ମ୍ୟାକେ,୨୪ା୮: ଟ୍ରାଭିସ୍ ହେଡ୍, ଅଧିନାୟକ ମିଚେଲ ମାର୍ଶ ଓ କାମେରନ ଗ୍ରୀନଙ୍କ ଶତକ ବଳରେ ଅଷ୍ଟ୍ରେଲିଆ ୨୭୬ ରନର ବିଶାଳ ବ୍ୟବଧାନରେ ଦକ୍ଷିଣ ଆଫ୍ରିକା ବିପକ୍ଷ ତୃତୀୟ ଦିନିକିଆ ମ୍ୟାଚ୍କୁ ଜିତି ନେଇଛି। ଏହା ଦକ୍ଷିଣ ଆଫ୍ରିକା ଲାଗି ଦିନିକିଆ ଫର୍ମାଟରେ ସର୍ବବୃହତ୍ ପରାଜୟ। ଏହି ପରାଜୟ ସତ୍ତ୍ୱେ ଦକ୍ଷିଣ ଆଫ୍ରିକା ୨-୧ ବ୍ୟବଧାନରେ ସିରିଜ୍ ହାତେଇଛି। ଅଷ୍ଟ୍ରେଲିଆ ବିପକ୍ଷରେ ଏହା ଦକ୍ଷିଣ ଆଫ୍ରିକା ପାଇଁ କ୍ରମାଗତ ପଞ୍ଚମ ସିରିଜ୍ ବିଜୟ। ଅଷ୍ଟ୍ରେଲିଆ ଦ୍ୱାରା ପ୍ରଦତ୍ତ ୪୩୨ ରନର ବିଶାଳ ଟାର୍ଗେଟ ଆଗରେ ଦକ୍ଷିଣ ଆଫ୍ରିକା ୨୪.୫ ଓଭରରେ ୧୫୫ ରନରେ ଅଲଆଉଟ୍ ହୋଇଯାଇଥିଲା। ହେଡ୍ଙ୍କୁ ପ୍ଲେୟର ଅଫ୍ ଦି ମ୍ୟାଚ୍ ଓ କେଶବ ମହାରାଜ ପ୍ଲେୟର ଅଫ୍ ଦି ସିରିଜ୍ ବିବେଚିତ ହୋଇଛନ୍ତି।
ବ୍ୟାଟିଂ କରିଥିବା ଅଷ୍ଟ୍ରେଲିଆକୁ ହେଡ୍ ଓ ଅଧିନାୟକ ମାର୍ଶ ପ୍ରଥମ ଉଇକେଟରେ ୨୫୦ ରନ୍ ଯୋଡ଼ିଥିଲେ। ହେଡ୍ ୧୦୩ ବଲରେ ୧୪୨ (୧୭ ଚୌକା ଓ ୫ ଛକା) ଓ ମାର୍ଶ ୧୦୬ ବଲରେ ୧୦୦ (୬ ଚୌକା ଓ ୫ ଛକା) ରନ କରି ଆଉଟ୍ ହୋଇଥିଲେ। ଏହା ହେଡ୍ଙ୍କ ଲାଗି ସପ୍ତମ ଓ ମାର୍ଶଙ୍କର ଚତୁର୍ଥ ଦିନିକିଆ ଶତକ ଥିଲା।
ଏହାପରେ ଗ୍ରୀନ ଓ ଆଲେକ୍ସ କାରେ ତୃତୀୟ ଉଇକେଟ ପାଇଁ ୧୩.୩ ଓଭରରେ ୧୬୪ ରନ ଯୋଡ଼ିଥିଲେ। ଗ୍ରୀନ ୫୫ ବଲରେ ୧୧୮ (୬ ଚୌକା ଓ ୮ ଛକା) ଓ କାରେ ୩୭ ବଲରେ ୫୦ (୭ ଚୌକା) ରନ କରି ଅପରାଜିତ ରହିଥିଲେ। ଫଳରେ ଅଷ୍ଟ୍ରେଲିଆ ୫୦ ଓଭରରେ ୨ ଉଇକେଟ ହରାଇ ୪୩୧ ରନ କରିଥିଲା।
ଜବାବରେ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇ ଦକ୍ଷିଣ ଆଫ୍ରିକା ୨୪.୫ ଓଭରରେ ୧୫୫ ରନରେ ଅଲଆଉଟ୍ ହୋଇଯାଇଥିଲା। ଦଳ ପାଇଁ ଡଓ୍ବୋଲ୍ଡ ବ୍ରେଭିସ ୪୯ (୨ ଚୌକା ଓ ୫ ଛକା) ଓ ଟୋନି ଡି ଜର୍ଜି ୩୩ (୬ ଚୌକା) ରନ କରିଥିଲେ। ଅଷ୍ଟ୍ରେଲିଆ ଲାଗି କୁପର କନୋଲି ୫ ଉଇକେଟ ସଫଳତା ହାତେଇଥିବା ବେଳେ ଜାଭିର ବାର୍ଟଲେଟ୍ ଓ ସିନ ଆବଟ ୨ ଲେଖାଏ ଉଇକେଟ ନେବାରେ ସକ୍ଷମ ହୋଇଥିଲେ।
