କୋଲକାତା,୩୧।୩: ଅଭିଜ୍ଞ ଅଫ୍ ସ୍ପିନର ହରଭଜନ ସିଂ ଏଥର କୋଲକାତା ନାଇଟ୍ ରାଇଡର୍ସ (କେକେଆର) ତରଫରୁ ଖେଳିବାକୁ ଯାଉଛନ୍ତି। ହରଭଜନ ସାମିଲ ହେବା ପରେ ଦଳର ସ୍ପିନ ବିଭାଗ ବେଶ୍ ଶକ୍ତିଶାଳୀ ହୋଇପାରିବ ବୋଲି କେକେଆର ଅଧିନାୟକ ଇଅନ ମୋର୍ଗାନ କହିଛନ୍ତି। ଚେନ୍ନାଇର ସ୍ପିନ୍ ଉଇକେଟରେ ସେ ଉପଯୋଗୀ ସାବ୍ୟସ୍ତ ହେବେ। ୪୦ ବର୍ଷୀୟ ହରଭଜନ ଗତ ସଂସ୍କରଣରେ ଅଂଶଗ୍ରହଣ କରି ନ ଥିଲେ। ତାଙ୍କୁ ୨ କୋଟି ଟଙ୍କା ବିନିମୟରେ କେକେଆର କ୍ରୟ କରିଛି। ନିଲାମ ପକ୍ରିୟାରେ ସେ ପ୍ରଥମ ରାଉଣ୍ଡରେ ଅଣଦେଖାର ଶିକାର ହୋଇଥିଲେ। ହରଭଜନଙ୍କ ସହ କେକେଆର ସ୍ପିନ ବିଭାଗରେ ସୁନୀଲ ନାରିନ, ଶାକିବ ଅଲ ହାସନ, କୁଲଦୀପ ଯାଦବ ଓ ବରୁଣ ଚକ୍ରବର୍ତ୍ତୀ ରହିଛନ୍ତି। ଆଇପିଏଲ୍ରେ ଆମେ ସ୍ପିନ ବିଭାଗ ଶ୍ରେଷ୍ଠ ସାବ୍ୟସ୍ତ ହେବ ବୋଲି ମୋର୍ଗାନ ଆଶା ପ୍ରକାଶ କରି କହିଛନ୍ତି। ଚେନ୍ନାଇରେ କେକେଆର ପ୍ରଥମ ୧୦ଟି ମ୍ୟାଚ୍ ଖେଳାଯିବ। ସ୍ପିନରଙ୍କ ପ୍ରଦର୍ଶନ ବଳରେ ଆମେ ପୁଣି ଥରେ ଚାମ୍ପିୟନ ହେବୁ। ଦଳର ମିଡଲ ଅର୍ଡର ବେଶ୍ ଦୃଢ ରହିଛି। ସୁନୀଲ ନାରିନ ଓ ଦୀନେଶ କାର୍ତ୍ତିକଙ୍କୁ ପ୍ରମୋଟ କରିବାର ବିକଳ୍ପ ମଧ୍ୟ ରହିଛି ବୋଲି ମୋର୍ଗାନ କହିଛନ୍ତି। ଗତ ସଂସ୍କରଣରେ କେକେଆର କ୍ରମାଗତ ଦ୍ୱିତୀୟ ଥର ପାଇଁ ପ୍ଲେଅଫ୍ରେ ସ୍ଥାନ ହାସଲ କରିପାରି ନ ଥିଲା। ଦଳରେ ଶାକିବ ଓ ବେନ୍ କଟିଂଙ୍କ ଭଳି ବିଦେଶୀ ଖେଳାଳି ରହିଛନ୍ତି।
