ମୁମ୍ବାଇ,୧୫।୫: ସ୍ଥାନୀୟ ଓ୍ବାଙ୍ଖଡ଼େ ଷ୍ଟାଡିୟମରେ ରବିବାର ଇଣ୍ଡିଆନ୍ ପ୍ରିମିୟର ଲିଗ୍(ଆଇପିଏଲ୍)ର ୬୨ତମ ମ୍ୟାଚରେ ଗୁଜରାଟ ଟାଇଟନ୍ସ ୭ ଉଇକେଟ ଚେନ୍ନାଇ ସୁପର କିଙ୍ଗ୍ସକୁ ହରାଇ ଦେଇଛି। ଏହି ବିଜୟ ସହ ଗୁଜରାଟ ୨୦ ପଏଣ୍ଟ ସହ ଶୀର୍ଷସ୍ଥାନ ବଜାୟ ରଖିଛି।
ଚେନ୍ନାଇ ଅଧିନାୟକ ମହେନ୍ଦ୍ର ସିଂ ଧୋନୀ ଟସ୍ ଜିତି ବ୍ୟାଟିଂ ନିଷ୍ପତ୍ତି ନେଇଥିଲେ । ହେଲେ ବ୍ୟାଟିଂ ବିପର୍ଯ୍ୟୟର ସମ୍ମୁଖୀନ ହୋଇଥିଲେ ସିଏସ୍କେ ବ୍ୟାଟର। ଋତୁରାଜଙ୍କ ୪୯ ବଲରେ ୫୩ ରନ୍ (୪ ଚଉକା ଏବଂ ୧ ଛକା) ଏବଂ ଏନ୍. ଜଗଦୀଶନଙ୍କ ୩୯ ରନ୍ ବଳରେ ଚେନ୍ନାଇ ନିର୍ଦ୍ଧାରିତ ୨୦ ଓଭରରେ ୫ ଉଇକେଟ ହରାଇ୧୩୩ ରନ୍ କରିବାରେ ସଫଳ ହୋଇଥିଲା। ଫଳରେ ଗୁଜରାଟ ଆଗରେ ୧୩୪ ରନ୍ର ବିଜୟ ଟାର୍ଗେଟ୍ ଦେଇଥିଲା ଚେନ୍ନାଇ। ଜବାବରେ ଗୁଜରାଟ ୧୯.୧ ଓଭରରେ ୩ ଉଇକେଟ ହରାଇ ବିଜୟ ଟାର୍ଗେଟ୍ ପୂରଣ କରିଛି।
ଗୁଜରାଟର ଓପନିଂ ବ୍ୟାଟର ରିଦ୍ଧିମାନ ସାହା ଏବଂ ଶୁବମାନ୍ ଗିଲ୍ ଦଳକୁ ଭଲ ଷ୍ଟାଟ ଦେଇଥିଲେ। ରିଦ୍ଧିମାନ ଏବଂ ଶୁବମାନ ପ୍ରଥମ ଉଇକଟେ ପାଇଁ ୫୯ ରନ୍ ଯୋଡି ଥିଲେ। ଶୁବମାନ ୧୭ ବଲରେ ୧୮ ରନ୍ (୩ ଚଉକା) କରିଥିବା ବେଳେ ମ୍ୟାଥ୍ୟୁ ଓ୍ବେଡ୍ ୧୫ ବଲରେ ୨୦ରନ୍(୨ ଚଉକା) କରି ଆଉଟ ହୋଇଥିଲେ। ସେହିପରି ଅଧିନାୟକ ହାର୍ଦ୍ଦିକ ପାଣ୍ଡ୍ୟା ୭ ରନ୍ କରିଥିବା ବେଳେ ରିଦ୍ଧିମାନ ୫୭ ବଲ୍ରେ ୬୭ ରନ୍(୮ ଚଉକା ଏବଂ ୧ ଛକା) ଗୁରୁତ୍ୱପୂର୍ଣ୍ଣ ଇନିଂସ ଖେଳି ଦଳକୁ ବିଜୟ କରାଇଥିଲେ।
ଚେନ୍ନାଇ ଦଳର ମାଥେଶା ପାଥିରାନା ୨ଟି ଉଇକେଟ ନେଇଥିବା ବେଳେ ମୋଇନ ଅଲୀଙ୍କୁ ଗୋଟିଏ ଉଇକେଟ ମିଳିଥିଲା।
