ଭଞ୍ଜନଗର,୧୮।୪(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ଠାକୁରାଣୀ ଯାତ୍ରା ଆସନ୍ତା ୨୬ ତାରିଖରୁ ଆରମ୍ଭ ହେଉଛି। ଯାତ୍ରା ସମୟରେ ଟ୍ରାଫିକ ନିୟନ୍ତ୍ରଣ କରିବା ଏବଂ ହୋଟେଲ ଗୁଡିକରେ ଯେଭଳି ଭଲ ଖାଦ୍ୟ ମିଳିବ, ସେଥିପାଇଁ ପ୍ରଶାସନ, ପୋଲିସ, ମ୍ୟୁନିସିପାଲଟି ପକ୍ଷରୁ ମିଳିତ ଭାବେ ଶନିବାର ଚଢ଼ାଉ ହୋଇଥିଲା। ମୁଖ୍ୟ ସଡ଼କରେ ବ୍ୟବସାୟ କରୁଥିବା ଉଠା ବ୍ୟବସାୟୀଙ୍କୁ ଆଜି ଉଚ୍ଛେଦ କରାଯାଇଥିଲା। ଏଥିସହ ଯେଉଁ ସ୍ଥାୟୀ ଦୋକାନୀ ଆଗକୁ ମାଡ଼ି ବସି ବ୍ୟବସାୟ କରିବେ ସେମାନଙ୍କ ବିରୋଧରେ ଆଗକୁ ଦୃଢ଼ କାର୍ଯ୍ୟନୁଷ୍ଠାନ ନିଆଯିବ ବୋଲି ସୂଚାଇ ଦିଆଯାଇଛି। ସହରର ଅନେକ ଛୋଟ ବଡ଼ ହୋଟେଲରେ ବାସିଖାଦ୍ୟ ଗ୍ରାହକଙ୍କୁ ବିକ୍ରି କରାଯାଉଛି । ଏଥିସହ ନିମ୍ନମାନର ଖାଦ୍ୟ ମଧ୍ୟ ପ୍ରସ୍ତୁତ ହେଉଛି। ଏନେଇ ପ୍ରସାଶନ ପାଖରେ ଅନେକ ସମୟରେ ଅଭିଯୋଗ ହୋଇଥିଲା। ଶେଷରେ ପ୍ରଶାସନ ପକ୍ଷରୁ ଅନ୍ୟ ବିଭାଗ ସହଯୋଗରେ ମିଳିତ ଭାବେ ହୋଟେଲ ଉପରେ ଚଢ଼ାଉ ହୋଇଥିଲା। ଏହି ସମୟରେ ଅନେକ ହୋଟେଲରୁ ବାସି ଖାଦ୍ୟ ଫ୍ରିଜ ଭିତରୁ ଜବତ କରାଯାଇଥିଲା। ଏନେଇ ସମ୍ପୃକ୍ତ ହୋଟେଲ ଉପରେ ଜରିମନା ସହ କାର୍ଯ୍ୟନୁଷ୍ଠାନ ନିଆଯାଇଛି। ବେନିୟମ ପଲିଥିନ କାରବାର ଉପରେ ମଧ୍ୟ ଚଢ଼ାଉ ହୋଇଥିଲା। ଟ୍ରେଡ ଲାଇସେନ୍ସ ଯାଞ୍ଚ ହୋଇଥିଲା। ଯେଉଁଠି ବେନିୟମ କାର୍ଯ୍ୟ ଧରାପଡ଼ିବ ସେହି ଦୋକାନକୁ ସିଲ କରାଯିବ। ଚଢାଉ ସରିବା ପରେ ଚୂଡ଼ାନ୍ତ ରିପୋର୍ଟ ଆସିବ। ଏହାପରେ ପ୍ରଶାସନ ଆବଶ୍ୟକ ପଦକ୍ଷେପ ନେବ ବୋଲି ଜଣେ ଅଧିକାରୀ ଏଠାରେ ସୂଚନା ଦେଇଛନ୍ତି। ଉପଜିଲାପାଳ ଉମାଶଙ୍କର ବେହେରାଙ୍କ ନିର୍ଦ୍ଦେଶକ୍ରମେ ଅତିରିକ୍ତ ତହସିଲଦାର ଅବିନାଶ ମହାର, ମ୍ୟୁନିସିପାଲଟି ନିର୍ବାହୀ ଅଧିକାରୀ ମୁରଲୀ କୃଷ୍ଟ ପଣ୍ଡା, ଏସ ଆଇ ସମୀର ସେଠୀ ଏବଂ ଫୁଡ ଇନ୍ସପେକ୍ଟର ପ୍ରମୁଖ ଏହି ଚଢାଉରେ ସାମିଲ ଥିଲେ।
Dharitri – Odisha’s No.1 Odia Daily
