ନୂଆଦିଲ୍ଲୀ,୧୮।୧ : ଦେଶର ତିନୋଟି ଉତ୍ତର-ପୂର୍ବ ରାଜ୍ୟ ତ୍ରିପୁରା, ମେଘାଳୟ ଏବଂ ନାଗାଲାଣ୍ଡର ବିଧାନସଭା ନିର୍ବାଚନ ସମ୍ପର୍କରେ ଘୋଷଣା ହୋଇଛି। ତ୍ରିପୁରାରେ ୧୬ ଫେବୃୟାରୀରେ ମତଦାନ ହେବ। ସେହିପରି ମେଘାଳୟ ଏବଂ ନାଗାଲାଣ୍ଡରେ ଫେବୃୟାରୀ ୨୭ରେ ମତଦାନ କରାଯିବ। ମୁଖ୍ୟ ନିର୍ବାଚନ କମିଶନର ରାଜୀବ କୁମାର ବୁଧବାର ଏକ ସାମ୍ବାଦିକ ସମ୍ମିଳନୀ ଏ ସମ୍ପର୍କରେ ସୂଚନା ପ୍ରଦାନ କରିଛନ୍ତି। ତିନୋଟି ରାଜ୍ୟର ବିଧାନସଭାର କାର୍ଯ୍ୟକାଳ ମାର୍ଚ୍ଚରେ ଶେଷ ହେବ। ତିନୋଟି ରାଜ୍ୟରେ ବିଧାନସଭା ନିର୍ବାଚନ ଦୁଇଟି ପର୍ଯ୍ୟାୟରେ ଅନୁଷ୍ଠିତ ହେବ। ମାର୍ଚ୍ଚ ୨ରେ ତିନି ରାଜ୍ୟର ଭୋଟ ଗଣନା କରାଯିବ। ସମସ୍ତ ତିନୋଟି ରାଜ୍ୟରେ ୬୦ ଲେଖାଏଁ ସଦସ୍ୟ ଅଛନ୍ତି।
ବିଧାନସଭା ନିର୍ବାଚନ ପାଇଁ ଜାନୁୟାରୀ ୨୧ରେ ତ୍ରିପୁରା ପାଇଁ ଅଧିସୂଚନା ଜାରି ହେବ। ନାମାଙ୍କନ ପତ୍ରର ଅନ୍ତିମ ତାରିଖ ଜାନୁୟାରୀ ୩୦ ରହିଛି। ଜାନୁୟାରୀ ୩୧ରେ ନମାଙ୍କନ ଯାଞ୍ଚ୍ କରାଯିବ। ଫେବୃୟାରୀ ୨ରେ ପ୍ରାର୍ଥୀପତ୍ର ପ୍ରତ୍ୟାହାର କରାଯିବ। ସେହିପରି ମେଘାଳୟ-ନାଗାଲାଣ୍ଡ ବିଧାନସଭା ନିର୍ବାଚନ ପାଇଁ ଜାନୁୟାରୀ ୩୧ରେ ଅଧିସୂଚନା ଜାରି ହେବ। ନାମାଙ୍କନ ପତ୍ରର ଅନ୍ତିମ ତାରିଖ ୭ ଫେବୃୟାରୀ ରହିଛି। ୮ ଫେବୃୟାରୀରେ ନମାଙ୍କନ ଯାଞ୍ଚ୍ କରାଯିବ। ଫେବୃୟାରୀ ୧୦ ରେ ପ୍ରାର୍ଥୀପତ୍ର ପ୍ରତ୍ୟାହାର କରାଯିବ।
ମୁଖ୍ୟ ନିର୍ବାଚନ କମିଶନର କହିଛନ୍ତି, ଏହି ତିନୋଟି ରାଜ୍ୟରେ ମୋଟ ୬୨.୮ ଲକ୍ଷ ଭୋଟର ଅଛନ୍ତି। ନାଗାଲାଣ୍ଡରେ ୧୩.୦୯ ଲକ୍ଷ ଭୋଟର, ମେଘାଳୟରେ ୨୧.୬୧ ଲକ୍ଷ ଏବଂ ତ୍ରିପୁରାରେ ୨୮.୧୩ ଲକ୍ଷ ଭୋଟର ଅଛନ୍ତି। ଏହି ତିନୋଟି ରାଜ୍ୟରେ ମୋଟ ୩୧.୪୭ ଲକ୍ଷ ମହିଳା ଭୋଟର ଅଛନ୍ତି। ଏଥିମଧ୍ୟରୁ ତ୍ରିପୁରାରେ ସର୍ବାଧିକ ୧୩.୯୮ ଲକ୍ଷ ମହିଳା ଭୋଟର ରହିଛନ୍ତି। ଏହି ତିନୋଟି ରାଜ୍ୟରେ ମୋଟ ୧.୭୬ ଲକ୍ଷ ଭୋଟର ଅଛନ୍ତି, ଯେଉଁମାନେ ପ୍ରଥମ ଥର ପାଇଁ ଭୋଟ ଦେବେ। ମେଘାଳୟରେ ସର୍ବାଧିକ ୮୧,୪୪୩ ଭୋଟରଙ୍କ ସଂଖ୍ୟା ୧୮-୧୯ ବର୍ଷ ବୟସ୍କ। ଯେଉଁମାନେ ପ୍ରଥମ ଥର ପାଇଁ ଭୋଟ ଦେବେ।
ସୂଚନାଯୋଗ୍ୟ, ତିନୋଟି ରାଜ୍ୟ ନାଗାଲାଣ୍ଡ, ମେଘାଳୟ ଏବଂ ତ୍ରିପୁରାର ବିଧାନସଭାର କାର୍ଯ୍ୟକାଳ ଯଥାକ୍ରମେ ମାର୍ଚ୍ଚ ୧୨, ମାର୍ଚ୍ଚ ୧୫ ଏବଂ ମାର୍ଚ୍ଚ ୨୨ ୨୦୨୩ ରେ ଶେଷ ହେଉଛି।
