ତାଙ୍କୁ ନିର୍ବାଚିତ କଲେ ଲୋକଙ୍କ ମୌଳିକ ସମସ୍ୟା ସମାଧାନକୁ ଗୁରୁତ୍ୱ ଦେବେ ଏବଂ ବିପର୍ଯ୍ୟସ୍ତ ରାସ୍ତାଘାଟ, ପାନୀୟ ଜଳ ଯୋଗାଣ କ୍ଷେତ୍ରରେ ଓ ସ୍ବାସ୍ଥ୍ୟ ସେବାରେ ଉନ୍ନତି କରିବାର ଦର୍ଶାଇଛନ୍ତି। ତାଙ୍କ ସ୍ବାମୀ ମଧ୍ୟ ଭାଜପାର ଜଣେ ଜଣାଶୁଣା ନେତା।
ଭାଜପାର ବରିଷ୍ଠ ନେତା ଏବଂ ଗତ ସାଧାରଣ ନିର୍ବାଚନରେ ବ୍ରହ୍ମପୁର ବିଧାୟକ ପ୍ରାର୍ଥୀ କାହ୍ନୁ ଚରଣ ପତି କହିଛନ୍ତି, ସୁଆରଙ୍କୁ ରାଜ୍ୟ ସଂଗଠନ ପକ୍ଷରୁ ପ୍ରାର୍ଥୀ ମନୋନୀତ କରାଯିବା ସ୍ବାଗତଯୋଗ୍ୟ ପଦକ୍ଷେପ। ସାମାନ୍ୟ ବିଳମ୍ବ ହୋଇଥିଲେ ମଧ୍ୟ ଜଣେ ଉଚ୍ଚଶିକ୍ଷିତା ମହିଳାଙ୍କୁ ମେୟର ପ୍ରାର୍ଥୀ ମନୋନୀତ କରାଯାଇଛି। ମହାନଗରବାସୀ ତାଙ୍କୁ ଆଶୀର୍ବାଦ କରି ଜିତାଇଲେ ରେଶମ ନଗରୀର ବିକାଶ ତ୍ୱରାନ୍ବିତ ହେବ ଓ ପୌର ଶାସନରେ ସ୍ବଚ୍ଛତା ଆସିପାରିବାର ପତି ଆଶା ପ୍ରକଟ କରିଛନ୍ତି। ପତି ଦଳର ବ୍ରହ୍ମପୁର ପୌର ନିର୍ବାଚନ ପରିଚାଳନା ଦାୟିତ୍ୱରେ ଅଛନ୍ତି।
