ଭଞ୍ଜନଗର, ୧୬।୭ (ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ବ୍ଲକ କୁଲାଡ ଜଗନ୍ନାଥ ମନ୍ଦିର ପକ୍ଷରୁ ପବିତ୍ର ଗୁଣ୍ଡିଚା ଯାତ୍ରା ଗୁରୁବାର ଅତି ଆଡ଼ମ୍ବର ସହକାରେ ପାଳିତ ହୋଇଯାଇଛି। ଭଞ୍ଜ ରାଜବଂଶ ପକ୍ଷରୁ ଶହ ଶହ ବର୍ଷ ଧରି ପାଳିତ ହୋଇ ଆସୁଥିବା ଏହି ଯାତ୍ରାକୁ ଏବେ ଦେବୋତ୍ତର ବିଭାଗ ପରିଚାଳନା କରୁଛି। ନିର୍ଦ୍ଧାରିତ ସମୟରେ ପୂଜାର୍ଚ୍ଚନା ଶେଷ ହେବା ପରେ ଭଞ୍ଜ ରାଜବଂଶର ପ୍ରତିନିଧି ଭାବେ ପ୍ରଶାନ୍ତ କୁମାର ଭଞ୍ଜଦେଓ ଛେରା ପହଁରା କରିଥିଲେ। ଏହାପରେ ଅପରାହ୍ନ ସାଢ଼େ ୫ଟାରେ ରଥଟଣା ଆରମ୍ଭ ହୋଇଥିଲା।
ରଥଟଣା ଆରମ୍ଭ ହୋଇ ପ୍ରାୟ ୫୦ ମିଟର ଯିବା ପରେ ରଥଟି ହଠାତ୍ ଡାହାଣ କଡ଼କୁ ଚାଲିଯାଇଥିଲା। ଭକ୍ତମାନେ ରଥକୁ ପୁଣି ବାମ କଡ଼କୁ ବା ରାସ୍ତା ମଝିକୁ ଆଣିବା ପାଇଁ ବହୁ ଚେଷ୍ଟା କରିଥିଲେ ମଧ୍ୟ ସଫଳ ହୋଇପାରିନଥିଲେ। ଶେଷରେ ପ୍ରଶାସନ ପକ୍ଷରୁ ଏକ ହାଇୱା ଗାଡ଼ିର ସହାୟତା ନିଆଯାଇଥିଲା। ହାଇୱା ଗାଡ଼ି ସାହାଯ୍ୟରେ ରଥକୁ ଟାଣି ରାସ୍ତା ମଝିକୁ ଅଣାଯିବା ପରେ ରଥଟଣା ପୁଣି ସ୍ୱାଭାବିକ ହୋଇଥିଲା। ସୂଚନା ସୁଦ୍ଧା ରାତି ୯ ଟା ରେ କୁଲାଡ ମାଉସୀମା ମନ୍ଦିରରେ ରଥ ଲାଗିଛି।
ଏହି ରଥଯାତ୍ରା ସମୟରେ ଭଞ୍ଜନଗର ବିଧାୟକ ପ୍ରଦ୍ୟୁମ୍ନ କୁମାର ନାୟକ, ଉପ ଜିଲ୍ଲାପାଳ ଉମା ଶଙ୍କର ବେହେରା, ଅତିରିକ୍ତ ଉପ ଜିଲ୍ଲାପାଳ ପ୍ରଧାନ ଟୁଲିଆମ୍ମା, ତହସିଲଦାର ଅଭିପ୍ସା ପଟ୍ଟନାୟକ ଏବଂ ଅତିରିକ୍ତ ତହସିଲଦାର ଅବିନାଶ ମହାର ପ୍ରମୁଖ ଉପସ୍ଥିତ ରହି ରଥଟଣା କାର୍ଯ୍ୟର ତଦାରଖ କରିଥିଲେ।
ଶାନ୍ତିଶୃଙ୍ଖଳା ରକ୍ଷା ପାଇଁ ପୋଲିସ ପକ୍ଷରୁ ମଧ୍ୟ ବ୍ୟାପକ ସୁରକ୍ଷା ବ୍ୟବସ୍ଥା କରାଯାଇଥିଲା। ଏଏସପି ରଞ୍ଜନ କୁମାର ଦେ, ଏସଡିପିଓ ଡ. ଦୀପକ କୁମାର ମିଶ୍ର ଏବଂ ଥାନା ଅଧିକାରୀ ଜୀବନାନନ୍ଦ ଜେନା ପ୍ରତ୍ୟକ୍ଷ ଭାବେ ଉପସ୍ଥିତ ରହି ଆଇନଶୃଙ୍ଖଳା ପରିସ୍ଥିତି ଉପରେ ନଜର ରଖିଥିଲେ। ଯାତ୍ରା କମିଟିର କର୍ମକର୍ତ୍ତା, ଗ୍ରାମବାସୀ ଓ ବିଭିନ୍ନ ସ୍ୱେଚ୍ଛାସେବୀ ଅନୁଷ୍ଠାନ ଏଥିରେ ସହଯୋଗ କରିଥିଲେ।
ସକାଳୁ ପ୍ରବଳ ବର୍ଷା ଯୋଗୁଁ ଭକ୍ତଙ୍କ ସଂଖ୍ୟା କମ୍ ଥିବା ବେଳେ ଠାକୁରଙ୍କ ପହଣ୍ଡି ବିଜେ ସମୟକୁ ବର୍ଷା ଛାଡ଼ିଯାଇଥିଲା। ଏହାପରେ କୁଲାଡ ବଡ଼ଦାଣ୍ଡରେ ହଜାର ହଜାର ଭକ୍ତଙ୍କ ସମାଗମ ହୋଇଥିଲା ଏବଂ ସମଗ୍ର ପରିବେଶ ଭକ୍ତମୟ ହୋଇଉଠିଥିଲା। ଏହାସହ ଭେଜିପୁଟ, ଭଞ୍ଜନଗର ଓ ବଡକୋଦଣ୍ଡା ଆଦି ଅଞ୍ଚଳରେ ମଧ୍ୟ ରଥଯାତ୍ରା ଶାନ୍ତିଶୃଙ୍ଖଳାର ସହ ସମ୍ପନ୍ନ ହୋଇଯାଇଛି।
