ବେଜିଂ,୧୦।୮: ଶେଷରେ ୧୭ମାସ ପରେ ଘରମୁହାଁ ହେଲେ ଏକ ହାତୀପଲ। ଏହି ହାତୀମାନେ ଚାଇନାରେ ପ୍ରାୟ ୩୦୦ମାଇଲ ଯାତ୍ରା କରିଥିବା ଜଣାପଡ଼ିଛି। ଯାହା ସମଗ୍ର ବିଶ୍ୱରେ ଏବେ ଚର୍ଚ୍ଚାର ବିଷୟ ପାଲଟିଛି। ଏହି ୧୪ଏସିଆ ହାତୀ ଗତ କିଛି ମାସରୁ ଖବରର ଶିରୋନାମା ପାଲଟିଛନ୍ତି। ହାତୀପଲ ଦୁଇଟି ସନ୍ତାନ ଜନ୍ମ ଦେଇଥିବା ବେଳେ ପାଖାପାଖି ୭କୋଟି ୮୨ଲକ୍ଷରୁ ଅଧିକ ଟଙ୍କା କ୍ଷତି କରିଥିବା ସୂଚନା ମିଳିଛି। ନିକଟରେ ଏହି ହାତୀପଲ ଜଙ୍ଗଲ ମଝିରେ ବିଶ୍ରାମ ନେଉଥିବାର ଏକ ଫଟୋ ମଧ୍ୟ ସୋସିଆଲ ମିଡିଆରେ ବେଶ୍ ଭାଇରାଲ ହୋଇଥିଲା। ଏହି ଯାତ୍ରା ସମୟରେ ପ୍ରାୟ ୪୦୦ଜରୁରୀକାଳୀନ କର୍ମଚାରୀ, ୧୨୦ଯାନ ଏବଂ ଅନେକ ଡ୍ରୋନ ସେମାନଙ୍କ ଉପରେ ନଜର ରଖିଥିଲେ।
ସୂଚନାଯୋଗ୍ୟ, ଶନିବାର ୟୁନାନ ପ୍ରଦେଶର ୟୁଆନଜିଆଙ୍ଗ କାଉଣ୍ଟିର ଏକ ବଗିଚାରେ ଏହି ହାତୀପଲ ବୁଲୁଥିବାର ଦେଖିବାକୁ ମିଳିଥିଲା। ୟୁଆନଜିଆଙ୍ଗ କାଉଣ୍ଟି ଦକ୍ଷିଣ ୟୁନାନର ହାତୀମାନେ ବାସ କରୁଥିବା ଅଭୟାରଣ୍ୟଠାରୁ ମାତ୍ର ୧୨୫ ମାଇଲ ଦୂର ଉତ୍ତରରେ ଅବସ୍ଥିତ। ଏହି ହାତୀପଲ ଗତ ବର୍ଷ ମାର୍ଚ୍ଚରେ ପଳାଇଯାଇଥିଲେ। ହାତୀମାନେ ସେମାନଙ୍କର ପୁରୁଣା ପ୍ରାକୃତିକ ବାସସ୍ଥାନ ଛାଡି ବ୍ୟସ୍ତ ରାଜପଥ, ପ୍ରମୁଖ ସହର କେନ୍ଦ୍ର ଏବଂ ଆବାସିକ ଅଞ୍ଚଳ ଦେଇ ଯାତ୍ରା କରିଥିଲେ। ଯାହା ବୈଜ୍ଞାନିକମାନଙ୍କୁ ଆଶ୍ଚର୍ଯ୍ୟ କରିଦେଇଥିଲା। ରାସ୍ତାରେ ହାତୀମାନେ ବିଭିନ୍ନ ଦୋକାନ ଉପରେ ଆକ୍ରମଣ କରି କବାଟ ଭାଙ୍ଗି ଖାଦ୍ୟ ଖାଇ ନେଇଥିଲେ। ଏଥିସହ ଲୋକଙ୍କ ଘରେ ପ୍ରବେଶ କରିବାକୁ ଚେଷ୍ଟା କରିଥିଲେ। କେବଳ ସେତିକି ନୁହେଁ ଚଳିତ ମାସ ଆରମ୍ଭରୁ ଭାଇରାଲ ହୋଇଥିବା ଫଟୋରେ ହାତୀମାନେ ଜଙ୍ଗଲରେ ଶୋଇଥିବାର ଦେଖିବାକୁ ମିଳିଥିଲା।
ବୈଜ୍ଞାନିକଙ୍କ କହିବା ଅନୁଯାୟୀ, ହାତୀପଲ ଦୀର୍ଘ ସମୟ ଧରି ଯାତ୍ରା କରୁଥିବାରୁ ଥକିଯାଇଛନ୍ତି। ଯାହାଫଳରେ ସେମାନେ ଜଙ୍ଗଲ ମଝିରେ ବିଶ୍ରାମ କରିଛନ୍ତି। ତେବେ ବ୍ୟବସାୟୀ ଏବଂ ପର୍ଯ୍ୟଟକଙ୍କ ପରିପୂର୍ଣ୍ଣ ମହାନଗର କୁନ୍ମିଙ୍ଗର ଉପକୂଳ ଅଞ୍ଚଳରେ ପହଞ୍ଚିବା ପରେ ସେମାନେ ପୁନର୍ବାର ଦକ୍ଷିଣ ଆଡକୁ ଯାଇଥିଲେ। ତେବେ ନିଜର ଅନୁଭୂତି ଅଭାବରୁ ସେମାନେ ରାସ୍ତା ଭୁଲିଯାଇଥିଲେ ବୋଲି ୟୁନାନ ବିଶ୍ୱବିଦ୍ୟାଳୟର ପ୍ରଫେସର ଚେନ ମିଙ୍ଗ୍ୟୋଙ୍ଗ କହିଛନ୍ତି। ରବିବାର ରାତି ସୁଦ୍ଧା ଏହି ହାତୀପଲ ରିଜର୍ଭଠାରୁ ପ୍ରାୟ ୧୨୫ମାଇଲ ଦୂରରେ ଥିବା ୟୁଆନଜିଆଙ୍ଗ କାଉଣ୍ଟିରେ ଥିଲେ। ତେବେ ଉକ୍ତ ହାତୀପଲ ଘରକୁ ଫେରିବା ପାଇଁ ଉଦ୍ୟମ କରୁଛନ୍ତି ବୋଲି ସରକାର କହିଛନ୍ତି। ତେବେ ସେମାନଙ୍କୁ ଟ୍ରାକିଂ କରାଯାଇ ପ୍ରାକୃତିକ ବାସସ୍ଥାନକୁ ଫେରାଇ ଆଣିବାକୁ ଅଧିକାରୀମାନେ କାର୍ଯ୍ୟ କରିବେ ବୋଲି ପ୍ରଦେଶ ସରକାର ସୂଚନା ଦେଇଛନ୍ତି।
