ନୂଆଦିଲ୍ଲୀ, ୧।୨: କୋଭିଡ୍-୧୯ ମହାମାରୀର କଷାଘାତରୁ ବୈଶ୍ୱିକ ଅର୍ଥନୀତି ଏଯାଏଁ ମୁକୁଳିପାରି ନ ଥିବାବେଳେ ଭୂ-ରାଜନୈତିକ ସଂଘର୍ଷ ସ୍ଥିତିକୁ ଆହୁରି ସଙ୍ଗିନ କରିଛି। ଏଭଳି ପ୍ରତିକୂଳ ପରିସ୍ଥିତି ସତ୍ତ୍ୱେ ଭାରତୀୟ ଅର୍ଥନୀତି ନଇଁ ପଡ଼ିନାହିଁ। ଦେଶର ମଜଭୁତ ଆର୍ଥିକ ଭିତ୍ତିଭୂମି ଏହାର ମୁଖ୍ୟ କାରଣ ବୋଲି ମଙ୍ଗଳବାର ପ୍ରମୁଖ ଅର୍ଥନୈତିକ ପରାମର୍ଶଦାତା (ସିଇଏ) ଭି. ଅନନ୍ତ ନାଗେଶ୍ୱରନ୍ ପ୍ରକାଶ କରିଛନ୍ତି। ନାଗେଶ୍ୱରନ୍ଙ୍କ ମତରେ ଏପ୍ରିଲ ୧ରେ ଆରମ୍ଭ ହେବାକୁ ଥିବା ଆଗାମୀ ଆର୍ଥିକ ବର୍ଷରେ ଅନ୍ୟ ରାଷ୍ଟ୍ରଗୁଡ଼ିକ ତୁଳନାରେ ଭାରତର ମୋଟ ଘରୋଇ ଉତ୍ପାଦ (ଜିଡିପି)ରେ ଭଲ ଅଭିବୃଦ୍ଧି ଦେଖିବାକୁ ମିଳିବ। ସାରା ବିଶ୍ୱ ଅନେକ ଚ୍ୟାଲେଞ୍ଜର ସମ୍ମୁଖୀନ ହେଉଥିବାବେଳେ ଦ୍ରୁତତମ ବିକାଶଶୀଳ ରାଷ୍ଟ୍ର ଭାରତ ସେସବୁର ମୁକାବିଲା ସଫଳ ହୋଇଛି।
କେନ୍ଦ୍ରୀୟ ବଜେଟ୍ ଉପସ୍ଥାପନର ୨୪ ଘଣ୍ଟା ପୂର୍ବରୁ ୨୦୨୨-୨୩ ଆର୍ଥିକ ବର୍ଷର ଇକୋନୋମିକ୍ ସର୍ଭେ ରିପୋର୍ଟ ଜାରି କରାଯାଇଛି। ସିଇଏ ଭି. ଅନନ୍ତ ନାଗେଶ୍ୱରନ୍ ମଙ୍ଗଳବାର ଅପରାହ୍ନ ୨ଟାରେ ସର୍ଭେ ରିପୋର୍ଟ ସମ୍ପର୍କରେ ଗଣମାଧ୍ୟମ ଆଗରେ ବିସ୍ତୃତ ବିବରଣୀ ରଖିଛନ୍ତି। ଏହି ଅବସରରେ ଡ. ନାଗେଶ୍ୱରନ୍ କହିଛନ୍ତି, ଅର୍ଥ ବ୍ୟବସ୍ଥାରେ ମନ୍ଥରତାକୁ ନେଇ ଭାରତ ଚିନ୍ତିତ ହେବା ଅନାବଶ୍ୟକ। ସରକାର ୬.୪% ବିତ୍ତୀୟ ନିଅଣ୍ଟ ଦିଗରେ ଅଗ୍ରସର ହେଉଛନ୍ତି। ୨୦୨୨ ଏପ୍ରିଲରୁ ନଭେମ୍ବର ମଧ୍ୟରେ ସକଳ ଟିକସ ରାଜସ୍ୟରେ ୧୫.୫% ଅଭିବୃଦ୍ଧି ଦେଖିବାକୁ ମିଳିଛି। ୨୦୨୩ ଆର୍ଥିକ ବର୍ଷର ପ୍ରଥମ ୩ଟି ତ୍ରୈମାସିକରେ ସାମଗ୍ରୀ ଓ ସେବା ଟିକସ (ଜିଏସ୍ଟି) ବାବଦକୁ ୧୩.୪୦ ଲକ୍ଷ କୋଟି ଟଙ୍କା ରାଜସ୍ବ ସଂଗ୍ରହ କରାଯାଇଛି। ସେ ଆହୁରି କହିଛନ୍ତି ଯେ, ୨୦୨୨ ଆର୍ଥିକ ବର୍ଷରେ ପ୍ରତ୍ୟକ୍ଷ ବିଦେଶୀ ପୁଞ୍ଜିନିବେଶ (ଏଫ୍ଡିଆଇ) ପ୍ରବାହ ୨୧. ୩ ବିଲିୟନ୍ ଡଲାର ଥିଲା, ଯାହାକି ପୂର୍ବବର୍ଷ ତୁଳନାରେ ୭୬% ଅଧିକ। ଭାରତୀୟ ଫାର୍ମାସ୍ୟୁଟିକାଲ୍ ରପ୍ତାନି ୨୦୨୧ରେ ୨୪% ବୃଦ୍ଧି ହୋଇଥିବାବେଳେ ୨୦୨୨ ପର୍ଯ୍ୟନ୍ତ ଫାର୍ମା ସେକ୍ଟର ୨୦ ବିଲିୟନ୍ ଡଲାରରୁ ଅଧିକ ବିଦେଶୀ ନିବେଶ ପାଇଛି। ଅନ୍ତର୍ଜାତୀୟ ବଜାରରେ ତୈଳ ଦର ବ୍ୟାରେଲ୍ ପିଛା ୧୦୦ ଡଲାର ତଳେ ରହିଥିବା ପର୍ଯ୍ୟନ୍ତ ଆକଳନ କରାଯାଇଥିବା ଅଭିବୃଦ୍ଧି ପ୍ରତି କୌଣସି ସଙ୍କଟ ଦେଖାଯାଉ ନାହିଁ। ୨୦୨୩-୨୪ ଆର୍ଥିକ ବର୍ଷରେ ଭାରତରେ ମୁଦ୍ରାସ୍ଫୀତି ବଡ଼ ଚିନ୍ତାର କାରଣ ପାଳଟି ନ ପାରେ।
