ରାୟଗଡ଼ା,୧୫।୨(ସ୍ବ.ପ୍ର.): ରାୟଗଡ଼ା ରେଳ ଡିଭିଜନର ଉନ୍ନତିକରଣ ଏବଂ ନିର୍ମାଣ କାର୍ଯ୍ୟ ତ୍ୱରାନ୍ବିତ ପାଇଁ ରେଳ ବିଭାଗ ଜମିରେ ଗଢ଼ି ଉଠିଥିବା ବସ୍ତିର ଉଚ୍ଛେଦ ପ୍ରକ୍ରିୟା ଆରମ୍ଭ ହୋଇଛି। ରେଲ୍ଓ୍ବେ ଅଧୀନସ୍ଥ ଜମିରେ ଗଢ଼ି ଉଠିଥିବା କୋଇଲାପଡ଼ା ବସ୍ତିବାସିନ୍ଦାଙ୍କୁ ଚଳିତ ମାସ ୨୨ ତାରିଖ ସୁଦ୍ଧା ସ୍ଥାନ ଖାଲି କରିବାକୁ ନିର୍ଦେଶ ଦିଆଯାଇଛି। ଏହାପରେ ଯଦି ସେମାନେ ଖାଲି ନ କରନ୍ତି ତେବେ ରେଲ୍ଓ୍ବେ କର୍ତ୍ତୃପକ୍ଷ ବାଧ୍ୟହୋଇ ଜବରଦଖଲ ଉଚ୍ଛେଦ କରିବେ ବୋଲି ଚେତାବନି ଦେଇଛନ୍ତି। ଏହି ନିର୍ଦ୍ଦେଶନାମା ୱାଲଟିୟର ଡିଭିଜନ ଇଷ୍ଟେଟ ଅଫିସରୁ ଆସିଛି। ମଙ୍ଗଳବାର ରେଲ୍ଓ୍ବେର ୫ କର୍ମଚାରୀ ଆସି ଖାଲି ପଡ଼ିଥିବା ୩ ଘରକୁ ଭାଙ୍ଗିଦେଇଛନ୍ତି। ଉଚ୍ଛେଦ ହୋଇଥିବା ଘର ଗୁଡ଼ିକ ନାରସାମ୍ମା, ସନିଆ ଶବର ଓ ମାଣିକ ନାଗଙ୍କର ବୋଲି ଜଣାପଡ଼ିଛି। ଏଥିସହ ଆଗାମୀ ୨୨ ସୁଦ୍ଧା ସେଠାରେ ବସବାସ କରୁଥିବା ସମସ୍ତ ବାସିନ୍ଦାଙ୍କୁ ଘର ଖାଲି କରିବାକୁ ନିର୍ଦ୍ଦେଶ ଦେଇଛନ୍ତି।
ସୂଚନାଯୋଗ୍ୟ, ରାୟଗଡ଼ା ରେଳ ଡିଭିଜନ ରୂପେ ଘୋଷଣା ହୋଇଥିଲେ ମଧ୍ୟ ବସ୍ତିବାସିନ୍ଦାଙ୍କ ଥଇଥାନକୁ ନେଇ କାର୍ଯ୍ୟ ମନ୍ଥର ଗତିରେ ଚାଲିଛି। ରେଳବାଇ ଅଧୀନସ୍ଥ ବହୁ ଜମିରେ ବେଆଇନ ବସ୍ତି ଗଢ଼ି ଉଠିଛି ା ପ୍ରାୟ ୨୫ ରୁ ୩୦ ବର୍ଷ ଧରି ଲୋକ ସେଠାରେ ବସବାସ କରୁଛନ୍ତି। ତେବେ ସେମାନଙ୍କୁ ପୂର୍ବରୁ ସ୍ଥାନ ଖାଲି କରିବା ପାଇଁ ସମୟ ପ୍ରଦାନ ସହ ବହୁବାର ନୋଟିସ ଜାରି କରିଥିଲେ। ହେଲେ ଅଦ୍ୟାବଧି ତାହା ଖାଲି ହୋଇନାହିଁ। ଅପରପକ୍ଷେ ଉକ୍ତ ସ୍ଥାନ ରେଲ୍ଓ୍ବେର ହୋଇଥିବା ବେଳେ ରାଜ୍ୟ ସରକାର ସେମାନଙ୍କୁ ଜାଗା ମିଶନ ଯୋଜନାରେ କିଭଳି ପ୍ରମାଣ ପତ୍ର ପ୍ରଦାନ କଲେ ତାହା ତଦନ୍ତ ସାପେକ୍ଷ। ଉକ୍ତ କୋଇଲାପଡ଼ା ବସ୍ତି ରେଳ ବିଭାଗ ଜମିରେ ଗଢ଼ି ଉଠିଥିବା ବେଳେ ସେଠାରେ ୧୨୬ ଘର ରହିଛି। ସେମାନଙ୍କୁ ପାନୀୟ ଜଳ ଓ ବିଦ୍ୟୁତ୍ ସଂଯୋଗ ସହ ଅନ୍ୟ ସରକାରୀ ସୁବିଧା ମଧ୍ୟ ଯୋଗାଇ ଦିଆଯାଇଛି। କେଉଁଠି ନଗର ବିଭାଗ ତ କେଉଁଠି ପଞ୍ଚାୟତିରାଜ ବିଭାଗ ପକ୍ଷରୁ ଲକ୍ଷାଧିକ ଟଙ୍କା ଖର୍ଚ୍ଚ କରାଯାଇଛି। ହେଲେ ଏବେ ସେଠାରୁ ନିଜର ଛୋଟ ଛୋଟ ପିଲାଙ୍କୁ ନେଇ ବସ୍ତିବାସିନ୍ଦା କେଉଁଆଡ଼େ ଯିବେ ସେ ଚିନ୍ତାରେ ଦିନ କାଟୁଛନ୍ତି। ତେବେ ସେମାନଙ୍କୁ ଉକ୍ତ ସ୍ଥାନ ଛାଡ଼ି ଅନ୍ୟତ୍ର ସ୍ଥାନାନ୍ତର ପାଇଁ ବହୁବାର ନୋଟିସ ଦିଆଯାଇଥିଲେ ମଧ୍ୟ ଜିଲା ପ୍ରଶାସନ ପକ୍ଷରୁ ସେମାନଙ୍କୁ ସ୍ଥାନାନ୍ତର ପାଇଁ ଜାଗା ଚିହ୍ନଟ କରାଯାଇ ନ ଥିବାରୁ ସେମାନେ ସ୍ଥାନ ଛାଡ଼ି ଯାଇ ନ ଥିବା ବସ୍ତିବାସିନ୍ଦା ପ୍ରକାଶ କରିଛନ୍ତି। ଏ ନେଇ ରାୟଗଡ଼ା ତହସିଲଦାର ତାପସ ରାଉତଙ୍କୁ ପଚାରିବାରୁ ସେମାନଙ୍କ ପାଇଁ ଜମି ଚିହ୍ନଟ ପ୍ରକ୍ରିୟା ଚାଲିଛି ବୋଲି କହିଛନ୍ତି। ଯୋଗ୍ୟ ହିତାଧିକାରୀଙ୍କୁ ସରକାରୀ ଜାଗାରେ ଥଇଥାନର ବ୍ୟବସ୍ଥା କରାଯିବ ବୋଲି ତହସିଲଦାର ରାଉତ କହିଛନ୍ତି।
