କିଭ୍,୧୮।୧ : ୟୁକ୍ରେନର ରାଜଧାନୀ କିଭ୍ରେ ହେଲିକପ୍ଟର ଦୁର୍ଘଟଣା ଘଟିଛି। ଏହି ଦୁର୍ଘଟଣାରେ ୟୁକ୍ରେନ ଗୃହମନ୍ତ୍ରୀଙ୍କ ସମେତ ୧୬ ଜଣଙ୍କର ମୃତ୍ୟୁ ହୋଇଛି। ମିଡିଆ ରିପୋର୍ଟ ଅନୁଯାୟୀ ମୃତକଙ୍କ ମଧ୍ୟରେ ଦୁଇ ଶିଶୁ ମଧ୍ୟ ଅଛନ୍ତି। ଏହି ହେଲିକପ୍ଟରଟି କିଭ୍ରେ ଥିବା ଛୋଟ ପିଲାମାନଙ୍କ ପାଇଁ ଏକ ସ୍କୁଲ ଉପରେ ଖସିପଡିଥିଲା। ଏହି ଘଟଣା କିଭ୍ର ଉତ୍ତର-ପୂର୍ବର ବ୍ରୋଭରିରେ ଘଟିଛି।
ଘଟଣାର ସୂଚନା ପାଇବା ପରେ ପୋଲିସ ଏବଂ ଜରୁରୀକାଳୀନ ସେବା ସହ ଅନ୍ୟ ଉଚ୍ଚାଧିକାରୀମାନେ ଘଟଣାସ୍ଥଳରେ ପହଞ୍ଚିଥିଲେ। ଏହି ବିମାନ ଦୁର୍ଘଟଣାର ଏକ ଭିଡିଓ ମଧ୍ୟ ସାମ୍ନାକୁ ଆସିଛି ଯେଉଁଥିରେ ଦୁର୍ଘଟଣା ପରେ ପିଲାଙ୍କ ସ୍କୁଲରେ ନିଆଁ ଲାଗିଥିବାର ଦେଖାଯାଇଛି।
ଏପର୍ଯ୍ୟନ୍ତ ଦୁର୍ଘଟଣାର କାରଣ ଜଣା ପଡିନାହିଁ। ୟୁକ୍ରେନର ଜାତୀୟ ପୋଲିସର ମୁଖ୍ୟ ଇଗୋର କ୍ଲିମେଙ୍କୋ କହିଛନ୍ତି ଯେ ଏପର୍ଯ୍ୟନ୍ତ ୧୬ ଜଣଙ୍କର ମୃତ୍ୟୁ ନିଶ୍ଚିତ ହୋଇଛି। ମୃତକଙ୍କ ମଧ୍ୟରେ ୟୁକ୍ରେନର ଆଭ୍ୟନ୍ତରୀଣ ମନ୍ତ୍ରଣାଳୟର ବହୁ ବରିଷ୍ଠ ଅଧିକାରୀ ଏବଂ ଗୃହମନ୍ତ୍ରୀ ଡେନିସ ମୋନାଷ୍ଟ୍ରିସ୍କି ଏବଂ ତାଙ୍କ ଡେପୁଟି ୟେଭେନି ୟେସେନିନ ଅଛନ୍ତି।
ମୋନାଷ୍ଟ୍ରିସ୍କି ୨୦୨୧ ମସିହାରେ ୟୁକ୍ରେନର ଗୃହମନ୍ତ୍ରୀ ହୋଇଥିଲେ। ଏହି ଦୁର୍ଘଟଣାରେ ଦୁଇ ଜଣ ଶିଶୁଙ୍କ ସମେତ ୨୨ ଜଣ ଆହତ ହୋଇଛନ୍ତି। ଅଧିକାରୀ କହିଛନ୍ତି ଯେ ଦୁର୍ଘଟଣା ସମୟରେ ପ୍ଲେ ସ୍କୁଲରେ ଶିଶୁ ଏବଂ କର୍ମଚାରୀ ଉପସ୍ଥିତ ଥିଲେ।
