ବାଲେଶ୍ୱର ଅଫିସ,୧୨।୮-ଲଗାଣ ବର୍ଷା ଯୋଗୁ ବାଲେଶ୍ୱର ସହରରେ ଅସମ୍ଭାଳ ସ୍ଥିତି ସୃଷ୍ଟି ହୋଇଛି। ସହରର ତଳିଆ ଅଞ୍ଚଳ ଜଳମଗ୍ନ ହୋଇଛି। ଜିଲାରେ ବୁଧବାର ଅପରାହ୍ନ ୩ଟାରୁ ପ୍ରବଳ ବର୍ଷା ଆରମ୍ଭ ହୋଇଥିଲା। ପରେ ବିଜୁଳି ଓ ଘଡ଼ଘଡ଼ି ସହ ବର୍ଷା ଲାଗି ରହିଥିଲା। ୩ ଘଣ୍ଟାରୁ ଊର୍ଦ୍ଧ୍ୱ ସମୟ ଧରି ଲଗାଣ ବର୍ଷା ଯୋଗୁ ସହରର ବିଭିନ୍ନ ସ୍ଥାନରେ ମୁଖ୍ୟରାସ୍ତା ଉପରେ ଅଣ୍ଟାଏ ଉଚ୍ଚର ପାଣି ଚାଲୁଥିବା ବେଳେ ସଡ଼କ ପାର୍ଶ୍ୱରେ ଥିବା ଦୋକାନଗୁଡ଼ିକରେ ପଶି ଲକ୍ଷାଧିକ ଟଙ୍କାର ବିଭିନ୍ନ ସାମଗ୍ରୀ ନଷ୍ଟ ହୋଇଯାଇଛି।
ସହରର ମୁଖ୍ୟ ଆଜିମାବାଦ ରାସ୍ତା, ଗଡ଼ଗଡ଼ିଆ, ଜେଲରୋଡ୍, କଂଗ୍ରେସଗଳି, ରାଣୀପାଟଣା, ମୋତିଗଞ୍ଜ ବଜାର, ଫାଣ୍ଡିଛକର ନ୍ୟୁ ମାର୍କେଟ୍, ଚିଡ଼ିଆପୋଲ ନିକଟସ୍ଥ ଦୋକାନ, ବସ୍ଷ୍ଟାଣ୍ଡରୁ ରେମୁଣା ରାସ୍ତା, ମାନସିଂବଜାର, ଏଡିଏମ୍ ଛକରୁ ଟେକ୍ନିକାଲ ପଡ଼ିଆ ରାସ୍ତା, ଗୋପାଳଗଁା ପ୍ରମୁଖ ରାସ୍ତାରେ ପାଣି ସୁଅ ଦେଖିବାକୁ ମିଳିଥିଲା। ମହାନାଳ ଓ ନାଳକୁ ଠିକ୍ ଭାବେ ସଫା କରାଯାଇ ନ ଥିବାରୁ ବାରମ୍ବାର ବର୍ଷାରେ ଏଭଳି ସ୍ଥିତି ସୃଷ୍ଟି ନେଇ ଅଭିଯୋଗ ହେଉଛି। ଦମକଳ ବାହିନୀ କେତେକ ସ୍ଥାନରେ ଜଳ ନିଷ୍କାସନ କାର୍ଯ୍ୟରେ ନିୟୋଜିତ ରହିଛନ୍ତି। ପ୍ରଶାସନିକ ଅଧିକାରୀମାନେ କେତେକ ସ୍ଥାନରେ ପହଞ୍ଚି ସ୍ଥିତି ଅନୁଧ୍ୟାନ କରିଛନ୍ତି।
