ଯାଜପୁର ଅଫିସ,୭।୧୨: ଗତ ଅଗଷ୍ଟରେ ହୋଇଥିବା ପ୍ରଳୟଙ୍କରୀ ବନ୍ୟାକୁ ୩ ମାସ ଅତିକ୍ରାନ୍ତ ହୋଇଛି। ଏଥିରେ ଯାଜପୁର ଜିଲାର ୨ ପକ୍କା ଘର ସମ୍ପୂର୍ଣ୍ଣ ଧ୍ୱଂସ ହୋଇଥିବାବେଳେ ୧୭୦୮ ପକ୍କା ଘର ଅଧିକ ମାତ୍ରାରେ, ୩୧୯ ପକ୍କା ଘର ଆଂଶିକ, ୨୧୧୧୬ କଚ୍ଚା ଘର ଆଂଶିକ ଭାବେ, ୩୪୪୧ କୁଡିଆ ଓ ୧୪୮୯୦ ଗୁହାଳ କ୍ଷତିଗ୍ରସ୍ତ ହୋଇଥିଲା। ଏଥିପାଇଁ ଜିଲାକୁ ଘର ଭଙ୍ଗା ସାହାଯ୍ୟ ବାବଦକୁ ଅଗ୍ରିମ ଭାବେ ୩୨ କୋଟି ୧ ଲକ୍ଷ ୪୨ ହଜାର ୬୦୦ ଟଙ୍କା ମିଳିଛି। କିନ୍ତୁ ପ୍ରକୃତ କ୍ଷତିଗ୍ରସ୍ତ ଲୋକେ ଏଯାଏ ଟଙ୍କାଟିଏ ବି ପାଇନାହାନ୍ତି। ଏହିମର୍ମରେ ଯାଜପୁର ବ୍ଲକ ଏରବାଙ୍କ ଗ୍ରାମ ପଞ୍ଚାୟତର ଇନ୍ଦାରୋଇ, ବାଙ୍କସାହି, ଏରବାଙ୍କ, ରଘୁନାଥପୁର, କାନପୁର, କଳସପୁର ଆଦି ଗ୍ରାମର ଲୋକେ ଘରଭଙ୍ଗା ସାହାଯ୍ୟ ଯୋଗାଇଦେବାକୁ ଜିଲାପାଳଙ୍କ ଦୃଷ୍ଟି ଆକର୍ଷଣ କରିଛନ୍ତି। ଜିଲାପାଳଙ୍କୁ ଦେଇଥିବା ଏକ ସ୍ମାରକପତ୍ରରେ କ୍ଷତିଗ୍ରସ୍ତ ଲୋକ ଦର୍ଶାଇଛନ୍ତି ଯେ, ଯାହାର ଘର ଭାଙ୍ଗିଛି ସେମାନଙ୍କ ଘରଭଙ୍ଗା ସହଯୋଗ ତାଲିକାରେ ନାମ ନାହିଁ। ସରକାରଙ୍କ ତରଫରୁ ମିଳିଥିବା ତାରପୋଲିନରେ ଘରଭଙ୍ଗା ଲୋକ ଏବେ ବି ଆଶ୍ରୟ ନେଇଛନ୍ତି। କଳସପୁର ରାଜସ୍ବ ନିରୀକ୍ଷକ (ଆରଆଇ) ଆସି ଫଟୋ ଉଠାଇ ସର୍ଭେ କରି ନେଇଛନ୍ତି। କିନ୍ତୁ କୌଣସି ସହଯୋଗ ଏଯାଏ ମିଳି ନଥିବାରୁ ଖୋଲା ଆକାଶ ତଳେ ଶୀତ ମାସରେ ବହୁ କଷ୍ଟରେ ଦିନ କଟୁଛି। ସ୍ମାରକପତ୍ରରେ ବୈଷ୍ଣବଚରଣ ଦାସ, ପର୍ଶୁରାମ ଦାସ, କାହ୍ନୁଚରଣ ଦାସ, ଚନ୍ଦ୍ରମଣି ମଲ୍ଲିକ, ଧୀରେନ୍ଦ୍ର ମଲ୍ଲିକ, ନୀଳମଣି ଦାସ, ନିରଞ୍ଜନ ଦାସ, ଅଜୟ କୁମାର କିଶୋର ଦାସ, ରୀତିରଞ୍ଜନ ଦାସ, ଅଶୋକ ଦାସ, ପଦ୍ମନାଭ ଦାସ, ଗୟାଧର ଦାସ, ବିଳାସ ଜେନା ପ୍ରମୁଖଙ୍କ ସ୍ବାକ୍ଷର ରହିଛି। ଏହି କ୍ଷତିଗ୍ରସ୍ତ ପରିବାରମାନେ ଏଯାଏ ମୁଣ୍ଡ ଗୁଞ୍ଜିବାକୁ ରାହା ଖୋଜୁଛନ୍ତି। ଖୁବ୍ଶୀଘ୍ର ଘରଭଙ୍ଗା ସହାୟତା କ୍ଷତିଗ୍ରସ୍ତ ଲୋକଙ୍କୁ ମିଳିବ ବୋଲି ଜିଲାପାଳ ଚକ୍ରବର୍ତ୍ତୀ ସିଂ ରାଠୋର ପ୍ରତିଶ୍ରୁତି ଦେଇଥିବା ଆବେଦନକାରୀମାନେ ପ୍ରକାଶ କରିଛନ୍ତି।
