ନୂଆଦିଲ୍ଲୀ,୧୪।୮: ଖାଦ୍ୟର ସ୍ବାଦ ବଢ଼ାଇବା ପାଇଁ ଲୁଣ ଅତ୍ୟନ୍ତ ଜରୁରୀ। କିନ୍ତୁ ଲୁଣର ପରିମାଣ ଉପରେ ନଜର ରଖିବା ମଧ୍ୟ ସେତିକି ଗୁରୁତ୍ୱପୂର୍ଣ୍ଣ। ପ୍ରତିଦିନ ଆବଶ୍ୟକତାଠାରୁ ଅଧିକ ଲୁଣ ଖାଇବାର ଅଭ୍ୟାସ ଧୀରେ ଧୀରେ ସ୍ବାସ୍ଥ୍ୟ ଉପରେ ଖରାପ ପ୍ରଭାବ ପକାଇପାରେ।
ବିଶ୍ୱ ସ୍ବାସ୍ଥ୍ୟ ସଂଗଠନ (WHO) ଅନୁସାରେ, ଜଣେ ବୟସ୍କ ବ୍ୟକ୍ତି ଦିନକୁ ୫ ଗ୍ରାମରୁ କମ୍ ଲୁଣ ଖାଇବା ଉଚିତ। ଅର୍ଥାତ୍ ପ୍ରାୟ ଏକ ଛୋଟ ଚାମଚରୁ କମ୍ ଲୁଣ। ଏହା ପ୍ରାୟ ୨୦୦୦ ମିଲିଗ୍ରାମ ସୋଡିୟମ ସହ ସମାନ। ଲୁଣରେ ଥିବା ସୋଡିୟମ ଶରୀର ପାଇଁ ଆବଶ୍ୟକ। ଏହା ଶରୀରରେ ତରଳ ପଦାର୍ଥର ସନ୍ତୁଳନ ବଜାୟ ରଖିବା ସହ ଶରୀରର ବିଭିନ୍ନ କାର୍ଯ୍ୟକୁ ସଠିକ ଭାବେ ଚାଲିବାରେ ସାହାଯ୍ୟ କରେ। କିନ୍ତୁ ଏହାର ମାତ୍ରା ଆବଶ୍ୟକତାଠାରୁ ବହୁତ ଅଧିକ ହେଲେ ସ୍ବାସ୍ଥ୍ୟ ସମସ୍ୟାର ଆଶଙ୍କା ବଢ଼ିପାରେ।
WHOର ସୂଚନା ଅନୁସାରେ, ବିଶ୍ୱରେ ଲୋକମାନେ ହାରାହାରି ପ୍ରତିଦିନ ପ୍ରାୟ ୪୨୭୮ ମିଲିଗ୍ରାମ ସୋଡିୟମ, ଅର୍ଥାତ୍ ପ୍ରାୟ ୧୧ ଗ୍ରାମ ଲୁଣ ଗ୍ରହଣ କରୁଛନ୍ତି। ଏହା WHO ପକ୍ଷରୁ ସୁପାରିସ କରାଯାଇଥିବା ସୀମାଠାରୁ ଦୁଇଗୁଣରୁ ମଧ୍ୟ ଅଧିକ।
ଅଧିକ ଲୁଣ ଖାଇଲେ କ’ଣ ହୁଏ?
ବ୍ଲଡ ପ୍ରେସର ବଢ଼ିପାରେ: ଅଧିକ ଲୁଣ ଖାଇବା ଦ୍ୱାରା ରକ୍ତଚାପ ବଢ଼ିପାରେ। ଦୀର୍ଘ ସମୟ ଧରି ହାଇ ବ୍ଲଡ ପ୍ରେସର ରହିଲେ ହୃଦୟ ଉପରେ ଅଧିକ ଚାପ ପଡ଼ିଥାଏ।
ହୃଦ୍ରୋଗର ବିପଦ: ଅଧିକ ସୋଡିୟମ ଗ୍ରହଣ ଓ ଉଚ୍ଚ ରକ୍ତଚାପ ହୃଦ୍ରୋଗର ଆଶଙ୍କା ବଢ଼ାଇପାରେ। ତେଣୁ ହୃଦୟର ସୁସ୍ଥତା ପାଇଁ ଖାଦ୍ୟରେ ଲୁଣର ପରିମାଣ କମ୍ ରଖିବା ଜରୁରୀ।
ଷ୍ଟ୍ରୋକ୍ର ବିପଦ: ଦୀର୍ଘ ସମୟ ଧରି ଅଧିକ ସୋଡିୟମ ଗ୍ରହଣ କରିବା ଏବଂ ଏଥିରୁ ବଢ଼ୁଥିବା ରକ୍ତଚାପ ଷ୍ଟ୍ରୋକ ଓ ଅନ୍ୟ ହୃଦ୍ରୋଗର ଆଶଙ୍କା ବଢ଼ାଇପାରେ।
କିଡନୀ ଉପରେ ପ୍ରଭାବ: WHO ଅନୁସାରେ, ଅଧିକ ସୋଡିୟମ ଥିବା ଖାଦ୍ୟ କିଡନୀ ରୋଗ ସମେତ ବିଭିନ୍ନ ସ୍ବାସ୍ଥ୍ୟ ସମସ୍ୟାର ବିପଦ ବଢ଼ାଇପାରେ।
ଅନ୍ୟ ସମସ୍ୟାର ଆଶଙ୍କା: ଅଧିକ ସୋଡିୟମ ଗ୍ରହଣ ଗ୍ୟାଷ୍ଟ୍ରିକ କ୍ୟାନ୍ସର ଓ ଅଷ୍ଟିଓପୋରୋସସର ବଢ଼ିଥିବା ବିପଦ ସହ ମଧ୍ୟ ଜଡ଼ିତ। ଏହା ବ୍ୟତୀତ ଶରୀରରେ ଫୁଲା ଭଳି ସମସ୍ୟା ମଧ୍ୟ ଦେଖାଦେଇପାରେ।
ଖାଦ୍ୟର ସ୍ବାଦ ପାଇଁ ଲୁଣ ଜରୁରୀ ହେଲେ ମଧ୍ୟ ଏହାର ପରିମାଣ ନିୟନ୍ତ୍ରଣ କରିବା ଦରକାର। ବିଶେଷକରି ଚିପ୍ସ, ନୁଡୁଲ୍ସ, ପ୍ୟାକେଟ ଫୁଡ, ଆଚାର ଓ ଅଧିକ ଲୁଣ ଥିବା ପ୍ରସ୍ତୁତ ଖାଦ୍ୟ କମ ଖାଇବା ଭଲ। ଦିନକୁ ୫ ଗ୍ରାମରୁ କମ୍ ଲୁଣ ଖାଇବା ସ୍ବାସ୍ଥ୍ୟ ପାଇଁ ଭଲ ବୋଲି WHO ପରାମର୍ଶ ଦେଇଛି।
