ବାରଙ୍ଗ,୨୧।୧୦(ଡି.ଏନ୍.ଏ.): ନନ୍ଦନକାନନର ବ୍ୟାଟେରି ଚାଳିତ ଗାଡ଼ିକୁ ନେଇ ବୁଧବାର ପର୍ଯ୍ୟଟକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ୨୫ଜଣ ବଙ୍ଗୀୟ ପର୍ଯ୍ୟଟକ ନନ୍ଦନକାନନ ବୁଲିବାକୁ ଆସିଥିବାବେଳେ ଏକକାଳୀନ ବ୍ୟାଟେରି ଅଟୋରେ ଯିବା ଓ ସଫାରି ବୁଲିବା ପାଇଁ ଟିକେଟ କାଟିଥିଲେ। କିନ୍ତୁ ଅଧା ବୁଲାଇ ଗାଡ଼ି ଚାଳକ ଛାଡ଼ିଦେବାରୁ ପର୍ଯ୍ୟଟକ ଆଉ ଫେରିପାରିଲେନି। ଏପରିକି ଟିକେଟ ଟଙ୍କା ନ ଫେରାଇ ଗାଡ଼ି କାଉଣ୍ଟର ବନ୍ଦ କରି ଚାଳକ ପଳାଇଥିବାବେଳେ ଗାଇଡ୍ କାଉଣ୍ଟର ମଧ୍ୟ ବନ୍ଦ ହୋଇଯାଇଥିଲା। ଫଳରେ ଟଙ୍କା ଫେରିପାଇବା ପାଇଁ ନନ୍ଦନକାନନ ଗେଟ ଆଗରେ ସନ୍ଧ୍ୟାରେ ପର୍ଯ୍ୟଟକମାନେ ଧାରଣାରେ ବସିଥିଲେ। ପ୍ରାୟ ଘଣ୍ଟାଏ କାଳ ବସିବାପରେ ନନ୍ଦନକାନନର କୌଣସି ଅଧିକାରୀ ନ ଆସିବାରୁ ବାଧ୍ୟହୋଇ ନନ୍ଦନକାନନ ଥାନାରେ ଅଭିଯୋଗ କରିବା ପରେ ଗାଇଡ୍ କାଉଣ୍ଟର ଦାୟିତ୍ୱରେ ଥିବା ଗାଇଡ୍ମାନେ ଥାନାକୁ ଯାଇ ଟଙ୍କା ଫେରାଇବା ପରେ ରାତି ୭ଟାରେ ପର୍ଯ୍ୟଟକମାନେ ଫେରିଥିଲେ।
ସୂଚନା ଅନୁଯାୟୀ, ଅପରାହ୍ନ ୪ଟାରେ ପଶ୍ଚିମବଙ୍ଗ ମୁର୍ସିଦାବାଦ ଅଞ୍ଚଳରୁ ଅଧିକ ନିକାର ଓ ସୁନତା କରାଲ ପରିବାର ଏବଂ ସର୍ମ୍ପକୀୟଙ୍କ ସହ ନନ୍ଦନକାନନ ବୁଲିବାକୁ ଆସିଥିଲେ। ଗାଇଡ୍ କାଉଣ୍ଟରରେ ଗାଇଡ୍ ମାଧ୍ୟମରେ ବୁଲିବାପାଇଁ ଟଙ୍କା ପୈଠକରି ଗାଇଡ୍ ଚିତ୍ତରଞ୍ଜନ ବେହେରାଙ୍କ ସହ ବୁଲିଥିଲେ। ଚିତ୍ତରଞ୍ଜନଙ୍କ କଥାରେ ପର୍ଯ୍ୟଟକମାନେ ବ୍ୟାଟେରି ଗାଡ଼ିରେ ବୁଲିବା ପାଇଁ ରାଜି ହୋଇ କାଉଣ୍ଟରରୁ ଏକକାଳୀନ ମୁଣ୍ଡପିଛା ୧୪୦ଟଙ୍କାରେ ଟିକେଟ କରି ଗାଡ଼ିରେ ଯାଇଥିଲେ। ରେପ୍ଟାଇଲ ପାର୍କ ଯାଏଁ ଯାଇଥିବା ଗାଡ଼ି ସେମାନଙ୍କୁ ଛାଡିଦେବା ସହ ଜନ୍ତୁ ଦେଖିଆସିବାପରେ ଅନ୍ୟ ଅଟୋରେ ଯାଇପାରିବେ କହି ଚାଲିଯାଇଥିଲା। ପାର୍କ ବୁଲି ପର୍ଯ୍ୟଟକ ଫେରିବାବେଳେ ଗାଇଡ୍ କି ଅନ୍ୟ ଗାଡ଼ି ମଧ୍ୟ ନ ଥିଲା। ପ୍ରାୟ ଅଧଘଣ୍ଟା ଅପେକ୍ଷା ପରେ ଖାଲି ଆସୁଥିବା ଏକ ବ୍ୟାଟେରି ଗାଡ଼ିରେ ଆସିବାକୁ ପର୍ଯ୍ୟଟକମାନେ କହିଥିଲେ। ହେଲେ ଟିକେଟ ନ ଥିବାରୁ ନେଇ ହେବ ନାହିଁ ବୋଲି ଚାଳକ କହିଥିଲେ। ସେମାନେ ବହୁ କହିବା ପରେ ମଧ୍ୟ ଚାଳକ ନ ଶୁଣି ଚାଲିଯାଇଥିଲେ। ପର୍ଯ୍ୟଟକମାନେ ଅସନ୍ତୁଷ୍ଟ ହୋଇ କାଉଣ୍ଟରକୁ ଆସିବାବେଳେ ବନ୍ଦ ଥିବାରୁ ଗେଟ୍ ସମ୍ମୁଖରେ ଧାରଣା ଦେଇଥିଲେ। ଏହାସତ୍ତ୍ୱେ କୌଣସି ଅଧିକାରୀ ଧାରଣାସ୍ଥଳକୁ ନ ଆସିବାରୁ ଥାନାର ଦ୍ୱାରସ୍ଥ ହୋଇଥିଲେ। ନନ୍ଦନକାନନ ଥାନାଧିକାରୀ ଗାଇଡ ବୁକିଂ କାଉଣ୍ଟରଙ୍କୁ ଜଣାଇବା ପରେ ଗାଇଡମାନେ ଆସି ପର୍ଯ୍ୟଟକଙ୍କୁ ଟଙ୍କା ଫେରାଇଥିଲେ।
