ହାଟଡିହୀ/ଛେନାପଦୀ, ୧୬/୯ (ଶୁଭକାନ୍ତ ନାୟକ/ନିରାକାର ପରିଡା): କେନ୍ଦୁଝର ଜିଲା ହାଟଡିହୀ ବ୍ଲକ ଅଣା ମଠଠାରେ ଏନପିଏସ ଶିକ୍ଷକ ସଂଘର ଏକ ଗୁରୁତ୍ୱପୂର୍ଣ୍ଣ ବୈଠକ ବରିଷ୍ଠ ଶିକ୍ଷକ ଶଶି ଭୂଷଣ ପୁହାଣଙ୍କ ସଭାପତିତ୍ୱରେ ଅନୁଷ୍ଠିତ ହୋଇଯାଇଛି। ଏହି ବୈଠକରେ ବ୍ଲକର ୫୦ରୁ ଊର୍ଦ୍ଧ୍ୱ ଶିକ୍ଷକ ଓ ଶିକ୍ଷୟିତ୍ରୀ ଯୋଗଦେଇ ଶିକ୍ଷକସୁଲଭ ସମସ୍ୟା ଓ ସଂଘୀୟ ମଜବୁତି ଉପରେ ବ୍ୟାପକ ଆଲୋଚନା କରିଥିଲେ।
ସୁଚାରୁ ରୂପେ କାର୍ଯ୍ୟ ପରିଚାଳନା ପାଇଁ ହାଟଡିହୀ ବ୍ଲକ ପୁରସ୍କୃତ ହୋଇଥିବା ସତ୍ତ୍ୱେ, ଏସଆଇଆର କାର୍ଯ୍ୟରେ ଅବହେଳା ଅଭିଯୋଗରେ ବିଇଓ ରାଜୀବ ଦଳେଇଙ୍କ ନିଲମ୍ବନକୁ ନେଇ ବୈଠକରେ ଆଶ୍ଚର୍ଯ୍ୟ ପ୍ରକାଶ ପାଇଥିଲା। ଏହାପରେ ଶିକ୍ଷକମାନଙ୍କର ବିଭିନ୍ନ ବିଭାଗୀୟ ସମସ୍ୟା ଉପରେ ଗୁରୁତ୍ୱାରୋପ କରାଯାଇଥିଲା। ବିଶେଷ କରି ଲେବୁଲ-ଭି (ଏ) ରୁ ଲେବୁଲ-ଭି (ବି) ଏବଂ ଲେବୁଲ-ଭି (ବି) ରୁ ଲେବୁଲ-ଆଇଭି କୁ ପଦୋନ୍ନତି ପ୍ରକ୍ରିୟା ତ୍ୱରାନ୍ୱିତ କରିବା ସହ ଲେବୁଲ-୩କୁ ପଦୋନ୍ନତି ପାଇଥିବା ଶିକ୍ଷକଙ୍କ ସର୍ଭିସ ବୁକ ଓ ପେ-ଫିଟମେଣ୍ଟ କାର୍ଯ୍ୟ ସାରି ଚଳିତ ସେପ୍ଟେମ୍ବର ମାସରେ ଦରମା ପ୍ରଦାନ କରିବାକୁ ଦାବି ହୋଇଥିଲା। ଏହାସହ ଅବସରପ୍ରାପ୍ତ ଓ ନୂତନ ଭାବେ ବଦଳି ହୋଇ ଆସିଥିବା ଶିକ୍ଷକମାନଙ୍କୁ ସଂଘ ପକ୍ଷରୁ ସମ୍ବର୍ଦ୍ଧନା ଦେବାକୁ ନିଷ୍ପତ୍ତି ନିଆଯାଇଛି।
ସର୍ବଶେଷରେ ସଂଘକୁ ଆହୁରି ସୁଦୃଢ଼ କରିବା ପାଇଁ ବୈଠକରେ ସର୍ବସମ୍ମତି କ୍ରମେ ନୂତନ କର୍ମକର୍ତ୍ତା ଚୟନ କରାଯାଇଥିଲା। ଏଥିରେ ବରିଷ୍ଠ ଶିକ୍ଷକ ଶଶି ଭୂଷଣ ପୁହାଣଙ୍କୁ ଆବାହକ ଏବଂ ଅନିରୁଦ୍ଧ ବିଶ୍ୱାଳ, ନଳିନୀ କାନ୍ତ ମହାନ୍ତି, କେଶବ ଚନ୍ଦ୍ର ପାତ୍ର ଓ ପଦ୍ମାବତୀ ଯେନାଙ୍କୁ ସହ-ଆବାହକ ଭାବେ ମନୋନୀତ କରାଯାଇଛି। ଏହା ସହିତ ସଂଘ ସହ ସବୁଦିନ ପାଇଁ ଯୋଡ଼ି ରଖିବା ଉଦ୍ଦେଶ୍ୟରେ ଅବସରଗ୍ରହଣ କରିଥିବା ଦୁଇ ବରିଷ୍ଠ ଶିକ୍ଷକ ରାଜ କିଶୋର ସ୍ୱାଇଁ ଏବଂ ପ୍ରଫୁଲ୍ଲ ମଣ୍ଡଳଙ୍କୁ ସଂଘର ଉପଦେଷ୍ଟା ଭାବେ ଚୟନ କରାଯାଇଛି।
