ଭୁବନେଶ୍ୱର,୨।୨: ଦେଶର ପ୍ରମୁଖ ଘରୋଇ ସଂସ୍ଥା ତଥା ଟାଟା ଗ୍ରୁପ୍ର ଅଗ୍ରଣୀ କମ୍ପାନୀ ଟାଟା ପାୱାରକୁ ନିକଟରେ ଉଲ୍ଲେଖନୀୟ ସଫଳତା ମିଳିଛି। ଏପରିକି ଟାଟା ପାଓ୍ବାର ନେତୃତ୍ୱରେ ପରିଚାଳିତ ତଥା ୯ନିୟୁତରୁ ଅଧିକ ଗ୍ରାହକଙ୍କୁ ସେବା ଯୋଗାଉଥିବା ଓଡ଼ିଶାର ୪ ଡିସ୍କମ୍ ଟିପି ସେଣ୍ଟ୍ରାଲ ଓଡ଼ିଶା ଡିଷ୍ଟ୍ରିବ୍ୟୁଶନ ଲିମିଟେଡ୍ (ଟିପିସିଓଡିଏଲ୍) ଟିପି ନର୍ଦନ ଓଡ଼ିଶା ଡିଷ୍ଟ୍ରିବ୍ୟୁଶନ ଲିମିଟେଡ୍ (ଟିପିଏନ୍ଓଡିଏଲ୍), ଟିପି ୱେଷ୍ଟର୍ନ ଓଡ଼ିଶା ଡିଷ୍ଟ୍ରିବ୍ୟୁଶନ ଲିମିଟେଡ୍ (ଟିପିଡବ୍ଲ୍ୟୁଓଡିଏଲ୍) ଏବଂ ଟିପି ସଦର୍ନ ଓଡ଼ିଶା ଡିଷ୍ଟ୍ରିବ୍ୟୁଶନ ଲିମିଟେଡ୍ (ଟିପିଏସ୍ଓଡିଏଲ୍) କୁ ଉଚ୍ଚତର ଗ୍ରାହକ ସେବା ରେଟିଂ ପ୍ରଦାନ କରାଯାଇଛି।
ଉଲ୍ଲେଖଯୋଗ୍ୟ, ଭାରତ ସରକାରଙ୍କ ଶକ୍ତି ମନ୍ତ୍ରଣାଳୟ ପକ୍ଷରୁ ପ୍ରକାଶିତ ସଦ୍ୟତମ ଗ୍ରାହକ ସେବା ର଼୍ୟାଙ୍କିଙ୍ଗ୍ରେ ଟାଟା ପାଓ୍ବାରକୁ ଉଚ୍ଚତର ରେଟିଂ ପ୍ରଦାନ କରାଯାଇଛି। ଏପରିକି ଶକ୍ତି ମନ୍ତ୍ରଣାଳୟ ପକ୍ଷରୁ ପ୍ରକାଶିତ ଡିସ୍କମ୍ଗୁଡ଼ିକର ଗ୍ରାହକ ସେବା ରେଟିଂ (ସିଏସ୍ଆର୍ଡି) ରିପୋର୍ଟର ତୃତୀୟ ସଂସ୍କରଣରେ ଡିସ୍କମ୍ଗୁଡ଼ିକ ଉଚ୍ଚ ରେଟିଂ ହାସଲ କରିଛନ୍ତି। ଉକ୍ତ ରିପୋର୍ଟରେ ସାରା ଦେଶରେ ଗ୍ରାହକ ସେବାର ସାମ୍ପ୍ରତିକ ସ୍ଥିତିକୁ ବିସ୍ତୃତ ଭାବେ ଉପସ୍ଥାପନ କରାଯାଇଛି। ସେହିଭଳି ନୂଆଦିଲ୍ଲୀଠାରେ ବିଦ୍ୟୁତ୍ କ୍ଷେତ୍ରର ସମୀକ୍ଷା, ଯୋଜନା ଓ ନିରୀକ୍ଷଣ (ଆର୍ପିଏମ୍) ବୈଠକ ଅନୁଷ୍ଠିତ ହୋଇଯାଇଛି।
ଏହି ଅବସରରେ କେନ୍ଦ୍ର ଶକ୍ତି, ନୂତନ ଓ ଅକ୍ଷୟ ଶକ୍ତି ମନ୍ତ୍ରୀ ଆର୍.କେ.ସିଂହ ସମ୍ମାନିତ ଅତିଥି ଭାବେ ଯୋଗଦେଇ ସିଏସ୍ଆର୍ଡି ରିପୋର୍ଟର ତୃତୀୟ ସଂସ୍କରଣକୁ ଉନ୍ମୋଚନ କରିଥିଲେ। ସେହିପରି ଓଡ଼ିଶାରେ ଥିବା କମ୍ପାନୀର ୪ଟି ଡିସ୍କମ୍ରେ ଟାଟା ପାୱାରର ସିଂହଭାଗ ଅଂଶଧନ ରହିଛି। ୨୦୨୧-୨୨ଆର୍ଥିକ ବର୍ଷ ତୁଳନାରେ ଚଳିତ ସଂସ୍କରଣ ସେମାନଙ୍କ ରେଟିଂରେ ଉନ୍ନତି ଘଟିଛି। ୨୦୨୨-୨୩ ଆର୍ଥିକ ବର୍ଷରେ ଟିପିସିଓଡିଏଲ୍,ଟିପିଏନ୍ଓଡିଏଲ୍ ଏବଂ ଟିପିଡବ୍ଲ୍ୟୁଓଡିଏଲ୍ର ରେଟିଂ ବି+ କୁ ଉନ୍ନୀତ ହୋଇଥିବାବେଳେ ଟିପିଏସ୍ଓଡିଏଲ୍ର ରେଟିଂରେ ମଧ୍ୟ ପୂର୍ବ ଆର୍ଥିକ ବର୍ଷ ତୁଳନାରେ ଉନ୍ନତି ହୋଇଛି। ଉକ୍ତ ଡିସ୍କମ୍ଗୁଡ଼ିକ ପରିଚାଳନା ଭରସାଯୋଗ୍ୟତା ମାନଦଣ୍ଡରେ ‘ଏ’ ରେଟିଂ ହାସଲ କରିଛନ୍ତି।
