ଲକ୍ଷ୍ନୌ,୨୪ ।୯: ହାଥରସ ମାମଲାରେ ଅଧା ରାତିରେ ପୀଡ଼ିତାଙ୍କ ଅନ୍ତିମ ସଂସ୍କାରକୁ ନେଇ ଉଠିଥିବା ପ୍ରଶ୍ନ ପରେ ଏବେ ସରକାର ଏମିତି ଘଟଣାରେ ମୃତକଙ୍କ ଅନ୍ତିମ ସଂସ୍କାରକୁ ନେଇ ‘ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜର’(ଏସଓପି) ଜାରି କରିଛନ୍ତି । ଏଥିରେ କୁହାଯାଇଛି କି ଏବେ ଜିଲାପାଳଙ୍କ ନିର୍ଦ୍ଦେଶ ବିନା ଏଭଳି ଘଟଣାରେ ରାତିରେ ଅନ୍ତିମ ସଂସ୍କାର କରାଯାଇ ପାରିବ ନାହିଁ ।
ହାଇକୋର୍ଟଙ୍କ ନିର୍ଦ୍ଦେଶ ପରେ ଗୃହ ବିଭାଗ ଦ୍ୱାରା ପ୍ରସ୍ତୁତ ଏସଓପିରେ କୌଣସି ଘଟଣାରେ ମୃତ ବ୍ୟକ୍ତିଙ୍କର ଅନ୍ତିମ ସଂସ୍କାରର ପ୍ରକ୍ରିୟା ନିର୍ଦ୍ଧାରଣ କରାଯାଇଛି । ନୂଆ ବ୍ୟବସ୍ଥା ଅନୁଯାୟୀ, ଯଦି ମୃତ ବ୍ୟକ୍ତିଙ୍କ ଅନ୍ତିମ ସଂସ୍କାର ରାତିରେ କରିବା ଜରୁରୀ ଓ ଆଇନ ବ୍ୟବସ୍ଥା ବିଗିଡିବାର ଅନୁମାନ କରାଯାଏ, ତେବେ ଏଭଳି ସ୍ଥିତିରେ ଡିଏମଙ୍କ ଅନୁମତି ନେବା ଜରୁରୀ । ନୂଆ ଏସଓପିରେ ଦୁଇ ସ୍ତରୀୟ କମିଟି ଗଠନ କରିବାର ପ୍ରାବଧାନ କରାଯାଇଛି ।
ପ୍ରଥମ କମିଟି ଘଟଣାସ୍ଥଳ ସମ୍ବନ୍ଧିତ ଗାଁ ବା ଅଞ୍ଚଳର ଲୋକଙ୍କର ହେବ । ଏଥିରେ ସେହି ଜାତିର ଲୋକଙ୍କୁ ରଖାଯିବ ଯେଉଁ ଜାତି ସହ ମୃତକଙ୍କ ସମ୍ପର୍କ ରହୁଥିବ । ଏହି ପ୍ରକାରେ କ୍ଷେତ୍ରୀୟ ଉପଜିଲାଧିକାରୀଙ୍କ ନେତୃତ୍ୱରେ ବି ଏକ କମିଟି ରହିବ । ଏଥିରେ କ୍ଷେତ୍ରୀୟ ସିଓ ଓ ଥାନାଧ୍ୟକ୍ଷ ରହିବେ । ପ୍ରଥମ କମିଟି ମୃତକଙ୍କ ପରିଜନଙ୍କୁ ଅନ୍ତିମ ସସ୍କାର ପାଇଁ ରାଜି କରାଇବେ ଓ ସେମାନଙ୍କ ସହମତି ପରେ ଦ୍ୱିତୀୟ କମିଟିକୁ ଅବଗତ କରାଇବେ ।
