ଭାସ୍କୋ, ୨।୧୨-
ଆରିଡାନେ ସାଣ୍ଟାନାଙ୍କ ପରେ ପ୍ରତିପକ୍ଷ ଷ୍ଟିଫେନ୍ ଏଜେଙ୍କ ଗୋଲ ଯୋଗୁ ବୁଧବାର ହାଇଦ୍ରାବାଦ୍ ଏଫ୍ସି ଓ ଜାମଶେଦପୁର ଏଫସି ମଧ୍ୟରେ ଅନୁଷ୍ଠିତ ଇଣ୍ଡିଆନ ସୁପରଲିଗ୍ (ଆଇଏସ୍ଏଲ୍) ମ୍ୟାଚ ୧-୧ ଗୋଲରେ ଡ୍ର ରହିଛି। ଫଳରେ ଉଭୟ ଦଳ ପଏଣ୍ଟ ଭାଗ କରିଛନ୍ତି। ଟୁର୍ନାମେଣ୍ଟରେ ଏପର୍ଯ୍ୟନ୍ତ ଅପରାଜେୟ ରହିଥିବା ହାଇଦ୍ରାବାଦ ୩ ମ୍ୟାଚରୁ ୧ ବିଜୟ ଓ ୨ ଡ୍ର ସହ ୫ପଏଣ୍ଟ ପାଇ ଟେବୁଲର ୪ର୍ଥ ସ୍ଥାନକୁ ଉନ୍ନୀତ ହୋଇଛି। ଓଡ଼ିଶା ଏଫସିକୁ ୧-୦ ଗୋଲରେ ହରାଇ ଅଭିଯାନ ଆରମ୍ଭ କରିଥିବା ହାଇଦ୍ରାବାଦ ଏହାର ଦ୍ୱିତୀୟ ମ୍ୟାଚକୁ ବେଙ୍ଗାଲୁରୁ ଏଫସି ସହିତ ଗୋଲଶୂନ୍ୟ ଡ୍ର ରଖିଥିଲା। ଅନ୍ୟପକ୍ଷରେ ୩ ମ୍ୟାଚରୁ ୨ ଡ୍ର ଓ ୧ ପରାଜୟ ସହ ଜାମଶେଦପୁର ଟେବୁଲର ୮ମ ସ୍ଥାନରେ ରହିଛି।
ମ୍ୟାଚଟି ବେଶ୍ ସଂଘର୍ଷପୂର୍ଣ୍ଣ ହୋଇଥିଲା। ତେବେ ଫିନିଶିଂ ଠିକ୍ଭାବେ ହୋଇ ନ ପାରିବାରୁ ପ୍ରଥମାର୍ଦ୍ଧ ଗୋଲଶୂନ୍ୟ ରହିଥିଲା। ଦ୍ୱିତୀୟାର୍ଦ୍ଧ ଆରମ୍ଭର ଅଳ୍ପସମୟ ପରେ ୫୦ତମ ମିନିଟରେ ଆରିଡାନେ ସାଣ୍ଟାନା ଗୋଲ ଦେଇ ହାଇଦ୍ରାବାଦକୁ ଅଗ୍ରଣୀ କରାଇଥିଲେ। ବାମ ପଟରୁ ବଲ୍ ନେଇ ଆସିଥିବା ହଲିଚରଣ ନାର୍ଜାରେ ଜାମଶେଦପୁରର ଲାଲଡିନଲିଆନା ରେନ୍ଥଲେଇଙ୍କୁ ଚକ୍ମା ଦେଇ ବକ୍ସ ମଧ୍ୟରେ ପ୍ରବେଶ କରିଥିଲେ। ମାତ୍ର ପଓ୍ବନ କୁମାର ତାଙ୍କୁ ରୋକିବାରୁ ବଲ୍ ସାଣ୍ଟାନାଙ୍କ ନିକଟକୁ ଚାଲି ଆସିଥିଲା। ସାଣ୍ଟାନା ଏହାକୁ ନେଟ୍ ମଧ୍ୟକୁ ପ୍ରବେଶ କରାଇବାରେ ସଫଳ ହୋଇଥିଲେ। ଗୋଲ ପରିଶୋଧ ପାଇଁ ଜାମସେଦପୁରର ଉଦ୍ୟମ ଜୋରଦାର ହୋଇଥିଲା। ୮୫ତମ ମିନିଟରେ ଷ୍ଟିଫେନ ଏଜେ ଗୋଲ ଦେବାରୁ ମ୍ୟାଚ ୧-୧ ସ୍ଥିତିକୁ ଚାଲି ଆସିଥିଲା। ନେରିଜୁସ ଭ୍ଲାସକିସ୍ ପାସ୍ ପାଇବାପରେ ବଲ୍କୁ ନିୟନ୍ତ୍ରଣରେ ରଖି କ୍ରସ୍ ଶଟ୍ ମାରିଥିଲେ। ମାତ୍ର ଚିଙ୍ଗଲେନସାନା ସିଂ ହେଡ୍ ଜରିଆରେ ତାହାକୁ କ୍ଲିୟର କରିଥିଲେ। ବଲ୍ ଓ୍ବିଲିୟମ ଲାଲନୁନ୍ଫେଲାଙ୍କ ନିକଟରେ ପଡ଼ିଥିଲା। ସେ ତାହାକୁ ଏଜେଙ୍କ ନିକଟରୁ ପଠାଇ ଦେଇଥିଲେ। ନାଇଜେରିଆନ ଏଜେ ପ୍ରତିପକ୍ଷ ଲକ୍ଷ୍ମୀକାନ୍ତ କାଟିମନିଙ୍କୁ ଅତିକ୍ରମ କରି ଗୋଲ ଦେବାରେ ସଫଳ ହୋଇଥିଲେ। ଗୋଲକିପର ପ୍ରତିରୋଧ କରିବାକୁ ସମୟ ପାଇ ନ ଥିଲେ। ଜାମସେଦପୁରର ରେନ୍ଥଲେଇ ପାସ୍ ଅଫ୍ ଦି ମ୍ୟାଚ ଏବଂ ହାଇଦ୍ରାବାଦର ମହମ୍ମଦ ୟାସିର ହିରୋ ଅଫ ଦି ମ୍ୟାଚ ପୁରସ୍କାର ହାସଲ କରିଥିଲେ।
