ଖୋର୍ଦ୍ଧା ଅଫିସ,୧୬।୯: ମହାନଦୀ ବନ୍ୟା ଜଳ ମଳାଗୁଣି ଓ ରାଜୁଆ ନଦୀରେ ପ୍ରବେଶ କରିଛି। ଏହାର ପ୍ରଭାବରେ ଖୋର୍ଦ୍ଧା ବ୍ଳକ ଓରବରସିଙ୍ଗ ପଞ୍ଚାୟତର ହିରୀମୂଳ, ନରଣଗଡ ପଞ୍ଚାୟତର ମାନପୁର ଓ ଧବଳପୁର ଗ୍ରାମରେ ବନ୍ୟାଜଳ ପଶିଛି। ଗ୍ରାମରେ ଆଣ୍ଠୁଏ ଉଚ୍ଚର ପାଣି ଜମି ରହିଛି। ହିରୀମୂଳରେ ପାଣି ଜମି ଯୋଗାଯୋଗ ବିଚ୍ଛିନ୍ନ ହୋଇଛି। ଏନେଇ ଖୋର୍ଦ୍ଧା ତହସିଲଦାର ପଦ୍ମଚରଣ ସାହୁ କୁହନ୍ତି ପ୍ରଶାସନ ପ୍ରସ୍ତୁତ ରହିଛି। ଡଙ୍ଗା ବ୍ୟବସ୍ଥା କରାଯାଇଛି। ଘଟଣା ସ୍ଥଳରେ ଆର୍ଆଇ, ସରପଞ୍ଚ ସଜାଗ ଅଛନ୍ତି। ଆବଶ୍ୟକ ପଡିଲେ ଗ୍ରାମବାସୀଙ୍କୁ ସ୍ଥାନାନ୍ତରିତ କରାଯିବ।
ପ୍ରକାଶ ଯେ, ହୀରାକୁଦ ଜଳଭଣ୍ଡାରର ଗେଟ ଖୋଲିବାର ୩୬ଘଣ୍ଟା ପରେ ମୁଣ୍ଡଳି ଏବଂ ୪୮ ଘଣ୍ଟା ପରେ ଖୋର୍ଦ୍ଧା ବ୍ଳକର ମଳାଗୁଣୀ, ରାଜୁଆ ଓ ଦୟାନଦୀରେ ବନ୍ୟାଜଳ ବଢି ଓରବରସିଙ୍ଗ ପଞ୍ଚାୟତର ଢିହଖଳା, କୃଷ୍ଣପୁର ରାୟପୁର, ମଶାଣିଆ, ନରଣଗଡ଼ ଜିପିର ମାନପୁର, ଧବଳପୁର, ବଳପୁର, ଓରମି ଏବଂ ବ୍ରଜମୋହନପୁର ଜିପିର ଶରଧାପୁର ଗ୍ରାମ ଜଳମଗ୍ନ ହେବା ଆଶଙ୍କା ରହିଛି।
