ସାକ୍ଷୀଗୋପାଳ,୮।୧(ଡି.ଏନ୍.ଏ.): ଜାତୀୟ ରାଜପଥରେ କ୍ରମାଗତ ଲୁଟ୍ କରୁଥିବା ଆନ୍ତଃଜିଲା ଲୁଟେରା ଗ୍ୟାଙ୍ଗର ୪ ଜଣ ଲୁଟେରାଙ୍କ ସହିତ ଚୋରି ଜିନିଷ ରଖିଥିବା ଅନ୍ୟ ଦୁଇ ଜଣଙ୍କୁ ଶୁକ୍ରବାର ସତ୍ୟବାଦୀ ପୋଲିସ ଗିରଫ କରିଛି। ସେମାନେ ହେଲେ ଗଡ଼ିଶାଗଦା ଥାନା ନଇକୁଳପାଟଣା ଗ୍ରାମର ବିପିନ ସେଠୀ, ସତ୍ୟବାଦୀ ଥାନା ବଡ଼ହାଟର ପ୍ରକାଶ ବରାଳ, ପଞ୍ଚୁକେରାର ସନ୍ଦୀପ ପ୍ରଧାନ ଓ ନହଳା ଗ୍ରାମର ସିଦ୍ଧାନ୍ତ ମଲ୍ଲିକ। ଚୋରି ଜିନିଷ ରଖିଥିବା ଜୟନ୍ତ କୁମାର ଓ ଜିଜ୍ଞାସୁ କୁମାର ସାବତଙ୍କୁ ପୁରୀ କୋର୍ଟକୁ ଚାଲାଣ କରାଯାଇଛି। ସେମାନଙ୍କଠାରୁ ପୋଲିସ ୪ଟି ଚୋରା ମୋବାଇଲ, ଗୋଟିଏ ସୁନାମୁଦି, ଗୋଟିଏ ପଲସର ଓ ଗୋଟିଏ ଆପାଚି ମୋଟରସାଇକେଲ ଜବତ କରିବାରେ ପୋଲିସ ସଫଳ ହୋଇଛି। ପୁରୀ ଏସ୍ପି କେ. ବିଶାଲ ସିଂହଙ୍କ ନିର୍ଦ୍ଦେଶରେ ପିପିଲି ଏସ୍ଡିପିଓ ଦେବଦତ୍ତ ବରାଳ ଓ ସତ୍ୟବାଦୀ ଥାନା ଆଇଆଇସି ଦେବୀ ପ୍ରସାଦ ପାତ୍ର ସଦଳବଳ ଚଢ଼ାଉ କରି ଲୁଟେରା ଗ୍ୟାଙ୍ଗର ପର୍ଦ୍ଦାଫାଶ କରିଛନ୍ତି। ଅନ୍ୟ ଫେରାର ଅଭିଯୁକ୍ତମାନଙ୍କୁ ଧରିବାକୁ ଉଦ୍ୟମ ଚଲିଛି ବୋଲି ପୋଲିସ ଏକ ଖବରଦାତା ସମ୍ମିଳନୀରେ କହିଛନ୍ତି।
