ବଣାଇଁ,୩୦ା୫(ସ୍ବ.ପ୍ର.): ସୁନ୍ଦରଗଡ଼ ଜିଲା ବଣାଇ ଥାନା ଅନ୍ତର୍ଗତ ବାବୁ ନୂଆଗଁା ଗ୍ରାମରେ ରବିବାର ରାତିରେ ଘଟିଛି ଏକ ଅଭାବନୀୟ ଘଟଣା। ସ୍ତ୍ରୀଙ୍କ ଚରିତ୍ରକୁ ସନ୍ଦେହ କରି ଠେଙ୍ଗାରେ ପିଟି ମାରିଦେବା ପରେ ଘର ପଛପଟେ ମୃତଦେହକୁ ସ୍ବାମୀ ପୋତିଦେଇଥିବା ନେଇ ଅଭିଯୋଗ ହୋଇଛି। ହତ୍ୟାର ଶିକାର ମହିଳା ହେଲେ ସରସ୍ବତୀ କିସାନ(୩୦)। ବଣାଇ ପୋଲିସ ପୋତା ଯାଇଥିବା ମୃତଦେହ ଜବତ କରି ଉପଖଣ୍ଡ ଚିକିତ୍ସାଳୟକୁ ବ୍ୟବଚ୍ଛେଦ ପାଇଁ ପଠାଇଛି। ଏ ନେଇ ଥାନାରେ ଏକ ମାମଲା (୧୦୦/୨୩) ରୁଜୁ ହୋଇଛି। ଅଭିଯୁକ୍ତ ସ୍ବାମୀ ତ୍ରିଲୋଚନ କିସାନ (୩୩)ଙ୍କୁ ଗିରଫ କରି ସୋମବାର କୋର୍ଟ ଚାଲାଣ କରିଛି ପୋଲିସ। ହତ୍ୟାରେ ବ୍ୟବହୃତ କୋଦାଳ ବେଣ୍ଟ ଓ ମୃତାଙ୍କ ଲୁଗା ଜବତ ହୋଇଛି।
ପୋଲିସ ସୂଚନା ଅନୁସାରେ ଆଠବର୍ଷ ତଳେ ତ୍ରିଲୋଚନଙ୍କ ସହ ସରସ୍ବତୀଙ୍କ ବିବାହ ହୋଇଥିଲା। ଏହି ଦମ୍ପତିି ଦିନ ମଜୁରିଆଭାବେ କାମ କରୁଥିଲେ। ଘରେ ଦେଶୀ ମଦ ରଖି ବିକ୍ରି କରୁଥିଲେ। ଏଥିପାଇଁ ତାଙ୍କ ଘରେ ନିଶା ସେବନକାରୀଙ୍କ ଆତଯାତ ଥିଲା। ତାଙ୍କର ୩ଟି ପୁଅ ଅଛନ୍ତି। ହେଲେ ଗତ କିଛି ଦିନ ହେଲା ଉଭୟଙ୍କ ମଧ୍ୟରେ ସମ୍ପର୍କ ଭଲ ରହୁ ନ ଥିଲା। ତ୍ରିଲୋଚନ ସ୍ତ୍ରୀଙ୍କ ଚରିତ୍ରକୁ ଆକ୍ଷେପ କରି ଗାଳିଗୁଲଜ କରୁଥିଲେ। ରବିବାର ରାତିରେ କୌଣସି କାରଣକୁ ନେଇ ଉଭୟଙ୍କ ମଧ୍ୟରେ ପୁଣି ବଚସା ହୋଇଥିଲା। ଏଥିରେ ଉତ୍ୟକ୍ତ ହୋଇ ତ୍ରିଲୋଚନ ଏକ କୋଦାଳ ବେଣ୍ଟରେ ସରସ୍ବତୀଙ୍କୁ ନିସ୍ତକୁ ପିଟି ଥିଲେ। ମରି ଯାଇଥିବା ଜାଣିବା ପରେ ବିଳମ୍ବିତ ରାତିରେ ସ୍ତ୍ରୀଙ୍କ ମୃତଦେହକୁ ଘର ପଛପଟ ବାଡ଼ିରେ ଥିବା ଏକ କଦଳୀ ଗଛ ମୂଳରେ ପୋତି ଦେଇଥିଲେ। ଏନେଇ ଗ୍ରାମବାସୀ ପୋଲିସକୁ ଖବର ଦେଇଥିଲେ। ପୋଲିସ ଘଟଣାସ୍ଥଳରେ ପହଞ୍ଚି ଅଭିଯୁକ୍ତ ସ୍ବାମୀଙ୍କୁ ଥାନାକୁ ଆଣି ପଚରାଉଚରା କରିବା ପରେ ସେ ସବୁ ସତ କଥା ମାନି ଯାଇଥିଲେ। ମାଜିଷ୍ଟ୍ରେଟଙ୍କ ଉପସ୍ଥିତିରେ ପୋଲିସ, ସାଇଣ୍ଟିଫିକ୍ ଦଳ ମୃତଦେହକୁ ମାଟି ତଳୁ ବାହାର କରିଥିଲା।
