ବର୍ନ: ଦୁନିଆରେ ବୁଲିବା ପାଇଁ ଅନେକ ସ୍ଥାନ ରହିଛି। ଯେଉଁଠି କିଛି ସମୟ ଶାନ୍ତିରେ ବିତାଇବାକୁ ଲୋକେ ଯାଇଥାନ୍ତି। ସବୁଠୁ ପସନ୍ଦର ସ୍ଥାନ ହେଲା ସବୁଜ ବନାନୀ ମଧ୍ୟରେ ଥିବା ନିରୋଳା ଜାଗା। ଏହାକୁ ଦମ୍ପତିମାନେ ସବୁଠୁ ଅଧିକ ପସନ୍ଦ କରନ୍ତି। ବିଶେଷ କରି ସୁନ୍ଦର ହୋଟେଲ ଦମ୍ପତିଙ୍କ ପ୍ରଥମ ପସନ୍ଦ ହୋଇଥାଏ। ତେବେ ଏମିତି ଏକ ହୋଟେଲ ରହିଛି ଯେଉଁଠି ଛାତ ନାହିଁ କି ପାଚେରି ନ ଥିଲେ ବି ତାହା ଲୋକଙ୍କ ପ୍ରିୟ ସ୍ଥାନ ପାଲଟିଛି। ଏହି ହୋଟେଲର ନାମ ହେଉଛି ‘ନଲ ଷ୍ଟର୍ନ’। ଏହା ସୁଇଜରଲାଣ୍ଡରେ ଅଛି। ଏହା ଏକ ଓପନ ଏୟାର ହୋଟେଲ। ଯେଉଁଥିରେ କେବଳ କୋଠରି ଅଛି। ଏଠାରେ
ରହୁଥିବା ଲୋକଙ୍କୁ ଖୋଲାରେ ଶୋଇବାକୁ ପଡ଼େ।
୨୦୧୬ରେ ଏଠାରେ ଗୋଟିଏ ବେଡ୍ ସହ ହୋଟେଲଟି ଆରମ୍ଭ ହୋଇଥିଲା। ସମୁଦ୍ର କୂଳରୁ ୬,୪୬୩ ଫୁଟ ଉଚ୍ଚରେ ଥିବା ଏହି ହୋଟେଲରେ ଗୋଟିଏ ରାତି ରହିବାକୁ ୧୭,୦୦୦ ଟଙ୍କା ଦେବାକୁ ପଡ଼ିଥାଏ। ମାତ୍ର ଏଠାରେ ରହିବାକୁ ହେଲେ ଉତ୍ତମ ଋତୁ ଦରକାର। ଭଲ ଋତୁ ହେଲେ ବହୁ ସଂଖ୍ୟାରେ ବୁକିଂ ହୋଇଥାଏ। ଆର୍ଟିଷ୍ଟ ଫ୍ରେକ ଏବଂ ରିକଲିନ ଏହି ହୋଟେଲ ନିର୍ମାଣ କରିଛନ୍ତି। ଏହି ହୋଟେଲରେ ଖୋଲା ଆକାଶ ତଳେ ବେଡ ରହିଛି। ଏଠାରେ ଟଏଲେଟ ବି ନାହିଁ। ପର୍ଯ୍ୟଟକମାନେ ଏଠାରୁ କିଛି ଦୂରରେ ଥିବା ସାଧାରଣ ଟଏଲେଟ ବ୍ୟବହାର କରିଥାନ୍ତି। ଚତୁଃପାର୍ଶ୍ୱରେ ପାହାଡ଼ ଘେରା ଏହି ସ୍ଥାନ ବହୁତ ସୁନ୍ଦର। ଏଠାକୁ ଆସୁଥିବା ପର୍ଯ୍ୟଟକମାନଙ୍କୁ ପ୍ରଥମେ ବେଡ୍ ବୁକ୍ କରିବାକୁ ପଡ଼ିଥାଏ। କରୋନା ମହାମାରୀ ସମୟରେ ଏଠାରେ ବୁକିଂ ବନ୍ଦ କରିଦିଆଯାଇଛି। ଏହାର ସୂଚନା ହେଟେଲର ଅଫିସିଆଲ ଓ୍ବେବ୍ସାଇଟ୍ରେ ଅପଲୋଡ କରିଦିଆଯାଇଛି। ଏଥିରେ ଲେଖାଅଛି, ୨୦୨୧ରେ ହୋଟେଲ ପାଇଁ ବୁକିଂ ହୋଇପାରିବ ନାହିଁ।
