ବେତନଟୀ,୧।୧୧(ସ୍ବ.ପ୍ର.): ସମ୍ପର୍କୀୟକୁ ହତ୍ୟା କରି ଭୋଗିଥିଲେ ୧୪ ବର୍ଷ ଜେଲଦଣ୍ଡ । ଚାରି ମାସ ତଳେ ଘରକୁ ଫେରି ପୁଣି ସ୍ତ୍ରୀଙ୍କୁ ନିର୍ମମ ଭାବେ କରିଛନ୍ତି ହତ୍ୟା। ଏଭଳି ଚାଞ୍ଚଲ୍ୟକାର ଘଟଣା ଦେଖିବାକୁ ମିଳିଛି ମୟୂରଭଞ୍ଜ ଜିଲା ବୈଶିଙ୍ଗା ଥାନା ଅଧୀନ ଆମ୍ବଗଡ଼ିଆ ପଞ୍ଚାୟତର ପୁରୁଣାପାଣି ଗ୍ରାମରେ । ମୃତ ମହିଳା ହେଲେ ବୈଶାଖୀ ସିଂ(୫୫) l ଅଭିଯୁକ୍ତ ପତ୍ନୀହନ୍ତା ସ୍ବାମୀ ଗୌରମୋହନ ସିଂ(୬୫)ଙ୍କୁ ପୋଲିସ ଗିରଫ କରିଛି । ତେବେ ପ୍ରାଥମିକ ତଦନ୍ତରୁ ସେ ସ୍ତ୍ରୀଙ୍କ ଚରିତ୍ରକୁ ସନ୍ଦେହ କରି ଶୋଇଥିବା ସମୟରେ କୁରାଢ଼ୀରେ ହାଣି ଅତି ବିଭତ୍ସ ଭାବେ ହତ୍ୟା କରିଥିବା ଜଣାପଡ଼ିଛି।
ସୂଚନାନୁଯାୟୀ, ସବୁଦିନ ପରି ସୋମବାର ରାତିରେ ଗୌରମୋହନ ଓ ପରିବାର ଲୋକ ଖାଇପିଇ ଶୋଇବାକୁ ଯାଇଥିଲେ l ଗୋଟିଏ କୋଠରୀରେ ଗୌରମୋହନ ଓ ବୈଶାଖୀ ଏକତ୍ର ଶୋଇଥିଲେ। ରାତି ପ୍ରାୟ ୩ଟା ସମୟରେ ଅଭିଯୁକ୍ତ ସ୍ବାମୀ ନିଦରୁ ଉଠି କିଛି ସମୟ ବସିଥିଲେ। କିଛି ଭାବିବା ପରେ ପାଖରେ ଥିବା ଏକ କୁରାଢ଼ି ଆଣି ବୈଶାଖୀଙ୍କ ମୁଣ୍ଡକୁ ନିଜ ବଳ ଅନୁଯାଇ ପ୍ରହାର କରିଥିଲେ। ଫଳରେ ବୈଶାଖୀଙ୍କ ମୁଣ୍ଡରେ ଗଭୀର କ୍ଷତ ସୃଷ୍ଟି ହୋଇ ପ୍ରବଳ ରକ୍ତସ୍ରାବ ହୋଇଥିଲା । ଅଳ୍ପ ସମୟ ମଧ୍ୟରେ ଘଟଣା ସ୍ଥଳରେ ହିଁ ତାଙ୍କର ପ୍ରାଣବାୟୁ ଉଡିଯାଇଥିଲା । ହେଲେ ଗୌରମୋହନ ସ୍ତ୍ରୀଙ୍କ ଶବ ପାଖରେ ସକାଳ ହେବା ପର୍ଯ୍ୟନ୍ତ ସେମିତି ଜଗି ବସିଥିଲେ l ସକାଳ ହେବା ପରେ ବୈଶାଖୀଙ୍କ ସାନପୁଅ କମଳାକାନ୍ତ ଘର କବାଟ ଖୋଲିବାକୁ କବାଟ ବାଡେଇ ଥିଲେ। ବାପା କବାଟ ଖୋଲିଲା ପରେ ନିଜ ମା’ଙ୍କ ରକ୍ତ ଜୁଡୁବୁଡୁ ମରଶରୀରକୁ ଦେଖି ହତବାକ୍ ହୋଇଯାଇଥିଲେ ପୁଅ କମଳାକାନ୍ତ। ପରେ ବାପାକୁ ଅଟକ ରଖି ପାଖ ସେ ପଡୋଶୀଙ୍କୁ ଡାକିବା ସହିତ ସଙ୍ଗେ ସଙ୍ଗେ ବୈଶିଙ୍ଗା ପୋଲିସକୁ ଖବର ଦେଇଥିଲେ। ଖବର ପାଇ ଥାନା ଅଧିକାରୀ ପ୍ରଭାଂଶୁ ଶେଖର ମିଶ୍ର ସଦଳବଳ ଘଟଣା ସ୍ଥଳରେ ପହଞ୍ଚି ମୃତଦେହ ସହିତ ମାରଣାସ୍ତ୍ର ଓ ରକ୍ତଭିଜା କମଳ ଜବତ କରିଥିଲେ। ଏଥିସହ ପତ୍ନୀହନ୍ତା ଗୌରମୋହନକୁ ଗିରଫ କରିଥିଲେ। ଏନେଇ ପୁଅ କମଳାକାନ୍ତଙ୍କ ଲିଖିତ ଅଭିଯୋଗ ପରେ ଅଭିଯୁକ୍ତ ଗୌରମୋହନକୁ କୋର୍ଟ ଚାଲାଣ କରି ପୋଲିସ ଘଟଣା ସମ୍ପର୍କରେ ଅଧୀକ ତଦନ୍ତ କରୁଛି ।
ସୂଚନାଯୋଗ୍ୟ, ୨୦୦୬ରେ ବାଲେଶ୍ୱର ଜିଲା ରାଇବଣିଆ ଥାନା ଅଞ୍ଚଳରେ ନିଜ ସମ୍ପର୍କୀୟକୁ ହତ୍ୟା କରି ୧୪ ବର୍ଷ ଜେଲ ଦଣ୍ଡ ଭୋଗିଥିଲେ ଗୌରମୋହନ। ଏଇମାତ୍ର ଚାରି ମାସ ତଳେ ଜେଲରୁ ସେ ମୁକୁଳିଥିଲେ।
