ଥୁଆମୂଳ ରାମପୁର, ୨୯/୬ (ଦୁର୍ଗା କୀର୍ତ୍ତି): କଳାହାଣ୍ଡି ଜିଲାର ଥୁଆମୂଳ ରାମପୁର ବ୍ଲକ ପଞ୍ଚାୟତ ସମିତି ସଭାଗୃହରେ ସୋମବାର ବ୍ଲକସ୍ତରୀୟ ସଂଯୁକ୍ତ ଜନଅଭିଯୋଗ ଶୁଣାଣି ଓ ସମାଧାନ ଶିବିର ଅନୁଷ୍ଠିତ ହୋଇଯାଇଛି। ଗୋଷ୍ଠୀ ଉନ୍ନୟନ ଅଧିକାରୀ (ବିଡିଓ) ଧ୍ରୁବଚରଣ ମୁଦୁଲିଙ୍କ ଅଧ୍ୟକ୍ଷତାରେ ଆୟୋଜିତ ଏହି ଶିବିରରେ ଅତିରିକ୍ତ ଜିଲା ମାଜିଷ୍ଟ୍ରେଟ (ଏଡିଏମ୍) ତନ୍ମୟ କୁମାର ଦରୱାନ, ଉପଜିଲାପାଳ ପ୍ରଭାତ କୁମାର ପରିଡା, ତହସିଲଦାର ସତ୍ୟ ସନାତନ ପାଣିଗ୍ରାହୀ ଏବଂ ଅତିରିକ୍ତ ତହସିଲଦାର ତପନ କୁମାର ପତି ପ୍ରମୁଖ ଉପସ୍ଥିତ ରହି ଜନସାଧାରଣଙ୍କ ଅଭିଯୋଗ ଶୁଣିବା ସହ ଆବେଦନପତ୍ର ଗ୍ରହଣ କରିଥିଲେ।
ଶିବିରରେ ମୋଟ ୭୮ଟି ଅଭିଯୋଗ ଗ୍ରହଣ କରାଯାଇଥିବା ବେଳେ ସେଥିମଧ୍ୟରୁ ୨୯ଟି ସାମୂହିକ ଓ ୪୯ଟି ବ୍ୟକ୍ତିଗତ ଆବେଦନ ରହିଥିଲା। ମୁଖ୍ୟତଃ ପାନୀୟ ଜଳ ଯୋଗାଣ, ଜିଓ ମୋବାଇଲ ନେଟୱର୍କ ସ୍ଥାପନ ଓ ଦୁର୍ବଳ ସିଗନାଲ ସମସ୍ୟା, ଜମିବାଡ଼ି ବିବାଦ, ବିପର୍ଯ୍ୟସ୍ତ ରାସ୍ତାଘାଟ, ସାମାଜିକ ସୁରକ୍ଷା ଭତ୍ତା ଏବଂ ଯୋଗାଣ ବିଭାଗ ସମ୍ବନ୍ଧୀୟ ବିଭିନ୍ନ ସମସ୍ୟା ଉପସ୍ଥାପିତ ହୋଇଥିଲା।
ପ୍ରଶାସନ ପକ୍ଷରୁ ସମ୍ପୃକ୍ତ ବିଭାଗୀୟ ଅଧିକାରୀମାନଙ୍କୁ ଅଭିଯୋଗଗୁଡ଼ିକର ଶୀଘ୍ର ତଦନ୍ତ କରି ନିୟମାନୁଯାୟୀ ସମାଧାନ କରିବାକୁ ନିର୍ଦ୍ଦେଶ ଦିଆଯାଇଥିଲା। ବ୍ଲକ ସାମାଜିକ ସୁରକ୍ଷା ଅଧିକାରୀ ସୁନାରାମ ସୋରେନ କାର୍ଯ୍ୟକ୍ରମକୁ ପରିଚାଳନା କରିଥିବା ବେଳେ ବ୍ଲକ ଓ ଜିଲାସ୍ତରୀୟ ବିଭିନ୍ନ ବିଭାଗର ଅଧିକାରୀ ଓ କର୍ମଚାରୀମାନେ ସହଯୋଗ କରିଥିଲେ।
ତେବେ ଏଭଳି ଅଭିଯୋଗ ଶୁଣାଣି ଶିବିରକୁ ସ୍ଥାନୀୟ ଲୋକେ ସ୍ୱାଗତ କରୁଥିବା ବେଳେ ବ୍ଲକ ମୁଖ୍ୟାଳୟର ଅନେକ ଜନଗୁରୁତ୍ୱପୂର୍ଣ୍ଣ ସମସ୍ୟା ବର୍ଷ ବର୍ଷ ଧରି ଅମୀମାଂସିତ ହୋଇ ରହିଥିବାରୁ ଅସନ୍ତୋଷ ମଧ୍ୟ ପ୍ରକାଶ ପାଇଛି। ବିଶେଷକରି ବ୍ଲକ ମୁଖ୍ୟାଳୟରେ ଏପର୍ଯ୍ୟନ୍ତ ରୋଡ୍ ଲାଇଟ୍ ବ୍ୟବସ୍ଥା ନ ହେବା, ଜିଓ ଟାୱାର ସମସ୍ୟାର ସମାଧାନ ନ ହେବା ଏବଂ ଜେଏମଏଫସି କୋର୍ଟ ଓ ଜନଗହଳିପୂର୍ଣ୍ଣ ବଜାର ନିକଟରେ ଥିବା ସାମୂହିକ ଶୌଚାଳୟରେ ତାଲା ପଡ଼ି ରହିବା ଭଳି ସମସ୍ୟା ପ୍ରଶାସନର କାର୍ଯ୍ୟଦକ୍ଷତା ଓ ଆନ୍ତରିକତା ଉପରେ ପ୍ରଶ୍ନବାଚୀ ସୃଷ୍ଟି କରିଛି।
ସ୍ଥାନୀୟ ସଚେତନ ଯୁବକଯୁବତୀ ଓ ଅଭିଯୋଗକାରୀମାନଙ୍କ ମତରେ, ଏହି ଶିବିରରେ ଗ୍ରହଣ କରାଯାଇଥିବା ଅଭିଯୋଗଗୁଡ଼ିକର ପ୍ରକୃତ ସମାଧାନ ହେବ କି, ନା ପୂର୍ବବର୍ତ୍ତୀ ଶିବିରଗୁଡ଼ିକ ଭଳି କେବଳ କାଗଜପତ୍ରରେ ସୀମିତ ରହିଯିବ, ତାହା ସମୟ ହିଁ କହିବ। ବର୍ତ୍ତମାନ ପ୍ରଶାସନ ଏହି ଅଭିଯୋଗଗୁଡ଼ିକର ସମାଧାନ ଦିଗରେ କେତେ ତତ୍ପରତା ଦେଖାଉଛି, ସେଥି ଉପରେ ସମସ୍ତଙ୍କ ନଜର ରହିଛି।
