ହାଇଦ୍ରାବାଦ,୨୨।୧: ଅଷ୍ଟ୍ରେଲିଆ ବିପକ୍ଷ ସିରିଜ୍ ହାତେଇବା ପରେ ଭାରତୀୟ ଟିମ୍ର ଭୂରି ଭୂରି ପ୍ରଶଂସା କରାଯାଉଛି। ଏହି ଜିତ୍କୁ ନେଇ ଭାରତର ପୂର୍ବ ଅଧିନାୟକ ରାହୁଲ ଦ୍ରାବିଡ ମଧ୍ୟ ଚର୍ଚ୍ଚାରେ ରହିଛନ୍ତି। ୫ ବର୍ଷ ପୂର୍ବେ ଭାରତର ଅଣ୍ଡର ୧୯ ଏବଂ ଇଣ୍ଡିଆ ଏ ଟିମ୍ର କୋଚ୍ ଭାବେ ସେ ଯେଉଁ ଚାରା ଲଗାଇଥିଲେ ତାହା ଏବେ ଫଳିବାରେ ଲାଗିଛି ବୋଲି କୁହାଯାଉଛି। ଭାରତର ବିଜୟ ପଛରେ ପ୍ରମୁଖ ଭୂମିକା ତୁଲାଇଥିବା ଅଧିକାଂଶ ଖେଳାଳି ରାହୁଲଙ୍କ ପାଠଶାଳାର ଛାତ୍ର ଥିଲେ। ତେବେ ସିଡନୀ ଟେଷ୍ଟରେ ଭାରତୀୟ ଟିମ୍ର ମଧ୍ୟକ୍ରମ ବ୍ୟାଟ୍ସମ୍ୟାନ୍ର ହନୁମା ବିହାରୀଙ୍କୁ ଦ୍ରାବିଡ ମେସେଜ୍ କରି ପ୍ରଶଂସା କରିଥିଲେ। ଡେବ୍ୟୁ ମ୍ୟାଚ୍ରେ ଭଲ ଖେଳିଲ ବୋଲି ସେ କହିଥିବା ଜଣାପଡ଼ିଛି।
ଇଣ୍ଡିଆ ଏ’ର ଟୁର୍ ପ୍ରୋଗ୍ରାମରେ ରାହୁଲଙ୍କ ସହ କାମ କରିଛନ୍ତି ହନୁମା। ତାଙ୍କ ଛଡ଼ା ଶୁଭମନ ଗିଲ, ମହମ୍ମଦ ସିରାଜ, ନବଦୀପ ସାଇନି, ମୟଙ୍କ ଅଗ୍ରଓ୍ବାଲ ମଧ୍ୟ ତାଙ୍କ ମାର୍ଗଦର୍ଶନରେ ଭାରତ ପାଇଁ ଖେଳିବାର ସ୍ବପ୍ନ ପୂରଣ କରିଛନ୍ତି। ଏନେଇ ବିହାରୀ କହିଥିଲେ, ଯୁବ ଖେଳାଳି ଭାବେ ଦ୍ରାବିଡଙ୍କୁ ଶ୍ରେୟ ଦେବାକୁ ଚାହିଁବୁ। କାରଣ ସେ ପଡ଼ିଆରେ କିଭଳି ଖେଳିବା ଉଚିତ ତାହା ଶିଖାଇଥିଲେ। ସେଥିପାଇଁ ସଫଳତା ମିଳିପାରିଛି। ତାଙ୍କ ମାର୍ଗଦର୍ଶନରେ ଆମେ କ୍ରିକେଟ ଖେଳିଛୁ। ଦରକାର ସମୟରେ ସେ ଉପଲବ୍ଧ ରହିଥାନ୍ତି। ଗତ ଅଷ୍ଟ୍ରେଲିଆ ଗସ୍ତ ସମୟରେ ଡେବ୍ୟୁ କରୁଛି ବୋଲି ସେ ଦ୍ରାବିଡଙ୍କୁ ଜଣାଇଥିଲେ। ଏହାର ଜବାବରେ ରଣଜୀ ଏବଂ ଇଣ୍ଡିଆ ଏ ପାଇଁ ଭଲ ଖେଳିଛ, ଭାରତ ପାଇଁ ମଧ୍ୟ ଖେଳିବାକୁ ପ୍ରସ୍ତୁତ ବୋଲି ସେ କହିଥିଲେ। ଏଭଳି ଭାବେ ସେ ଆତ୍ମବିଶ୍ୱାସ ବଢ଼ାଇଥିଲେ ବୋଲି ବିହାରୀ କହିଛନ୍ତି।
