କେସିଙ୍ଗା,୧୪ା୮(ତୁମେଶ୍ୱର ସାହୁ): କଳାହାଣ୍ଡି ଜିଲା କେସିଙ୍ଗା ବ୍ଲକର ମଖାପଳା ଗ୍ରାମରେ ଦୀର୍ଘଦିନରୁ ପାନୀୟଜଳ ସମସ୍ୟା ରହିଛି। ଏହି ଅଞ୍ଚଳରେ ନଳକୂପ ଖୋଳିଲେ ମଧ୍ୟ ପାଣି ବାହାରୁନାହିଁ। ଗ୍ରାମରୁ ପ୍ରାୟ ୨ କିମି ହେବ ଗୋଟିଏ ନଳକୂପ ରହିଛି। ସେଥିରୁ ଭଲ ପାଣି ବାହାରୁ ଥିବାରୁ ଗ୍ରାମର ମହିଳାମାନେ ପାନୀୟ ଜଳ ପାଇଁ ପାଣି ଆଣିବାକୁ ଯାଇଥାଆନ୍ତି। ବସ୍ତି ଭିତରେ ୩ଟି ନଳକୂପରୁ ପାଣି ବାହାରୁଛି। କିନ୍ତୁ ଲୋକଙ୍କ ସଂଖ୍ୟା ଦୃଷ୍ଟିରୁ ୩ଟି ନଳକୂପ ଯଥେଷ୍ଟ ନୁହେଁ। ମଖାପଳା ଗ୍ରାମରେ ୧ ହଜାରରୁ ଊଦ୍ଧର୍ବ ଲୋକ ଅଛନ୍ତି। ଗାଁରେ ରହିଛି ବସୁଧା ଯୋଜନାର ଓଭର ହେଡ୍ ଟ୍ୟାଙ୍କ। ହେଲେ ଯାନ୍ତ୍ରିକ ତ୍ରୁଟି ଓ ବିଦ୍ୟୁତ୍ ବାରମ୍ବାର ବିଭ୍ରାଟ ଯୋଗୁ ପାଣି ସମସ୍ୟାର ରହିଛି। ବର୍ତ୍ତମାନ ୧୦ ଦିନରୁ ଊଦ୍ଧର୍ବ ହେଲା ପାଣି ଯୋଗାଣ ବନ୍ଦ ହେବାରୁ ଲୋକେ ହାହାକାର ହୋଇ ଉଠିଛନ୍ତି। ନଳକୂପ ଏତେ ଦୂର ଯେ କିଏ ସାଇକେଲ ତ କିଏ ବାଇକ୍ରେ ଯାଇ ପାଣି ଆଣୁଛି। ଗାଧୋଇବା ପାଇଁ ଗାଁରୁ ୪ କିମି ଦୂରରେ ଥିବା ନାଳକୁ ଯାଇ ଦୈନନ୍ଦିନ ଗାଧୋଇ ଆସୁଛନ୍ତି। ଗ୍ରାମରେ ଥିବା ଓଭର ହେଡ୍ ଟ୍ୟାଙ୍କରୁ ବର୍ଷାଦିନେ ଗୋଳିଆ ପାଣି ଆସିଥାଏ। ଏଣୁ ସେମାନେ ବାଧ୍ୟ ହୋଇ ଏହି ନଳକୂପ ଉପରେ ନିର୍ଭର କରୁଛନ୍ତି ବୋଲି ଗ୍ରାମବାସୀ ଅଭିଯୋଗ କରିଛନ୍ତି। ଏହି ସମସ୍ୟାକୁ ନେଇ ଗ୍ରାମବାସୀ, ବିଭାଗୀୟ ଅଧିକାରୀ, କେସିଙ୍ଗା ବିଡିଓଙ୍କ ନିକଟରେ ମଧ୍ୟ ଅଭିଯୋଗ ହୋଇଛି। ଏ ସଂକ୍ରାନ୍ତରେ ଆର୍ଡବ୍ଲ୍ୟୁ ଏସ୍ଏସ୍ର ସହକାରୀ ଯନ୍ତ୍ରୀ ଧର୍ମେନ୍ଦ୍ର ସେଠୀଙ୍କୁ ପଚାରିବାରୁ ଆଜି ଓଭର ହେଡ୍ରେ ବିଦ୍ୟୁତ ସଂଯୋଗ ଦିଆଯିବ ଏବଂ ପାନୀୟଜଳ ସମସ୍ୟା ଦୂର ହେବ। ଏହି ଅଞ୍ଚଳରେ ପାଣି ବାହାରୁନାହିଁ, ଗାଁ ଭିତରେ ୩ଟି ନଳକୂପ ମଧ୍ୟ ଅଛି ବୋଲି ପ୍ରକାଶ କରିଥିଲେ।