ଓଡ଼ିଶାରେ ୧୦୦% ହୋଇ ନାହିଁ ଟେଲି ସଂଯୋଗ
ଓଡ଼ିଶା ଅଦ୍ୟାବଧି ୧୦୦% ଟେଲି ସାନ୍ଧ୍ରତା ହାସଲ କରିପାରି ନାହିଁ। ତେଣୁ ରାଜ୍ୟରେ ଟେଲି ଯୋଗାଯୋଗ କ୍ଷେତ୍ରକୁ ବିଶେଷ ଧ୍ୟାନ ଦେବା ଜରୁରୀ ହୋଇଛି। ଦେଶରେ ଟେଲି-ସାନ୍ଧ୍ରତା ହାରାହାରି ୮୪.୮% ଥିବାବେଳେ ଓଡ଼ିଶାରେ ଜାତୀୟ ହାରଠାରୁ ବହୁ ତଳେ ରହିଛି ବୋଲି ମଙ୍ଗଳବାର ପାର୍ଲାମେଣ୍ଟରେ ଉପସ୍ଥାପିତ ଇକୋନୋମିକ୍ ସର୍ଭେ ରିପୋର୍ଟରେ ପ୍ରକାଶ ପାଇଛି।
ଅର୍ଥମନ୍ତ୍ରୀ ନିର୍ମଳା ସୀତାରାମନ ସର୍ଭେ ରିପୋର୍ଟ ଉପସ୍ଥାପନ ବେଳେ କହିଛନ୍ତି, ୨୦୧୯ରେ ଓଡ଼ିଶାର ସହରାଞ୍ଚଳ ତୁଳନାରେ ଗ୍ରାମାଞ୍ଚଳରେ ଇଣ୍ଟରନେଟ୍ ବ୍ୟବହାରକାରୀଙ୍କ ସଂଖ୍ୟାରେ ୫୦%ରୁ ଅଧିକ ବୃଦ୍ଧି ଦେଖିବାକୁ ମିଳିଥିଲା। ସର୍ଭେ ଅନୁଯାୟୀ ୨୦୨୨ ନଭେମ୍ବର ସୁଦ୍ଧା ଭାରତରେ ଟେଲିଫୋନ୍ ବ୍ୟବହାରକାରୀଙ୍କ ମୋଟ ସଂଖ୍ୟା ୧୧୭ କୋଟି ଥିଲା। ସେମାନଙ୍କ ମଧ୍ୟରୁ ୯୭% ବା ୧୧୪.୩ କୋଟି ଓ୍ବେରଲେସ୍ ଜରିଆରେ ଯୋଗାଯୋଗ କରିଥାନ୍ତି। ୨୦୨୨ ଜୁନ୍ ସୁଦ୍ଧା ଦେଶର ୮୩.୭ କୋଟି ଲୋକଙ୍କ ପାଖରେ ଇଣ୍ଟରନେଟ୍ ସଂଯୋଗ ବ୍ୟବସ୍ଥା ରହିଥିଲା। ଦେଶର ମୋଟ ଟେଲି ଡେନ୍ସିଟି ୮୪.୮%। ବିଭିନ୍ନ ରାଜ୍ୟରେ ଏହି ହାରରେ ବଡ଼ ବ୍ୟବଧାନ ଦେଖିବାକୁ ମିଳିଛି। ବିହାରରେ ଟେଲି-ଡେନ୍ସିଟି ୫୫.୪% ଥିବାବେଳେ ଦିଲ୍ଲୀରେ ୨୭୦.୬% ରହିଛି। ୮ ଲାଇସେନ୍ସ ଏରିଆ ସର୍ଭିସ୍ ରାଜ୍ୟରେ ଟେଲି-ସାନ୍ଧ୍ରତା ୧୦୦%ରୁ ଅଧିକ ରହିଥିବା ଉକ୍ତ ରିପୋର୍ଟରେ ଦର୍ଶାଯାଇଛି। ଚଳିତବର୍ଷ ଓଡ଼ିଶାର ଗ୍ରାମାଞ୍ଚଳରେ ସହରାଞ୍ଚଳ ତୁଳନାରେ ଖାଦ୍ୟର ଦରଦାମ୍ ସାଙ୍ଗକୁ ମୁଦ୍ରାସ୍ଫୀତି ଅଧିକ ରହିଛି। ରାଜ୍ୟର ଖୁଚୁରା ମୁଦ୍ରାସ୍ଫୀତି ୨୦୨୩ ଆର୍ଥିକ ବର୍ଷରେ ୭% ରହିଥିବା ସର୍ବେକ୍ଷଣରେ ରେଖାଙ୍କିତ କରାଯାଇଛି। ପ୍ରଧାନମନ୍ତ୍ରୀ ଫସଲବୀମା ଯୋଜନା ଅଧୀନରେ ୨୦୧୭ରେ ଓଡ଼ିଶାକୁ ୨୨୨% ସୁବିଧା ଦିଆଯାଇଥିଲା।
