କଟକ,୧୪ା୧୧: ଐତିହାସିକ କଟକ ବାଲିଯାତ୍ରା ୯ ଦିନ ପରେ ସମାପ୍ତ ହୋଇଛି। ଚଳିତ ବର୍ଷର ଏହି ମେଳା ଆକର୍ଷଣୀୟ କାର୍ଯ୍ୟକ୍ରମ ଏବଂ ବ୍ୟାପକ ବ୍ୟବସାୟ ସହିତ ସମସ୍ତ ପୂର୍ବ ରେକର୍ଡ ଭାଙ୍ଗିଛି। ୯ ଦିନର ଏହି ଯାତ୍ରାରେ ପ୍ରାୟ ୭୦ ଲକ୍ଷରୁ ଅଧିକ ଲୋକଙ୍କ ସମାଗମ ହୋଇଥିବା ଆକଳନ କରାଯାଉଛି। ଶନିବାର ଓ ରବିବାର ସର୍ବକାଳୀନ ରେକର୍ଡ ଭିଡ଼ ହୋଇଥିଲା, ଯେଉଁଥିରେ କେବଳ ରବିବାର ଦର୍ଶକ ସଂଖ୍ୟା ୧୫ ଲକ୍ଷ ଟପିଥିଲା।
ଚଳିତ ବର୍ଷ ବାଲିଯାତ୍ରାରେ ପ୍ରାୟ ୩୦୦ କୋଟି ଟଙ୍କାର ବେପାର ହୋଇଥିବା ଅନୁମାନ କରାଯାଉଛି। ପଲ୍ଲୀଶ୍ରୀ ମେଳାରେ ୨,୫୦୦ରୁ ଅଧିକ ଷ୍ଟଲ୍ ସ୍ଥାପିତ ହୋଇଥିଲା ଏବଂ କାରବାର ୫୦ରୁ ୫୫ କୋଟି ଟଙ୍କା ଅତିକ୍ରମ କରିଛି, ଯାହା ଗତ ବର୍ଷର ରେକର୍ଡ (୪୩ କୋଟି) ଭାଙ୍ଗିଛି।
ଲୋକପ୍ରିୟ କଣ୍ଠଶିଳ୍ପୀ ଶ୍ରେୟା ଘୋଷାଲ୍ ଏବଂ ହର୍ଷଦୀପ କୌରଙ୍କ କାର୍ଯ୍ୟକ୍ରମ ବାଲିଯାତ୍ରାର ମୁଖ୍ୟ ଆକର୍ଷଣ ଥିଲା। ଏହି ଦିନଗୁଡ଼ିକରେ ୩୦ ଲକ୍ଷରୁ ଅଧିକ ଜନସମାଗମ ହୋଇଥିବା ଆକଳନ କରାଯାଇଛି।
‘କଟକ ଇନ୍ କଟକ’, ‘ଓଡ଼ିଆ ଅସ୍ମିତା’, ‘ଲେଜର୍ ଲାଇଟ୍ ସୋ’, ‘ଜଳପରୀ ସୋ’ ଏବଂ ବୋଇତ ପ୍ରତିଯୋଗିତା ଦର୍ଶକଙ୍କୁ ବେଶ୍ ଆକର୍ଷିତ କରିଥିଲା। କଟକ ଜିଲ୍ଲା ପ୍ରଶାସନ ୬ ମାସ ଧରି ପ୍ରସ୍ତୁତି କରି ୬୦ ଏକର ଜମିରେ ବାଲିଯାତ୍ରା ଆୟୋଜନ କରିଥିଲା।
ବ୍ୟାପକ ଆୟୋଜନ ସତ୍ତ୍ୱେ ଭିଡ଼, ଟ୍ରାଫିକ୍ ଜାମ୍, ମୋବାଇଲ୍ ନେଟୱର୍କ ସମସ୍ୟା ଏବଂ ଧୂଳି ନିୟନ୍ତ୍ରଣରେ ସାମାନ୍ୟ ତ୍ରୁଟି ପରିଲକ୍ଷିତ ହୋଇଥିଲା, ଯାହା ଇ-ପେମେଣ୍ଟ ଉପରେ ନିର୍ଭର କରୁଥିବା ଦର୍ଶକଙ୍କୁ ଅସୁବିଧାରେ ପକାଇଥିଲା।
