ଦାରିଙ୍ଗବାଡି, ୩।୭ (ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡି ବ୍ଲକ ତିଲୋରୀ ପଞ୍ଚାୟତର ଗୁମାଡ଼ି ନଦୀର ଡାଇଭର୍ସନ ରାସ୍ତା ଧୋଇଯିବାର ଇତି ମଧ୍ୟରେ ୨ ଦିନ ବିତିଲା। କିନ୍ତୁ ମରାମତି କାର୍ଯ୍ୟ ନୋହିଲା। ଗୁରୁବାର ଉକ୍ତ ଭାସିଯାଇଥିବା ଡାଇଭର୍ସନରେ ୨ଟି ବଳଦ ଭାସିଯାଇଥିଲା। ସ୍ଥାନୀୟ ଲୋକ ଅଗ୍ନିଶମ ବିଭାଗକୁ ଫୋନ କରିବା ପରେ ସେଠାରେ ପହଞ୍ଚି ୨ଟି ବଳଦକୁ ଜୀବନ୍ତ ଉଦ୍ଧାର କରିବାରେ ସକ୍ଷମ ହୋଇଥିଲେ। ସେହିପରି ଉକ୍ତ ରାସ୍ତା ଉପରେ ନିର୍ଭର କରୁଥିବା ତିଲୋରୀ ପଞ୍ଚାୟତ ସମେତ ବୁଡ଼ାଗୁଡା, ଗୁମିକିଆ, କୋଟଗଡ଼ ବ୍ଲକ ପକାରୀ, ବାଲିଗୁଡା ଏବଂ ବାଲିଗୁଡା ବ୍ଲକ ଋତୁଙ୍ଗିଆକୁ ବସ ସମେତ ସମସ୍ତ ପ୍ରକାର ଗାଡି ଚଳାଚଳ ବନ୍ଦ ରହିଛି। ବିଦ୍ୟାଳୟର ଛାତ୍ରୀଛାତ୍ରମାନେ ଉକ୍ତ ରାସ୍ତାରେ ବିଦ୍ୟାଳୟ, ମହାବିଦ୍ୟାଳୟକୁ ଯାତାୟତ ବନ୍ଦ ହୋଇଯାଇଥିବା ବେଳେ ସାଧାରଣ ବଣ୍ଟନ ଚାଉଳ ପାଇଁ ଅଞ୍ଚଳବାସୀ ନିଜ ପଞ୍ଚାୟତ କାର୍ଯ୍ୟାଳୟକୁ ଯିବା ସମ୍ଭବ ହେଉ ନ ଥିବା ଜଣାପଡିଛି। ବର୍ଷା କମିଲେ ହିଁ ଉକ୍ତ ଡାଇଭର୍ସନ ମରାମତି କରାଯିବ ବୋଲି ପୂର୍ତ୍ତ ବିଭାଗର ସହକାରୀ ନିର୍ବାହୀ ଯନ୍ତ୍ରୀ ହରିହର ଦାସ କହିଛନ୍ତି।
ସୂଚନାଯୋଗ୍ୟ ଯେ, ଅଞ୍ଚଳରେ ଲଘୁଚାପ ଜନିତ ବର୍ଷା ଯୋଗୁ ଅଞ୍ଚଳରେ ଅନେକ ଅସୁବିଧା ଦେଖାଯିବା ସହ ସିମନବାଡି-ବୁଡ଼ାଗୁଡା ରାସ୍ତାର ତିଲୋରୀ ପଞ୍ଚାୟତଗୁମାଠାରେ ଏକ ନୂତନ ପୋଲ ନିର୍ମାଣ କାର୍ଯ୍ୟ ଅଧପାନ୍ତରିଆ ହୋଇ ରହିଥିବାବେଳେ ଲୋକଙ୍କ ଯାତାୟତ ପାଇଁ କରାଯାଇଥିବା ଅସ୍ଥାୟୀ ପୋଲ ବା ଡାଇଭର୍ସନ ରାସ୍ତାଟି ନଦୀର ଜଲସ୍ତର ବୃଦ୍ଧି ପାଇ ଧୋଇ ହୋଇଯାଇଛି।ଫଳରେ ସିମନବାଡି-ବୁଡ଼ାଗୁଡା ରାସ୍ତା ବିଛିନ୍ନ ହୋଇପଡିଛି।
