ପାରାଦୀପ,୩୧ା୩ (ସ୍ବ.ପ୍ର.): ପାରାଦୀପର ଷଣ୍ଢକୁଦଠାରୁ ତ୍ରିଲୋଚନପୁର ଗ୍ରାମ ପର୍ଯ୍ୟନ୍ତ ବେଳାଭୂମି ସୁରକ୍ଷା ରାସ୍ତାର ଦୁଇ ପାଶର୍ବରୁ ବାଲି ସହ ଜଙ୍ଗଲରୁ ଭୂତଳ ଜଳ ଉଠାଣ ଓ ଝାଉଁ ଜଙ୍ଗଲରୁ କାଠ କାଟି ନିଆଯାଉଛି। ସେହିପରି କଂସାରିପାଟିଆ ନଦୀ ପଠାରୁ ମାଟି ମଧ୍ୟ ଉଠାଯାଉଥିବା ନେଇ ସାଧାରଣରେ ଅଭିଯୋଗ ହୋଇଛି। ପାଣି ଉଠାଇବା ପାଇଁ ଜଙ୍ଗଲ ମଧ୍ୟରେ ବଡ଼ ବଡ଼ ବୋରିଂ କରାଯାଇଛି। ସେଥିରେ ୧୨ ଇଞ୍ଚରୁ ଊଦ୍ଧର୍ବ ପାଇପ୍ ଯୋଗେ ଭୂତଳ ଜଳ ସଂଗ୍ରହ କରି ଟ୍ୟାଙ୍କର ଓ ଟ୍ରାକ୍ଟର ଗାଡିରେ ବୋଝେଇ କରି ନିଆଯାଉଛି। ଏଭଳି ୧୫ରୁ ୨୦ଟି ଜାଗାରେ ପାଣି ଉତ୍ତୋଳନ ହେଉଥିବା ଦେଖିବାକୁ ମିଳିଛି। ଗୁରୁବାର ଏକ ଟ୍ରାକ୍ଟର ଉଠାଉଥିବା ଚାଳକ ବାବାଜୀ ପ୍ରଧାନ କହିଥିଲେ, ଗୋଟିଏ ଟ୍ରାକ୍ଟର ପାଣି ଗାଡି ୨୫ ଶହରୁ ୩ ହଜାର ଟଙ୍କାରେ ବିକ୍ରି କରାଯାଉଛି। ସେହିପରି ଆଉ ଜଣେ ଗାଡି ଚାଳକ କହିଛନ୍ତି, ପାଣି ଉଠାଇବା ପାଇଁ ଅନୁମତି ମିଳିଛି। ଯେଉଁ ସ୍ଥାନରେ ଏଭଳି ପାଣି ଉଠୁଛି ତାର ୫୦୦ ମିଟର ବ୍ୟବଧାନରେ ଝାଉଁ ଜଙ୍ଗଲ କଟାଚାଲିଛି। ପ୍ରତି ରାତି ଓ ଦିନରେ ଶତାଧିକ ହାଇୱା ଗାଡି ବେଳାଭୂମି ରାସ୍ତାରେ ଚାଲିଛି।
ଏ ସମ୍ପର୍କରେ ଜଟାଧାରମୁହାଣ ସାମୁଦ୍ରିକ ଥାନା ଅଧିକାରୀ ଦେବେନ୍ଦ୍ର ମହାପାତ୍ର କୁହନ୍ତି,
ବାଲି ଚୋରି ଘଟଣା ସମ୍ପର୍କରେ ଅନେକ ଅଭିଯୋଗ ଆସୁଛି। କିନ୍ତୁ ଆମେ ଚଢ଼ାଉ କଲାବେଳକୁ କିଏ କୁଆଡେ ପଳାଇ ଯାଉଛନ୍ତି। ସେହିପରି କୁଜଙ୍ଗ ରେଞ୍ଜ ଅଧିକାରୀ, ରଞ୍ଜନ ମିଶ୍ର, କୁହନ୍ତି ଜଙ୍ଗଲ କଟା ସମ୍ପର୍କରେ କୌଣସି ସୂଚନା ନାହିଁ। ଅଭୟଚାନ୍ଦପୁର ଓ କଂସାରିପାଟିଆ ସୀମାରେ ୨ ହଜାରରୁ ଅଧିକ ଝାଉଁ ଗଛ କାଟିବା ପାଇଁ ଇଡ୍କୋ ପକ୍ଷରୁ ଆବେଦନ କରାଯାଇଥିଲା। ସେତିକି ଗଛ କଟାଯିବା ପାଇଁ ରାଜନଗର ବନଖଣ୍ଡ ପକ୍ଷରୁ ସ୍ବୀକୃତି ମିଳିଛି। ପାଣି ଉତ୍ତୋଳନ ସମ୍ପର୍କରେ ପାରାଦୀପ ଜନସ୍ବାସ୍ଥ୍ୟ ବିଭାଗ କନିଷ୍ଠ ଯନ୍ତ୍ରୀ ମାନସ ମୁର୍ମୁ କହିଛନ୍ତି, ସେମାନେ ଆମଠାରୁ ଅନୁମତି ନେଇନାହାନ୍ତି। ଅନ୍ୟ କେଉଁଠୁ ଏନେଇ ଅନୁମତି ଆଣି ଥାଇପାରନ୍ତି। କୁଜଙ୍ଗ ଇରିଗେସନ ଯନ୍ତ୍ରୀ ନରେନ୍ଦ୍ର ଜେନା କୁହନ୍ତି, ଉକ୍ତ ଅଞ୍ଚଳ ଅଧା ଏରସମା ବ୍ଲକ ଅଧୀନରେ ଯାଉଛି। କେଉଁଠି ପାଣି ଉଠୁଛ ଶୁକ୍ରବାର ଏନେଇ ଯାଞ୍ଚ କରାଯିବା ପରେ କାର୍ଯ୍ୟାନୁଷ୍ଠାନ ନିଆଯିବ।
